جىل باسىنان بەرى وبلىستاعى بەس كاسىپورىننىڭ جۇمىسشىلارى الدىنداعى جالاقىسىنىڭ كولەمى 58,9 ميلليون تەڭگەنى قۇراعان. كوپتەگەن كاسىپورىندار جۇمىسشىلاردىڭ زەينەتاقى جارنالارىن, الەۋمەتتىك, سالىق تولەمدەرىن اۋدارۋعا اسىقپايتىنىن ايتتى. ولاردىڭ قاتارى بۇگىندە ەلۋدەن اسقانى دا انىقتالعان.
وبلىس پروكۋرورى مىندەتىن اتقارۋشى اسحات ىبىراەۆتىڭ ايتۋىنشا, جىل باسىنان بەرى 365 ادام كاسىپورىننىڭ بىتپەيتىن بانكروتتىعىنان وزىنە ءتيىستى جالاقىسىن الا الماي ءجۇر. ول كىرىس دەپارتامەنتىنە مۇنداي كاسىپورىندار جۇمىسشىلارىنا جالاقى قارىزىن سول كاسىپورىن مۇلكىمەن نەمەسە زاتتاي بەرۋ مۇمكىندىگىن قاراستىرۋدى ۇسىندى. وتىرىستا كەيبىر جۇمىس بەرۋشىلەر كاسىپورىندى قاساقانا بانكروت جاساۋعا ۇمتىلاتىنى ايتىلدى.
سونىمەن قاتار وبلىستا جۇمىس بەرۋشىلەرمەن 6000 مەموراندۋم جاسالعان, ولار 165000 جۇمىسشىنى قامتيدى. الايدا ولاردىڭ بارلىعى بىردەي مەموراندۋم شارتىن ورىنداي بەرمەيدى. وتىرىستى جۇرگىزگەن وبلىس اكىمى ارحيمەد مۇحامبەتوۆ كاسىپورىنداردا ۇجىمدىق كەلىسىم شارتتىڭ جاسالۋىن ۇسىندى. «ۇجىمدىق كەلىسىم-شارتتى ورىنداماعان جۇمىس بەرۋشى زاڭ الدىندا جاۋاپ بەرەدى» دەدى ارحيمەد بەگەجان ۇلى.
سونىمەن قاتار, وبلىس اكىمى اۋدان, قالا اكىمدەرىنە قارىزى بار كاسىپورىن باسشىلارىنان جۇمىسشىلاردىڭ جالاقى قارىزىن قايتارۋى تۋرالى ەسەپ الۋدى, ءتيىستى باسقارمالاردىڭ ولارعا شارا قولدانۋىن تاپسىردى.
ءنازيرا جارىمبەتوۆا,
«ەگەمەن قازاقستان»
قوستاناي
