فوتوگرافتاردىڭ وبەكتيۆىنە ىلىنگەن قاس-قاعىم ساتتەن تۇراتىن سۋرەتتەردىڭ بارلىعى دەرلىك حالقىمىزدىڭ سالت-ءداستۇرىن, ۇلتتىق ويىنداردى, تۇرمىسىن, ۇلى دالانىڭ اسەم تابيعاتىن پاش ەتەدى.
− قازىر فوتوعا تۇسىرۋمەن اۋەستەنۋشىلەر كوپ. الايدا, كانىگى فوتوگرافتاردىڭ قولتاڭباسى ءتىپتى وزگەشە ەكەنى بەلگىلى. ولار سۋرەتكە ءوزىنىڭ جان جىلۋىن سالادى, سۋرەت كادىمگىدەي جاندى, ءومىردىڭ ءوزى سەكىلدى اسەر بەرەدى. ال مۇنداي سۋرەتتى تۇسىرۋگە ءبىلىم مەن تالانت, ەرىنبەيتىن ەڭبەك كەرەك, – دەدى كوركەمسۋرەت گالەرەياسىنىڭ مەڭگەرۋشىسى سايا قاليەۆا.
كورمەنىڭ اشىلۋ سالتاناتىندا ءسوز سويلەگەندەر كوڭىل تولقىنىستارىن جاسىرا المادى.
− ماعان ءۇش سۋرەت ەرەكشە اسەر قالدىردى. سەرگەي ميرونوۆتىڭ «قوناقجايلىلىق» جانە «ارمان», ولەگ يابلوچكيننىڭ «اقشام الدىنداعى سايگ ۇلىكتەر» اتتى سۋرەتتەرى وتە ءساتتى, شىنايى شىققان. اۋىلداعى ساماۋرىن قويىپ جاتقان قازاق ايەلدەرى, جىلقى سۇلۋلىعىنىڭ تابيعات قۇبىلىسىمەن استاسۋى, سونىمەن قاتار, اۋىلداعى ەسكى ءۇي الدىندا ويىنشىق ماشينامەن ويناپ وتىرعان ۇلدىڭ سۋرەتى نازارىڭدى ەرىكسىز اۋدارادى, – دەدى بەلگىلى قىلقالام شەبەرى ولەگ كۋسكوۆ.
كورمەگە بارلىعى 29 سۋرەت قويىلدى. كورەرمەنگە كوزايىم بولعان سۋرەت اۆتورلارىنىڭ اتى-ءجونىن وقىرمانعا اتاي وتكەندى ءجون كوردىك. ولار دا «جەگەنى جانتاق, ارقالاعانى التىن» جۋرناليستەر قاۋىمىنان: گەورگي شاپوۆالوۆ, يگور ۆالتەر, ەرمۇرات بەكمۇحامەدوۆ, ولەگ يابلوچكين, سەرگەي ميرونوۆ, ۆلاديمير موتوريكو, نيكولاي كۋدينوۆ, ايبەك ءجۇزباي, باعدات احمەتبەكوۆ, سەرگەي فەلدمان, مۇحتار سيبانباەۆ, يۆان مارماليدي, نيكولاي ساۆچەنكو, نيكولاي سولوۆەۆ.
ءنازيرا جارىمبەتوۆا,
«ەگەمەن قازاقستان»
قوستاناي
