كەزدەسۋدىڭ باسىندا مەملەكەتتىك حاتشى قازاقستان تەرەڭ ءارى جۇيەلى جاڭارۋلار كەزەڭىن باستان وتكەرىپ جاتقانىن اتاپ ءوتتى. مەملەكەت باسشىسى مىقتى ءارى جاۋاپكەرشىلىگى جوعارى ۇلت بولۋ ءۇشىن بولاشاققا قالاي قادام باسىپ, بۇقارالىق سانانى قالاي وزگەرتۋ كەرەكتىگى جونىندە مىندەت قويدى. مۇنى ورىنداۋ ءۇشىن قاجەتتى باستى شارت ءتول مادەنيەتتى, دەربەس ۇلتتىق كودتى ساقتاۋ بولىپ سانالادى.
گ.ابدىقالىقوۆا قازاقستان پرەزيدەنتىنىڭ تاپسىرماسى بويىنشا «جاھانداعى زاماناۋي قازاقستاندىق مادەنيەت» اتتى جوبانىڭ ىسكە اسىرىلاتىنىن ايتتى. مەملەكەتتىك حاتشى ەلباسىمىز ءبىزدى الەمنىڭ قارا التىنمەن جانە سىرتقى ساياساتتاعى جوبالارىمىزبەن عانا ەمەس, ماڭىزدى ءمادەني جەتىستىكتەرىمىزبەن دە تانۋعا تيىستىگى جونىندە مىندەت قويعانىنا نازار اۋداردى.
سونداي-اق, كەزدەسۋدە وپەرا جانە بالەت ونەرى سالاسىنداعى ىنتىماقتاستىقتى دامىتۋ, «لا سكالا» تەاترىنىڭ قازاقستانداعى جانە «استانا وپەرا» مەملەكەتتىك وپەرا جانە بالەت تەاترىنىڭ يتالياداعى گاسترولدەرىن وتكىزۋ تاجىريبەسىن ورىستەتۋ ماسەلەلەرى تالقىلاندى.
گۇلشارا ابدىقالىقوۆا حالىقارالىق ەكسپو-2017 مامانداندىرىلعان كورمەسى اياسىندا قازاقستان ەلورداسىندا 1-10 قىركۇيەك ارالىعىندا تۇڭعىش رەت ميلانداعى ايگىلى «لا سكالا» تەاترىنىڭ تولىق قۇرامداعى گاسترولى وتكىزىلەتىنىن ايتتى.
مادەني باعدارلاما اياسىندا يتاليالىق ۇجىم «استانا وپەرا» ساحناسىندا دجۋزەپپە ۆەرديدىڭ «فالستاف» وپەراسىن ۇسىنادى, سونداي-اق, ماەسترو زۋبين مەتانىڭ جەتەكشىلىگىمەن ليۋدۆيگ ۆان بەتحوۆەننىڭ ايگىلى شىعارماسى – №9 سيمفونيا ورىندالادى.
مەملەكەتتىك حاتشى گ.ءابدىقالىقوۆا كەزدەسۋ سوڭىندا ا.پەرەيراعا مىقتى دەنساۋلىق, مول يگىلىك جانە زور شىعارماشىلىق تابىس تىلەدى.
