ول رەسپۋبليكالىق گازەتتىڭ مەنشىكتى ءتىلشىسى مەن ءتۇرلى ءۇش جۋرنالدىڭ باس رەداكتورلىعىنان – ورتالىق كومسومول كوميتەتىنىڭ حاتشىلىعىنا, ەكى بولەك مينيسترلىكتى باسقارۋدان – ورتالىق پارتيا كوميتەتىنىڭ ءبولىم مەڭگەرۋشىلىگىنە, جۋرناليستەر وداعىنىڭ توراعالىعىنان – جوعارعى كەڭەستىڭ دەپۋتاتتىعىنا, قاتارداعى مۇعالىمنەن – ونەر اكادەمياسىنىڭ پروفەسسورلىعىنا, ناقتى تاجىريبەدەن – جالپى تەوريالىق عىلىمي تالداۋعا دەيىنگى جولدى ءجۇرىپ ءوتتى.
كامال ەكەۋمىزدىڭ تۋىپ-وسكەن جەرىمىز – قازاقتىڭ باعىنا بىتكەن, ءۇش ءجۇزدىڭ باسىن ءبىر تۋ استىندا بىرىكتىرگەن, قاسيەتتى مەكەن – ۇلىتاۋدىڭ ءتوسى. بالعىن بالالىق شاقتىڭ قىزىعىن ءبىرىنشى كلاستان باستاپ بىرگە كوردىك. جوعارى وقۋ ورىندارىنا دا قاتار ءتۇسىپ, ارقاشان ءبىر-بىرىمىزدەن كوز جازبادىق. كامالدىڭ اكەسى اۋىل مۇعالىمى بولعان, رەپرەسسيالىق قۋدالاۋعا ۇشىراپ, ەرتە دۇنيە سالدى. كامال ول كەزدە ون بىردە, اتاسىنىڭ اسىراۋىندا قالدى. مەكتەپ قابىرعاسىندا ءجۇرىپ سۇم سوعىستىڭ سۇراپىل جىلدارىنىڭ اۋىرتپالىعى مەن ودان سوڭعى تار زاماننىڭ قيىنشىلىقتارىن كورىپ وستىك. ول ۋاقىت ءبىز ءۇشىن رۋحاني دۇنيەمىزدىڭ قالىپتاسقان, ماڭىزدى كەزەڭ بولاتىن. ەل تاعدىرىنا بايلانىستى سۇراقتار كامالدى ەرتەدەن تولعاندىردى, العاشقى ماقالالارى مەكتەپتە ءجۇرىپ-اق اۋداندىق, وبلىستىق, رەسپۋبليكالىق گازەتتەردىڭ بەتتەرىندە جارىق كوردى. كەڭەس زامانىندا شىققان تەگىڭ جايلى ايتۋدىڭ ءجونى بولا بەرمەيتىن, ونى زەرتتەۋ مۇمكىن بولمادى, بارلىق دەرەك اۋىزبا-اۋىز بەرىلىپ وتىراتىن. بولىس بولعان ايگىلى باباسى بابىردىڭ ياسساۋي كەسەنەسىنىڭ قاسىندا جەرلەنگەنىن ەستىپ كامال قۋانىشقا بولەنگەن بولاتىن. وتان سوعىسىنىڭ جاۋجۇرەك ءتىلشىسى, اتاقتى جازۋشى باۋبەك بۇلقىشەۆ كوكەسىن ءاردايىم ءپىر تۇتتى. بۇلقىشەۆ ەسىمىمەن اتالعان سىيلىقپەن بۇگىندە جاس دارىندار ماراپاتتالادى. ەكەۋى ءجيى حات الىسىپ, حابارلاسىپ تۇردى. باۋبەكتىڭ ايتقان كەڭەس-سوزدەرى مەن وسيەتتەرى كامالدىڭ ەڭبەك جولىنا باتا بولىپ, مادەنيەتىمىزدىڭ اقيىعىنا اينالۋىنا اپارعان باستاۋ بولدى.
كوزقاراستارىنىڭ قالىپتاسۋىنا سەبەپشى بولعانداردىڭ ءبىرى – جۇبايى ءنادلانىڭ اعاسى, انۋاربەك شمانوۆ, بىلىمدارلىعى زور وسى جاننىڭ يدەيالىق قاعيدالارى پارتيالىق ۇستانىمدارعا سايكەس كەلە بەرمەيتىن. كامالدىڭ بار عۇمىرى بەلگى-بەدەرلى وقيعالارعا تولى بولدى, سولاردىڭ ورتاسىندا ءجۇرىپ ورەلى, اسەم شىعارماشىلىق ءومىربايانى قالىپتاستى. ءومىرىنىڭ ءار كەزەڭىندە كۇردەلى دە قيىن ىستەردى يگەرۋىنە تۋرا كەلدى, ولار جاڭا شىعارماشىل دەڭگەيگە كوتەرىلۋگە شاقىردى. باسقارعان ءتۇرلى مەكەمەلەرى مەن ۇجىمدارىندا كىلەڭ شىعارماشىل جانداردىڭ باسىن بىرىكتىردى. ونىڭ باسقارۋىنىڭ اينىتپاي تانيتىن, وزىنە ءتان ەرەكشەلىگى بار بولاتىن. قوعامعا قاجەتتىلىگىن ۇدايى اسىرىپ, ۋاقىت ۇنىنە تابىسپەن جاۋاپ قاتىپ, شىعارماشىل قاجىر-قايراتىن اياۋسىز جۇمساپ, كەزدەسكەن قيىنشىلىقتاردى جەڭە ءبىلدى. ارىڭا اقاۋ تۇسىرمەي تابىستى بولۋ – اۋىر مىندەت. ول ءاردايىم وزگەنىڭ جانىن ايالاپ, وزىنە دەگەن سەنىمگە سايكەس تۇرىپ, قورشاعان ورتاسىنا مەيىرىم سىيلادى.
بۇگىن ءبىز كامالدىڭ بەينەسىن ەستە قالعان ەستەلىكتەردەن ەلەستەتىپ وتىرمىز. قازاق ۋنيۆەرسيتەتىن ۇزدىك ديپلوممەن اياقتاپ, قىزمەتىن «لەنينشىل جاستىڭ» (كەيىنگى «جاس الاش») مەنشىكتى ءتىلشىسى رەتىندە باستاپ, ءوزىن تاماشا پۋبليتسيست رەتىندە تانىتا ءبىلدى. ءبىر عانا «قىز نامىسى» اتتى ماقالاسى ورتالىق كومسومول كوميەتىنىڭ ارنايى قاۋلى قابىلداۋىنا سەبەپشى بولىپ, ەسىمىن ەلگە تانىتتى. العاشقى عىلىمي-كوپشىلىك «ءبىلىم جانە ەڭبەك» جۋرنالىنىڭ ءبىرىنشى رەداكتورلىعى كەزىندە ۇلى ساتپاەۆ پەن مارعۇلاننىڭ ەڭبەكتەرىن جاريالاپ قويماي, وزدەرىن رەداكتسيالىق كەڭەستىڭ مۇشەلىگىنە تارتقان ەدى. ورتالىق كومسومول كوميتەتىندەگى حاتشىلىق قىزمەتى تۇسىندا وزبەكالى جانىبەكوۆتىڭ وزىمەن ۇزەڭگىلەس-ارىپتەس بولىپ, وسى تاماشا جاننىڭ سول كەزەڭدەگى بارلىق ايرىقشا باستاۋلارىنا بەلسەندى كومەك كورسەتكەن ەدى.
كينوستۋديا ديرەكتورلىعى, مەملەكەتتىك كينو ورىنباسارلىق قىزمەتتەرىندە «قازاقفيلمنىڭ» شاتىرى استىندا كوركەمدىك كەڭەستىڭ مۇشەلەرى رەتىندە ش. ايمانوۆ, ءا. نۇرپەيىسوۆ, و. سۇلەيمەنوۆ, ع. مۇسىرەپوۆ, ق. مۇحامەدجانوۆ, ءا. مارعۇلان, ءا. ءالىمجانوۆ, ءا. تارازي, س. مۇراتبەكوۆتى شاقىرىپ, وتاندىق مادەنيەت اسپانىندا ر. باعلانوۆا, ب. تولەگەنوۆا, ە. سەركەباەۆ, ءا. مامبەتوۆ, ا. ءاشىموۆ سياقتى ونەر جۇلدىزدارىن جارقىراتا الدى. قازاق كينوسىن بۇكىل وداقتىڭ كورەرمەندەرىنە تانىمال ەتكەن, كلاسسيكالىق تۋىندىلارعا اينالعان: «ءترانسسىبىر ەكسپرەسى», «تاقيالى پەرىشتە», «قىز جىبەك», «قيلى كەزەڭ», «اتاماننىڭ اقىرى», «شوق پەن شەر», «نان ءدامى» فيلمدەرىنىڭ جارىققا شىعۋىنا ىقپال ەتتى. ءوزىنىڭ بۇكىلوداقتىق كينو مەن تەلەديدار فورۋمدارىندا سويلەگەن جالىندى سوزدەرىمەن قازاقستانعا تاعىلعان «شەتكەرى مەكەن» ايدارىن جويا الدى. 1975 جىلى الماتىدا ونىڭ ىنتاسىمەن كەڭەستىك جانە الەمدىك جۇلدىزداردى جيناعان حالىقارالىق كينوفەستيۆال وتكىزىلدى. ول ءاردايىم قالىپتاسقان جاعدايدىڭ قۇرساۋىنان شىعاتىن جولدى تابا ءبىلدى. مىسالعا, عابيدەن مۇسىرەپوۆتىڭ 1940 جىلى جازىلىپ, ۇمىت قالعان «قىز جىبەك» ستسەناريىنە جان ءبىتىرىپ, جوسپاردان تىس وندىرىسكە ەنگىزىپ, قوسىمشا قارجىلاندىرۋدى وداقتىق بيۋدجەت ءبولىنىسى كەزىندە ىسكە اسىرۋى – عاجاپ ءىس. ونىڭ زور ىنتاسىمەن كەيىننەن حالىقارالىق سىيلىققا يە بولعان «شوق پەن شەردىڭ» ستسەناريى «قىرعىزفيلمنەن» قايتارىلىپ الىندى. شاكەن ايمانوۆتىڭ قويىلىمىنداعى «اتاماننىڭ اقىرى» ءفيلمىن ەكرانعا شىعارۋدا وراسان قيىندىقتاردان ءوتتى. «قيلى زامان» ءفيلمىن جارىققا شىعارۋدا قارجىلىق شيەلەنىستەردى شەشۋ جاۋاپكەرشىلىگىن موينىنا الدى. ءۇمىت وتى ءوشىپ, قينالىس باسقان تۇستا دا ۇلتتىق انيماتسيالىق مۋلتيپليكاتسيالىق فيلمگە جول بەرە الدى. وسى باستاۋدان سوڭ 200-دەن ارتىق مۋلتفيلم ەكرانعا شىققان ەدى. پۋبليتسيست-جازۋشى بولا تۇرىپ, جاڭا ماماندىقتاردى تەز يگەرىپ, ءبىرتۇتاس ونەر رەتىندە كينو مەن تەلەديدارعا تەڭ تۇردە, تابىستى باسقارۋشىلىق ەتتى.
مەملەكەتتىك تەلەراديوداعى قىزمەتىنە كەلگەن كەزىندە تەلەديدار سالاسى ارمانشىلدىق كەزەڭدى باسىنان كەشىرۋدە بولاتىن, وعان ىسىنە شەكسىز بەرىلگەن, جىگەرمەن العا باستايتىن جەتەكشى قاجەت ەدى. پارتيالىق-مەملەكەتتىك تاجىريبەدەن وتكەن, بۇرىن مەملەكەتتىك كينونى باسقارعان, بەلگىلى جۋرناليست جاڭا ورىندى بوتەنسىمەي, بىردەن قىزۋ باسقارۋ ىسىنە كىرىستى. ماسكەۋ تەلەديدارىنىڭ كولەڭكەسىندە قالعان قازاق تەلەديدارىنىڭ كوڭىلسىز حابارلارى سمايىلوۆتىڭ كەلۋىمەن جاندانىپ, كورەرمەندى قىزىقتىراتىن جاڭا, اسەرلى كەيىپكە كوشتى. ول كەڭەس وداعىنىڭ بىرتۇتاستىق ۇستانىمدارىنا ساي قازاقستاننىڭ كوپ ۇلتتىلىعى ونەردە بەينەلەنۋى ءتيىس دەپ سانادى. ءوزى قۇرعان «ايتىس», «تەرمە» سەكىلدى ۇلتتىق باعدارلامالاردىڭ شەڭبەرىنەن اسىپ, ءتۇرلى مادەنيەتتىڭ ءوزارا سۇحباتىن قۇردى. سوڭىنان «ازيا داۋسى» حالىقارالىق فەستيۆالى مەن شات-شادىمان «تاماشا» باعدارلاماسىنا ۇلاسقان «مەدەۋ جۇلدىزدارى», «الماتى قوناقتاردى قارسى الادى» حابارلارىنىڭ ىنتا بەرۋشىسى مەن ۇيىمداستىرۋشىسى بولدى. ونىڭ كەلۋىمەن كوپتەگەن دەرەكتى فيلمدەر پايدا بولىپ, كورەرمەن وتاندىق تاريح پەن ءومىر جاعدايىنا تەلەديدار ارقىلى زەر سالدى. ۇنەمى ءوزى مەن وزگەنىڭ بويىنداعى جاقسىلىقتى ۇشتاپ, قاراپايىم جانعا دارىندىلىق سەزىم سىيلايتىن قاسيەتى بار ەدى.
ءبىر سوزبەن ايتقاندا, كامال سول زاماننىڭ كينوسى, تەلەديدارى مەن جۋرناليستيكاسىنداعى بارلىق شىعارماشىل ۇردىستەردىڭ ۇيىتقىسى, ىنتا بەرۋشىسى, ۇيىمداستىرۋشىسى بولدى. 1986-88 جىلدارى كامال سمايىلوۆ ورتالىق پارتيا كوميتەتىندە مادەنيەت ءبولىمىنىڭ مەڭگەرۋشىسى قىزمەتىن اتقاردى, بۇل كەزەڭدە ءوزى قۇرىلىسىنا قاتىسىپ, جاسامپازدىعىنا قوعام زيالىسى, مادەنيەت قايراتكەرى, حح عاسىر اياعىنىڭ شەجىرەشى-جازۋشى رەتىندە ۇلەس قوسقان قازاقستان ەلى تۇبەگەيلى وزگەرىستەردىڭ الدىندا تۇرعان بولاتىن. ول پارتيانىڭ قولىنداعى سويىل سوعار بولمادى, سول كەزەڭدەگى بارلىق ناعىز مادەنيەت قىزمەتكەرلەرى سياقتى بەلگىلى ءتارتىپتى ۇستانعانمەن, ادەمى ءسوزدى جالاۋ ەتىپ, جەكە ماقساتتى كوزدەيتىن پيعىلدان اۋلاق بولدى. ءوزىن پارتيانىڭ «ادال قىزمەتكەرى» سانادى, بىراق «پارتيا» ۇعىمىنا ول ەلدى, حالىقتى, ونىڭ تاريحىن, سان ۇرپاق ەرلىك كورسەتىپ, شايقاستاردا قورعاعان ەلدىڭ بولاشاعىن جاتقىزدى. كامال سمايىلوۆ پارتيالىق – كەڭەستىك بيلىكتەگى ارىپتەستەرىمەن ءبىر مەكتەپتەن وتكەنىنە قاراماستان, ولارعا ۇقسامايتىن. ونىڭ كۇن ساۋلەسىندەي شۋاقتى, قارسى كەلگەندى قارۋسىز جايراتاتىن جىلى ءجۇزى, ادامداردى ءتۇرلى دەڭگەيگە بولمەي, بىردەي قاراپايىم قابىلداۋى ماسەلەلەردىڭ ءتۇيىنىن جەڭىل دە تەز شەشۋىنە كومەكتەسەتىن. وتىرعان ورتاسىن وزىنە بىردەن باۋراپ الىپ, جىلى شىرايمەن شۇيىركەلەسە كەتەتىن مىنەزىنەن ەشۋاقىتتا تانبايتىن.
قاشاندا قالىڭ قاۋىم ورتاسىندا, كابينەتىنىڭ ادام كىرگەن سايىن كەڭي تۇسەتىن قاسيەتى بار بولىپ كورىنەتىن. ول وتانشىلدىق رۋحقا تولى كوپتەگەن رەسپۋبليكالىق, بەلگىلى رەسەيلىك باسىلىمداردىڭ رۋحاني ورتاسىندا ءومىر ءسۇردى. قورشاعان ورتاسى دا ونىڭ تۇلعاسىنا قىزىعۋشىلىق تانىتتى. ولار ارقايسىنىڭ وزىندىك ەرەكشەلىگى بار, مادەنيەتتىك, يدەولوگيالىق جانە ەستەتيكالىق ۇستانىمدارى جاعىنان بىرىنە-ءبىرى سايكەس كەلمەيتىن, كەيدە قايشى كەلىپ جاتاتىن ءتۇرلى اعىم وكىلدەرى بولاتىن. ونىڭ ءومىربايانىنان كەڭەستىك جۇيە زامانىنىڭ ەكىنشى جارتىسىندا تاريحتا ورىن العان تابىستار ايقىن كورىنەدى, ول ءوزى دە سول قۇرىلىستىڭ ايقىن وكىلى بولدى. كەيىنگى ويلارى وزگەرىسكە ۇشىراعانىمەن, وتكەنگە توپىراق شاشاتىنداردىڭ قاتارىندا بولمادى. ۋاقىت دوڭگەلەگىنىڭ اينالىمى كۇشەيىپ, جەلىسى زىمىراي تۇسكەن سايىن, قۇندىلىقتارىمىز قۇبىلىپ, ەتيكا, ەستەتيكا, مادەنيەت, ادامي قارىم-قاتىناستار لەگى وتكەننىڭ قويناۋىندا قالىپ, كوپشىلىك ساياسي باعىتىن وپ-وڭاي وزگەرتە العانىمەن, ول ءوزىنىڭ «كونە كوز» ۇستانىمدارىندا قالدى.
قىزمەتى مەن ومىرىنە ءتان ءبىر باعىتقا جۇمىلا كىرىسەتىن, كەرىستەن الشاق, جاتىق قيمىلى باسىلىمدارى مەن كىتاپتارىنان انىق بايقالادى : «ءومىردى وزىمەن ولشەسەك», «ححI عاسىرعا ساياحات», «عاسىر قىرقاسىندا», «ويانعان ويلار», «جيىرما جەتى جولدانباعان حات», «ەلىم ساعان ايتام, ەلباسى سەن دە تىڭدا», «جەتى قىر, ءبىر سىر» جانە باسقالارى سونىڭ ايعاعى.
ونىڭ قالامىنىڭ ۇشىنان 230 ماسەلەلى وچەركتەر مەن ماقالالار, 15 كىتاپ شىققانىن ايتۋ جەتكىلىكتى. قوعامنىڭ جولىققان كۇردەلى ماسەلەلەرى جايلى العاشقىلاردىڭ ءبىرى بولىپ ءبىلىپ, ورتاعا سالعان ويى زامانداستارىنىڭ كوڭىلىنەن شىعىپ جاتاتىن. ماقالالارى مەن كىتاپتارى ارقىلى وقىرماندى تاريحقا قاتىستى ەتىپ, قوعامداعى ماڭىزدى ۇردىستەرگە تارتىپ, قازاقستاننىڭ جۋىرداعى بولاشاعىنا ساپار شەككىزىپ, تولعانۋىنا سەبەپشى بولاتىن. مىسالعا, يادرولىق پوليگون, بايقوڭىرداعى عارىش جانە سارىشاعانداعى زىمىران ايلاقتارى جايىندا ۇنەمى اسا الاڭداۋشىلىقپەن جازدى, قىرىق جىلدان ارتىق يادرولىق جارىلىستان زارداپ شەككەن حالىققا لايىقتى وتەماقى تولەنىپ, بايقوڭىردىڭ ەلگە بەت بۇرۋى قاجەتتىگى جايىندا ايتتى («قيعاش كىتاپ», 2000 ج.).
جاڭا ۋاقىت لەبى جاڭا ەسىمدەردى الا كەلەدى. بىراق, تاريحتىڭ اساۋ تولقىنىنا كامال سمايىلوۆ سەكىلدى تارلانداردىڭ ەسىمدەرى عانا توتەپ بەرەدى. ول كوپشىلىك ءۇشىن قايتالانباس, شىڭى بيىك تۇلعا رەتىندە قالا بەرمەك. ونىڭ وزەكتىلىگىنە باعا جەتپەس پۋبليتسيستيكاسىن ب. سەرداليننىڭ ديسسەرتاتسيالىق تاقىرىپ ەتىپ الۋى – سونىڭ ءبىر ايعاعى. كامال سمايىلوۆتىڭ ءوزى دە جۋرناليستىگىمەن قوسا كينو سالاسىنداعى عىلىمي زەرتتەۋ جۇمىستارىن جۇرگىزىپ, وسى سالادا ەلۋدەن استام ماقالالار جازدى.
وتپەلى كەزەڭنىڭ قيىندىقتارىن جەڭۋ جايىندا جازىلعان «1996 جىلعى تاۋەلسىزدىك تۋرالى ويلار» باسىلىمى حاقىندا رەسپۋبليكا پرەزيدەنتى جىلى پىكىر ءبىلدىردى. بۇل ونىڭ ءوز ارەكەتىن قوعامنىڭ مۇددەسىنە سايكەس ۇستاپ, جوعارى جاۋاپكەرشىلىكپەن قارايتىندىعىنىڭ بەلگىسىن تانىتقان ەدى. كوپ نارسەگە كوڭىلى كونشىمەسە دە, جاڭادان بويىن تارتپاي, مادەنيەت پەن قوعامعا باتقان كۇيزەلىستى وتكىنشى سانادى. مىسالى, ەفيردە زەردەلىك باعدارلامالاردىڭ ازدىعىنا, بولسا دا ساياسي حابارلاردان اسپايتىندىعىنا, ويىن-ساۋىق باعدارلامالارىنداعى تەرىسقويلىقتىڭ باسىمدىعىنا, ءازىلدىڭ ءوزى اۋىر شىعىپ جاتاتىنىنا قىنجىلىس تانىتاتىن.
ول سان الۋان تاقىرىپ پەن باعىتقا قالام تارتىپ, ءبىر سوقپاققا تۇسپەدى. ونىڭ ەركىندىگى - ءتۇرلى توپتىڭ قارجىلىق مۇددەلەرى مەن اقپاراتتىق سوعىستاردان الشاق تۇرۋىندا ەدى, كەيبىر جۋرناليستەر سەكىلدى ادامنىڭ ابىرويىن توگۋدەن الشاق بولاتىن. سمايىلوۆ ۋاقىتپەن بىرگە جاساپ, ءاردايىم جاڭا قىرىنان تابىلىپ, ءوزىنىڭ ۇشقىر ويلارىنىڭ ۇشقىنىمەن ورنەكتەپ, تايعا تاڭبا باسقانداي ەتىپ جازاتىن ماقالا جولدارىمەن تاڭ قالدىراتىن. جازۋشىلىق ار-ۇياتىنا نۇكتەدەي قىلاۋ تۇسىرمەي, تالعامپاز وقىرماننىڭ كوڭىلىنە تورلەدى.
جۋرناليستيكا, كينو مەن تەلەديدارداعى قىزمەتى ارقىلى سان الۋان تاعدىرمەن تانىسىپ, ءتۇرلى مىنەز-ق ۇلىققا قانىقتى. («جەتى قىر مەن ءبىر سىر», 2000ج.). ادامنىڭ جان دۇنيەسىنىڭ قۇردىمعا قۇلدىراۋى مەن قىرانداي سامعاۋىنىڭ قۇپياسىن زەرتتەدى. «ادامدى بىلسەڭ, كامالداي ءبىل», – دەر ەدىم. اق جۇرەك قاتەلەسسە دە, جاقسى جاققا بەت الادى. اتقارعان سان جوعارى لاۋازىمدى قىزمەتى اياقتالعان كەزدە سوڭىنان تاس اتقان جان بولمايتىن. باسشىلىق قىزمەت بابى جۇمىر باستان تەز سىرعىپ ءوتىپ, ۇكىمەت تارتۋ ەتكەن ءتۇرلى ماراپاتتارمەن, العان اتاقتارمەن ەستە قالادى. ال ادامداردىڭ ايتقان العىسى مەن كورسەتكەن ىقىلاسىنىڭ ورنى – ءاردايىم بولەك.
جايساڭ جان وتباسىلىق ومىرىندە دە جايدارى بولاتىن. جۇبايى ءنادلا – اباي اتىنداعى پەداگوگيكالىق ۋنيۆەرسيتەتتىڭ قۇرمەتتى پروفەسسورى. ۇلى ءسالىم مەن قىزى زايرا جوعارى وقۋ ورىندارىن ۇزدىك ءبىتىرىپ, كاسىپكەرلىك ىستە تابىستى ەڭبەك ەتۋدە. قاتاڭ تاعدىردىڭ قاسىرەتى اينالىپ وتپەدى, ديپلوماتتىق جولدى تاڭداعان ۇلى نۇرلان ومىردەن مەزگىلسىز وزدى. اتاسى رەتىندە نەمەرەلەرى نازيكو, ءناريمان مەن ءاسيانى شەكسىز قامقورلىعى مەن مەيىرىمىنە بولەدى, ولار ءۇشىن اتاسىنىڭ اتاقتىلىعى ماڭىزدى ەمەس ەدى, جانىنداي جاقسى كورەتىن اتالارىنىڭ جۇمساق الاقانىنان ارتىق نارسە بولمايتىن. جەكە كولىك پەن ساياجاي ىزدەمەي, بارىنا قاناعات ەتتى. بارىمەن بازارلى بولدى, ساحنا ءتورىن بەرمەيتىن ەسترادا ءانشىسى ەمەس, زەردەلى جازۋشى-ءجۋرناليستىڭ جانى ءاردايىم قاراپايىمدىلىقتى قالادى. سمايىلوۆ كامالدىڭ ءومىرى مەن ءىسى – قۇرمەتكە قاتار لايىقتى, تابيعات پەن قوعامنىڭ ۇندەسكەن عاجاپ قۇبىلىسى.
تورەگەلدى شارمانوۆ,
اكادەميك
الماتى
