ماراپاتقا يە بولعان سپورتشىلاردىڭ قاتارىندا ءۇش بىردەي وليمپيادانىڭ جۇلدەگەرى ولگا رىپاكوۆا, ءححVىىى دۇنيە جۇزىلىك قىسقى ۋنيۆەرسيادانىڭ التىن جانە كۇمىس جۇلدە يەگەرى, بياتلونشى گالينا ۆيشنەۆسكايا, فريستايلشى, يسپانيادا وتكەن الەم چەمپيوناتىنىڭ كۇمىس جۇلدەگەرى يۋليا گالىشەۆا, ەكى جىل قاتارىنان ەل چەمپيونى اتانعان «التاي» ۆولەيبول كلۋبىنىڭ قىزدار قۇراماسىنىڭ مۇشەلەرى سانا انارقۇلوۆا, روبلەس باتيستا, يننا ماتۆەەۆا بار. «براتينو» حوككەي كۋبوگىنىڭ اقتىق سىنىنا دەيىن جەتكەن وسكەمەننىڭ «تورپەدو» حوككەي كلۋبىنىڭ بارلىق ويىنشىلارىنا جوعارى حوككەي ليگاسىنىڭ مەدالدارى تاپسىرىلدى. اتالعان كلۋبتىڭ پرەزيدەنتى نيكولاي پروسكۋرين, ديرەكتورى سەرگەي نەمچينوۆ, باس جاتتىقتىرۋشى الەكسەي جداحين, اعا جاتتىقتىرۋشى ەرلان ساعىمباەۆ پەن سپورتتىق ديرەكتور دوسجان ۋالحانوۆقا وبلىس اكىمىنىڭ قۇرمەت گراموتالارى تابىس ەتىلدى. ەرەكشە اتاپ وتەرلىگى, بۇل كۇنى كلۋبتىڭ بارلىق قىزمەتكەرلەرىنە, دارىگەرىنە دە, حوككەيشىلەردىڭ ماسساج جاساۋشىلارىنا دا قۇرمەت كورسەتىلدى.
جىل باسىندا الماتىدا جالاۋى جەلبىرەگەن ءححVىىى دۇنيە جۇزىلىك ۋنيۆەرسيادا مەن جاپونيادا وتكەن ازيا ويىندارىندا اتوي سالعان ۆاسيلي پودكورىتوۆ, يۆان ليۋفت, پاۆەل كولماكوۆ, دميتري رەيحارد, يان ساۆيتسكي, ەلەنا كولومينا, سەرگەي چەرەپانوۆ, ەردوس احماديەۆ, سەرگەي تكاچەنكو, مارات جاپاروۆ پەن اۋىر اتلەتيكادان جاستار اراسىندا وتكەن الەم چەمپيوناتىندا كۇمىس جۇلدە العان داريا پاۆلوۆا مەن وسى سپورتشىلاردىڭ بارلىعىنىڭ جاتتىقتىرۋشىلارى دا ماراپاتتان تىس قالعان جوق.
«كەزىندە ءبىر جۋرناليست بۇرىنعى اقش پرەزيدەنتىنەن «ەلىمىزدىڭ اتىن قالاي شىعارۋعا بولادى؟» دەپ سۇراعاندا ول: «مەملەكەتتىڭ اتىن الەمگە تانىتۋدىڭ ەكى جولى بار: ءبىرىنشىسى – ايعا ۇشۋ, ەكىنشىسى – وليمپيادا چەمپيونى اتانۋ» دەپ جاۋاپ بەرگەن ەكەن. وسىعان قاراپ-اق, سپورتشىلاردىڭ جەڭىستەرى ەلى ءۇشىن قانشالىقتى ماڭىزدى ەكەنىن باعامداي بەرۋگە بولادى. شۇكىر, ءبىزدىڭ ەل دە, ءبىزدىڭ وبلىس تا مۇنداي ساڭلاقتاردان كەندە ەمەس. شىعىس قازاقستاننان رەسپۋبليكاعا عانا ەمەس, بۇكىل الەمگە تانىمال سپورتشىلار شىققان جانە ءالى دە شىعا بەرەرى انىق. سپورتشى بولۋ وڭاي دۇنيە ەمەس. سىڭعىرلاعان مەدالداردىڭ ار جاعىندا قانشاما توگىلگەن تەر, مازاسىز كۇندەر مەن ۇيقىسىز تۇندەردىڭ جاتقانىن ۇمىتپايىق. بارلىقتارىڭىزدى قۇتتىقتايمىن. ەلىمىزدىڭ مارتەبەسىن اسقاقتاتا بەرىڭىزدەر», - دەدى سپورتشىلارعا سەرتيفيكاتتار مەن العىس حاتتاردى تاپسىرعان وبلىس باسشىسى دانيال احمەتوۆ.
ماراپات الىپ, قۇرمەتكە بولەنگەن سپورتشىلار ءوز كەزەگىندە ۇمىت قالدىرماي, ەلەپ-ەسكەرىپ, ءتيىستى جاعدايلارىن جاساپ جاتقان وبلىس اكىمدىگىنە العىستارىن ءبىلدىرىپ, لەبىزدەرىن جەتكىزدى. «تورپەدو» حوككەي كلۋبىنىڭ كاپيتانى ماكسيم بەلياەۆ ايماق باسشىسىنا حوككەي تاياقشاسىن, «التاي» قىزدار ۆولەيبول كومانداسىنىڭ كاپيتانى يننا ماتۆەەۆا وزدەرىنە جەڭىس سىيلاعان ماتچتا ويناعان دوپتى سىيعا تارتتى.
ازامات قاسىم,
«ەگەمەن قازاقستان»
وسكەمەن
سۋرەتتەردى تۇسىرگەن – ءماناپ مۇرزاتاەۆ
