كەزدەسۋدە مەملەكەت باسشىسىنا «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋدا ەلىمىزدىڭ قارجى جانە فيسكالدىق جۇيەسىنىڭ الدىنا قويىلعان مىندەتتەردىڭ ىسكە اسىرىلۋ بارىسى تۋرالى مالىمدەلدى.
نۇرسۇلتان نازارباەۆ ەلدىڭ ەكونوميكالىق دامۋ دەڭگەيىن ارتتىرۋدىڭ ماڭىزدىلىعىن اتاپ ءوتىپ, نەگىزگى ءۇش مىندەتتىڭ ورىندالۋىنا باسا نازار اۋداردى.
– بىرىنشىدەن, ءتيىستى تەتىكتەر قالىپتاستىرۋ ارقىلى بيۋدجەت كىرىسىن ارتتىرۋ كەرەك. قاجەت بولعان جاعدايدا, شەتەلدىك تاجىريبە زەرتتەلۋگە ءتيىس. ەكىنشىدەن, مەملەكەتتىك شىعىستاردى ازايتۋ كەرەك. ۇشىنشىدەن, بولىنگەن بيۋدجەتتى ءتيىمدى پايدالانعان ءجون. مەملەكەت ءۇشىن قارجى ءمينيسترى قىزمەتىنىڭ تيىمدىلىگى ونىڭ وسى فۋنكتسيالاردى قالاي اتقاراتىنىنا تىكەلەي بايلانىستى, – دەدى قازاقستان پرەزيدەنتى.
مەملەكەت باسشىسى ەكونوميكالىق ءوسىمنىڭ تومەندەۋى مەن كىرىستەردىڭ ازايۋى بايقالعان جاعدايدا قارجى مينيسترلىگىنىڭ بيۋدجەتتى تولىقتىرۋدىڭ قوسىمشا تەتىكتەرىن قالىپتاستىرىپ, مەملەكەتتىك قارىزدىڭ قاۋىپسىز پارامەترلەرىن قامتاماسىز ەتۋگە تيىستىگىن اتاپ ءوتتى.
– نەگىزىنەن, ەكونوميكاداعى ءوسىم ۇلتتىق قوردىڭ قارجىسى ەسەبىنەن قامتاماسىز ەتىلۋدە. كوپتەگەن ۇيىمدار ودان ءارى يگەرۋ ءۇشىن قاشان قارجى بولەدى ەكەن دەپ, قول جايىپ قاراپ وتىرادى. قارجى مينيسترلىگى بۇل ۇدەرىستى شەكتەپ, باقىلاۋدا ۇستاۋعا ءتيىس. ءبىز ۇلتتىق قوردى ۇلعايتۋىمىز قاجەت, – دەپ تاپسىرما بەردى نۇرسۇلتان نازارباەۆ.
سونداي-اق, ب.سۇلتانوۆ مەملەكەت باسشىسىنا قارجىلىق تۇراقتىلىقتى ساقتاۋ, الەۋمەتتىك مىندەتتەمەلەردى ورىنداۋ, تەكسەرىستەردى قىسقارتۋ جانە كاسىپكەرلىك سەكتورعا تۇسەتىن اۋىرتپالىقتى ازايتۋ, مەملەكەتتىك ساتىپ الۋلار جۇيەسىن جەتىلدىرۋ, مەملەكەتتىك اۋديت جۇيەسىنە الدىن الۋ شارالارىن ەنگىزۋ جونىندە ۆەدومستۆو تاراپىنان جاسالىپ جاتقان قادامدار تۋرالى باياندادى.
