رۋحانياتتىڭ ماسەلەسىنە ارنالعان ماقالادا جاڭا تاريحي كەزەڭنىڭ باستالعانى ايتىلعان. سول ءۇشىن دۇنيەتانىمعا, ويلاۋ جۇيەمىزگە ابدەن ءسىڭىپ قالعان تاپتاۋرىن قاعيدالاردان ارىلۋ قاجەتتىگىن ايتقان ەلباسى رۋحاني جاڭعىرۋ جولىنداعى ماڭىزدى باسىمدىقتار مەن باعىتتاردى ايقىنداپ بەرگەن ەدى. تۇڭعىش پرەزيدەنت – ەلباسى كىتاپحاناسىندا ماقالانىڭ تىكەلەي مەكەمە قىزمەتكەرلەرىنە جانە قوعامداعى ءاربىر جەكە ادامعا قاتىستى تۇستارى جان-جاقتى ءتۇسىندىرىلدى.
جيىندى ەلباسى كىتاپحاناسى ديرەكتورىنىڭ ورىنباسارى بەيسەمباي جۇمابەكوۆ اشتى. ال, ماقالاداعى نەگىزگى باسىمدىقتار مەن باعىتتار تۋرالى الەۋمەتتىك-اعارتۋشىلىق جوبالار قىزمەتىنىڭ جەتەكشى عىلىمي قىزمەتكەرى عازيز تەلەباەۆ اڭگىمەلەدى. «تەحنولوگيالىق جاڭعىرۋعا ارنالعان بيىلعى جولداۋدان جانە ساياسي جاڭعىرۋعا باعىتتالعان كونستيتۋتسيالىق رەفورمادان كەيىن ماڭىزدى قادام رۋحاني جاڭعىرۋ قولعا الىنباق. ەلباسىنىڭ ماقالاسىندا بەلگىلەنگەن ماقسات-مىندەتتەر – وتە وزەكتى. الماعايىپ الەم جىلدام ءوزگەرۋدە. وعان جۇدىرىقتاي جۇمىلعان ۇلت بولىپ بەيىمدەلۋىمىز كەرەك», دەگەن ع.تەلەباەۆ لاتىن الىپبيىنە كوشۋ, تۋعان جەردى كوركەيتۋ, گۋمانيتارلىق ءبىلىم بەرۋ, ءمادەنيەتتى زاماناۋي قالىپقا كەلتىرۋ, قۇندىلىقتاردىڭ بۇكىل قازاقستاندىق شەڭبەرىن قۇرۋ, ابىرويلى زامانداستاردى ارداقتاۋ – بارلىعى ناقتى تاپسىرمالارمەن ۇلاسۋى قاجەتتىگىن, ونى ىسكە اسىرۋعا ۋاقىت بەرىلگەنىن ايتتى. ول سونداي-اق, ۇلتتىق كودتى ساقتاۋ ارقىلى رۋحاني جاڭعىرۋ قاجەت دەگەن ماعىناداعى ەلباسى يدەياسىن باسشىلىققا الا وتىرىپ, بۇگىنگى زاماندا اعىلشىن ءتىلىن ءبىلۋدىڭ قاجەتتىلىگىنە توقتالدى. اسىرەسە, الىس-جاقىن شەت ەلدەرمەن بايلانىستاعى كىتاپحانا قىزمەتكەرلەرىنىڭ اعىلشىن تىلىندە سويلەي الۋى وزەكتى ەكەنىن جەتكىزدى. ال, ەلباسىنىڭ قوعامدا ۇلكەن رەزونانس تۋعىزىپ جاتقان لاتىن الىپبيىنە كوشۋ تۋرالى پىكىرى «كوشەمىز, كوشپەيمىز» دەپ تالقىلاناتىن ەمەس, ورىندالۋى ءتيىس شارۋا ەكەنىنە ماڭىز بەردى.
جيىن بارىسىندا الەۋمەتتىك-اعارتۋشىلىق جوبالار قىزمەتىنىڭ جەتەكشى عىلىمي قىزمەتكەرى ءلايلا يۆاتوۆا ەلباسى ماقالاسىنىڭ تاربيەلىك ماڭىزدىلىعى مەن ءمانىنە كوپشىلىكتىڭ نازارىن اۋداردى. «قازاقستاننىڭ دامۋ باعدارى ەلىمىزدە تۇلعا جانە ادامنىڭ بوستاندىعى قۇرمەتتەلەتىنىن, ارى مەن ابىرويى باعالاناتىنىن, ادامگەرشىلىك قاعيدالارى مەن رۋحاني قۇندىلىقتارى جوعارى ەكەنىن كورسەتەدى», دەدى ول. قوعامداعى تۇلعانىڭ جان-جاقتى دامۋى تۋرالى بايانداي كەلە, جاستاردىڭ ەرلىكتىڭ, ەڭبەكسۇيگىشتىكتىڭ, وتانشىلدىقتىڭ ۇلگىسىنە اينالعان ادامدارعا قاراپ بوي تۇزەيتىنىن مالىمدەدى. سول ءۇشىن ەلباسىنىڭ «100 جاڭا ەسىم» جوباسىنا قاتىستى ءوز پىكىرىن ءبىلدىردى. ءلايلا مىرزاليقىزىنىڭ ويىنشا, بۇگىنگى تاڭدا جاستار ەلىكتەپ, ونەگە الاتىن تۇلعالار كوپ-اق. بىراق ولاردى ناقتى ەلباسى جوباسى اياسىندا ۇسىنۋ بارىسىندا جاۋاپكەرشىلىكپەن سارالاپ, تاڭداپ, ەل الدىنداعى ەڭبەگىن ەسكەرىپ شىعارۋ قاجەت.
جيىن بارىسىندا باسقا دا قىزمەتكەرلەر ءوز وي-پىكىرلەرىن ءبىلدىرىپ, ەلباسى ماقالاسىنا قىزىعۋشىلىق تانىتتى.
ايگۇل سەيىلوۆا,
«ەگەمەن قازاقستان»
