اسىرەسە, الەمدى عالامتور جاۋلاپ العان قازىرگى زاماندا «سانا-سەزىمىمىز بەن دۇنيەتانىمىمىزعا ءابدەن ءسىڭىپ قالعان تاپتاۋرىن قاعيدالاردان ارىلماساق, كوش باسىنداعى ەلدەرمەن تەرەزەمىزدى تەڭەپ, يىق ءتۇيىستىرۋ مۇمكىن ەمەس» ەكەنىن شەگەلەپ ايتۋى كەزدەيسوقتىق ەمەس.
عالامدىق وركەنيەتتىڭ كوشىنە ىلەسۋ ءۇشىن جەكە ۇلت بولىپ قالۋدىڭ ماڭىزى ەرەكشە زور.تارلان تاريحتا ءتىلى مەن رۋحانياتىنان ادا بولىپ, ۇلت رەتىندە جويىلىپ كەتكەن قاۋىمدار از ەمەس. سولاردىڭ كەبىن كيمەۋ ءۇشىن تەك ءوز ۇلتىمىزعا عانا ءتان ەرەكشەلىكتى, ادەت-عۇرىپ, سالت-داستۇرلەردى ساقتاپ قالىپ, كەلەر ۇرپاقتارىمىزعا جەتكىزۋ ەڭ قاسيەتتى مىندەتتەرىمىزدىڭ ءبىرى.
وسى ورايدا پرەزيدەنتىمىز: «اجەپتاۋىر جاڭعىرعان قوعامنىڭ ءوزىنىڭ تامىرى تاريحىنىڭ تەرەڭىنەن باستاۋ الاتىن رۋحاني كودى بولادى. جاڭا تۇرپاتتى جاڭعىرۋدىڭ ەڭ باستى شارتى – سول ۇلتتىق كودىڭدى ساقتاي ءبىلۋ. ونسىز جاڭعىرۋ دەگەنىڭىزدىڭ قۇر جاڭعىرىققا اينالۋى وپ-وڭاي. بىراق, ۇلتتىق كودىمدى ساقتايمىن دەپ بويىڭداعى جاقسى مەن جاماننىڭ ءبارىن, ياعني بولاشاققا سەنىمدى نىعايتىپ, العا باستايتىن قاسيەتتەردى دە, كەجەگەسى كەرى تارتىپ تۇراتىن, اياقتان شالاتىن ادەتتەردى دە ۇلتتىق سانانىڭ اياسىندا سۇرلەپ قويۋعا بولمايتىنى ايدان انىق» دەپ كوپتىڭ كوكەيىندە جۇرگەن وي سۇلباسىن قابىرعالى وي تارامدارىمەن وتە سالماقتى بايىپتاپتى. شىنىندا ۇلتتىق كودىن باعالاپ, ونى قاسيەتتى قۇندىلىق رەتىندە ۇستانىپ كەلە جاتقان ەلدەر تاريح كوشىنىڭ باسىندا تۇرعانىن قازىر كورىپ وتىرمىز. ەندى وسى ورەلى ويلاردىڭ ومىردە جۇزەگە اسىرىلۋىنا بارشامىز, اسىرەسە بۇقارالىق اقپاراتتىق قۇرالدارى مول ۇلەس قوسۋى اۋاداي قاجەت.
دەمەك وسى تۇرعىدا ارنايى مەملەكەتتىك باعدارلاما جاسالسا ءتىپتى قۇبا-قۇپ بولار ەدى. سەبەبى, ءبۇگىنگى تاڭداعى اقپاراتتىق كوممۋنيكاتسيا قۇرالدارىنىڭ مۇمكىندىگى شەكسىز. ءداستۇرلى باق-تا عانا ەمەس عالامتوردا دا اۋديو-ۆيدەو ءونىمدەردى كورەرمەن, تىڭدارمان نازارىنا ۇدايى, جۇيەلى, جوسپارلى ءتۇردە ءارى مەملەكەتتىك دەڭگەيدە ۇسىنىپ وتىرساق ونىڭ جەمىسى مول بولاتىنى داۋ تۋعىزبايدى. باس رەداكتورلار كلۋبى دا وسى رەتتە ءوزىندىك ۇلەس قوسۋعا ءازىر. راسىندا, بۇل كوپ بولىپ قولعا الىناتىن, ءجۇزەگە اسىرىلاتىن تىرلىك. ەندەشە, بۇكىل زيالى قاۋىمدى وسى ۇلت كەلەشەگى جولىنداعى ىرگەلى ىسكە جۇمىلدىرايىق.
قازاقستاننىڭ باس رەداكتورلار كلۋبى قب
