پرەزيدەنت ماقالانىڭ كىرىسپە سوزىندە بىلاي دەيدى: «اتالعان ەكى جاڭعىرۋ پروتسەسىنىڭ دە ناقتى ماقسات-ءمىندەتتەرى, باسىمدىقتارى مەن وعان جەتكىزەتىن جولدارى بار. مەن كوزدەگەن جۇمىستارىمىزدىڭ ءبارى دەر ۋاقىتىندا جانە بارىنشا ءتيىمدى ءجۇزەگە اسارىنا سەنىمدىمىن. بىراق, ويلاعانىمىز ورىندالۋ ءۇشىن مۇنىڭ ءوزى جەتكىلىكسىز. ماقساتقا جەتۋ ءۇشىن ءبىزدىڭ سانامىز ىسىمىزدەن وزىپ ءجۇرۋى, ياعني ودان بۇرىن جاڭعىرىپ وتىرۋى ءتيىس. بۇل ساياسي جانە ەكونوميكالىق جاڭعىرۋلاردى تولىقتىرىپ قانا قويماي, ولاردىڭ وزەگىنە اينالادى». بۇل سوزدەر – ساياسي رەفورما مەن ەكونوميكالىق جاڭعىرۋ ەلىمىز ءۇشىن قانشالىقتى ماڭىزدى ەكەندىگىن كورسەتەتىن جول.
بولاشاققا باعدار رەتىندە قازاق قىزدار مەملەكەتتىك پەداگوگيكالىق ۋنيۆەرسيتەتىنىڭ ستۋدەنت جاستارى ەلباسىنىڭ وسى سوزدەرىن وزدەرىنىڭ العا قويعان ماقساتتارىنا كىرىكتىرە وتىرىپ, قازاقستان رەسپۋبليكاسىنىڭ ينتەللەكتۋالدىق دارەجەسىنىڭ جوعارىلاۋىنا ۇلەسىن قوسادى دەگەن سەنىمدەمىن. جاستاردىڭ, اسىرەسە ستۋدەنت جاستاردىڭ ينتەللەكتۋالدى كورسەتكىشتەرى ولاردىڭ تەك ءبىلىم دەڭگەيىمەن عانا ولشەنبەيدى, سونىمەن قاتار, ولاردىڭ رۋحاني جاڭعىرۋىمەن دە تىكەلەي بايلانىستى. رۋحاني جاڭعىرۋ ءاربىر جەكە تۇلعا ءۇشىن ونىڭ تاربيەسى, ۇلتتىق سانا-سەزىمى, ۇلتتىق رۋحاني تامىرىنان ءنار العان قۇندىلىقتارى مەن ونىڭ جاھاندىق ءوزگەرىستەردى دۇرىس بويىنا ءسىڭىرۋى.
مەن ۋنيۆەرسيتەتىمىزدىڭ ستۋدەنت جاستارىنىڭ باسەكەگە قابىلەتتى مامان بولاتىندىعىنا كامىل سەنىمدىمىن. باسەكەگە قابىلەتتى دەپ قازىرگى قازاق قوعامىندا مادەني قۇندىلىقتاردى بويىنا سىڭىرگەن, ءۇش ءتىلدى جەتىك بىلۋگە ۇمتىلعان جانە جاڭا ءادىستەر مەن تەحنولوگياعا تولەرانتتىلىقتى ساقتاي الاتىن تۇلعالاردى ايتا الامىز. وسىنداي جەكە قاسيەتتەر مەن قۇندىلىقتار بويىنان ستۋدەنت جاستار ەلىمىزدىڭ باسەكەگە قابىلەتتىلىك دەڭگەيىن كوتەرۋى ءتيىس.
قازاقستان رەسپۋبليكاسىنىڭ بولاشاق باعدارى وڭ بولۋى ءۇشىن ەلباسىمىز «پراگماتيزم» سوزىنە كوڭىل ءبولۋدى ۇسىنادى. ماقالادا ەلباسى: «پراگماتيزم – ءوزىڭنىڭ ۇلتتىق جانە جەكە بايلىعىڭدى ناقتى ءبىلۋ, ونى ۇنەمدى پايدالانىپ, سوعان سايكەس بولاشاعىڭدى جوسپارلاي الۋ, ىسىراپشىلدىق پەن استامشىلىققا, داڭعويلىق پەن كەردەڭدىككە جول بەرمەۋ دەگەن ءسوز» دەپ تۇسىندىرەدى. ەلباسىنىڭ وسى ءسوزدەرىن تولىق قولداي وتىرىپ, مەن رۋحاني مادەنيەتىنىڭ دامۋى ءۇشىن, ەلىمىزدىڭ ەكونوميكاسىنىڭ ءوسۋى ءۇشىن قازىرگى كەزدە ادام قۇندىلىقتارىنىڭ كەمەلدەنۋى مەن ءوزىنىڭ كاسىبي قىزمەتىن جوعارى دەڭگەيدە جۇزەگە اسىرۋى, سونىمەن بىرگە, جەكە تۇلعانىڭ ۇلتتىق بايلىقتى ەسكەرە وتىرىپ, وزدىگىنەن كەمەلدەنىپ دامۋى اسەر ەتۋشى ەڭ ماڭىزدى فاكتور دەپ بىلەمىن.
قازاقستان جاستارىنا تىلەگىم, ەلباسى ن.ءا.نازارباەۆتىڭ وتانىمىزدىڭ الەمدەگى ەڭ دامىعان 30 ەلدىڭ قاتارىنا قوسىلۋىنا باعىت بەرەتىن ءسوزدەرىنە قۇلاق اسىپ, وسى ماقساتقا جۇمىلا قىزمەت ەتەيىك.
دينار نوكەتاەۆا,
قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ رەكتورى,
قازاقستان پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ مۇشەسى
