الدىمىزدا جاڭادان قابىلدانعان ساياسي جانە ەكونوميكالىق جاڭعىرتۋلاردى ىسكە اسىرىپ الەمدەگى باسەكەگە قابىلەتتى 30 ەلدىڭ قاتارىنا ەنۋ مىندەتى تۇر. بۇل اسا زور مىندەتتى ورىنداۋ ءۇشىن مەملەكەت باسشىسى عىلىم, ءبىلىم, مادەنيەت پەن تاريحتى تۇتاستاي قامتيتىن ۇلتتىق رۋحاني جاڭعىرۋ باعدارلاماسىن ۇسىنىپ وتىر. بۇل − مازمۇنى وتە تەرەڭ, اۋقىمى كەڭ, قوعامدىق سانانى بيىككە كوتەرەتىن, ۇلتتىق قۇندىلىقتار دامۋىنىڭ باعىت-باعدارىن ايقىنداپ بەرگەن وتە ماڭىزدى قۇجات.
الەمدەگى باسەكەگە قابىلەتتى 30 ەلدىڭ قاتارىنا ەنۋ ءۇشىن ءاربىر قازاقستاندىق جانە بۇكىل حالقىمىز باسەكەگە قابىلەتتى بولۋى كەرەك. ياعني, ءاربىر قازاقستاندىق دەنساۋلىعى مىقتى, جوعارى مادەنيەتتى, كومپيۋتەرلىك ساۋاتتى, تەرەڭ ءبىلىمدى بولۋى ءتيىس. ول كەز كەلگەن ەلدە, ورتادا ەمىن-ەركىن ءسويلەپ, ءوز پىكىرىن دالەلدەپ وتكىزە بىلەتىن, ۇستامدى, قاراپايىم, سالاماتتى ءومىر سالتىن ۇستاعان ازامات رەتىندە قالىپتاسقانى ءجون.
ەلباسى ءوز ماقالاسىندا رۋحاني جاڭعىرۋدا ۇلتتىق سانانىڭ ءرولى ەرەكشە ەكەنىنە باسا نازار اۋداردى. اتا-بابالارىمىزدان امانات بولىپ كەلە جاتقان ۇلتتىق مادەنيەتىمىز بەن ادەبيەتىمىز, ونەرىمىز, ادەت-عۇرىپتارىمىز بەن سالت-ءداستۇرلەرىمىز, ءتىلىمىز, ءدىنىمىز, ءدىلىمىز – بۇلار, ءبىر ءسوزبەن ايتقاندا, ۇلتتىق كودىمىز, ياعني ۇلتتىق رۋحىمىز, ءوز بويىمىزدا ءماڭگى قالىپ, ونى زامانعا ساي جاقسى جاعىنا قاراي جاڭعىرتىپ, كەلەر ۇرپاققا جەتكىزۋ ءبىزدىڭ باستى ءمىندەتىمىز بولۋى ءتيىس. سونىمەن قاتار, قازىرگى تاڭدا ءجيى كەزدەسەتىن ءوز بويىمىزداعى كەيبىر جاعىمسىز رۋشىلدىق, جەرشىلدىك, تامىر-تانىستىق, «سەن ماعان – مەن ساعان» دەگەن سياقتى ۇلتتىڭ دامۋىنا كەدەرگى كەلتىرەتىن ادەتتەردەن ارىلماساق, كوشتەن ارتتا قالاتىنىمىز اقيقات.
ەلباسى ماقالاسىندا تاياۋ جىلدارداعى الداعى تۇرعان مىندەتتەر ايقىندالدى. سونىڭ ءبىرى – لاتىن ءالىپبيىنە كوشۋ. اتالعان الىپبيگە كوشۋ مەكتەپ قابىرعاسىنداعى بالالاردىڭ اعىلشىن ءتىلىن وقۋىمەن, قازىرگى زامانعى تەحنولوگيالىق, كوممۋنيكاتسيالىق عىلىم مەن ءبىلىم بەرۋ پروتسەسىنىڭ ەرەكشەلىكتەرىمەن ۇيلەسەدى. بۇل تۋرالى ەلباسى 2012 جىلى «قازاقستان-2050» ستراتەگياسىندا 2025 جىلعا قاراي لاتىن الىپبيىنە كوشۋ كەرەك دەپ ماقسات قويعان بولاتىن. ماقالادا تاپسىرمانىڭ ناقتى ورىندالۋ كەزەڭدەرى كورسەتىلگەن. ءبىلىم بەرۋ سالاسى بويىنشا الەمدەگى ەڭ جاقسى ساپالى 100 وقۋلىق قازاق تىلىنە اۋدارىلادى. بۇل ەلىمىزدىڭ جاستارىنا جاڭا ساپالىق دەڭگەيدە ءبىلىم بەرە باستاۋعا مۇمكىنشىلىك جاسايدى.
ەلباسى ۇسىنعان «تۋعان جەر» باعدارلاماسى جاستار اراسىندا قازاقستاندىق پاتريوتيزمگە تاربيەلەۋ مەن تۋعان جەردى ءسۇيۋ ارقىلى تۋعان ەلىنە, وتانىنا دەگەن سۇيىسپەنشىلىكتى ارتتىرا تۇسپەك. قازىردىڭ وزىندە بارلىق وڭىردە «تۋعان جەرگە تاعزىم» اتتى اكتسيا ءوتىپ, ولار ءوز جەمىسىن بەرۋدە. ءبىز كەشەگە دەيىن الەم ەلدەرىنىڭ, مىسالى, گرەكيانىڭ, ريم يمپەرياسىنىڭ تاريحىن, ادەبيەتىن, مادەنيەتىن وقىپ كەلدىك. ولاردى ءبىلۋ كەرەك تە شىعار. بىراق ءبىز ءوز ولكەمىزدىڭ, تۋعان جەرىمىزدىڭ تاريحى مەن گەوگرافياسىن, بوتانيكاسى مەن زوولوگياسىن تەرەڭ بىلە بەرمەيمىز. ءوزىمىز تۋىپ-وسكەن جەرىمىزدىڭ اتاۋى قالاي قويىلعانىن, ونىڭ تاۋلارى مەن سايلارى, جوتالارى, كولدەرى مەن وزەندەرىنىڭ اتتارىنىڭ تاريحىن, وسى جەردە تۋىپ, جانىن اياماي ەل ءۇشىن ەڭبەك ەتكەن اتالارىمىز بەن اپالارىمىزدىڭ ەسىمدەرىن جاس ۇرپاق ءبىلىپ ءوسۋى ءتيىس.
تۋعان جەردەن تۇلەپ ۇشىپ, ۇلان-عايىر رەسپۋبليكامىزدىڭ تۇكپىر-تۇكپىرىندە, شەت ەلدەردە جۇمىس ءىستەپ ءجۇرگەن جەرلەستەرىمىزدىڭ باسىن قوسىپ, مەكتەپ وقۋشىلارىمەن, اۋىل, قالا تۇرعىندارىمەن كەزدەسۋلەر ءوتكىزىپ, تۋعان جەرلەرىنە, مەكتەبىنە, اۋىلىنا قامقورلىق جاساعىسى كەلگەن كاسىپكەرلەردى قولداپ, ىنتالاندىرىپ وتىرۋ كەرەك. جەرگىلىكتى بيلىك «تۋعان جەر» باعدارلاماسىنا ەرەكشە كوڭىل ءبولىپ, ونىڭ الەۋەتىن تولىق پايدالانۋى ءتيىس. بۇل جۇمىستى تەرەڭ ويلاستىرىپ, تۋعان جەرىنە كومەك جاساعان جانداردى قولداپ-قۇرمەتتەپ وتىرۋ كەرەك. بۇل باعدارلاما ارقىلى ەلدى مەكەندەردى كورىكتەندىرۋ مەن كوگالداندىرۋ, مەكتەپتەردى جوندەۋ مەن كومپيۋتەرلەندىرۋ, ستاديوندار مەن سپورت الاڭدارىن سالۋ جانە تاعى باسقا ەلگە كەرەكتى تىرلىكتەردى اتقارۋعا بولادى. «تۋعان جەر» باعدارلاماسى جالپىۇلتتىق ءپاتريوتيزمنىڭ وزەگىنە اينالىپ, تۋعان جەرگە دەگەن ءسۇيىسپەنشىلىك, قازاقستاندىق پاتريوتيزم سەزىمىنە ۇلاسۋى ءتيىس.
ەلباسىنىڭ «بولاشاققا باعدار: رۋحاني جاڭعىرۋ» باعدارلاماسى رۋحانيات سالاسىنداعى الدا تۇرعان ءمىندەتتەردى ايقىنداپ بەردى. ماقالادا ايتىلعان ويلار, تۇجىرىمدار, ناقتى ۇسىنىستار مەن تاپسىرمالار – ۇلتتىق رۋحانياتىمىزدىڭ وزەگى. سوندىقتان دا ءبىز ونى تولىعىمەن قولدايمىز. ال ونى تەرەڭ وقىپ ءتۇسىنۋ, ورىنداۋ, ىسكە اسىرۋ, ناسيحاتتاۋ – ءاربىر قازاقستاندىقتىڭ مىندەتى. اسىرەسە, كەلەشەگىمىز − وقۋشى-ستۋدەنت جاستار ءۇشىن ماڭىزدى. بۇل جەردە ناۋقانشىلدىققا جول بەرۋگە بولمايدى.
«جاڭا جاعدايدا جاڭعىرۋعا دەگەن ىشكى ۇمتىلىس – ءبىزدىڭ دامۋىمىزدىڭ ەڭ باستى قاعيداسى. ءومىر ءسۇرۋ ءۇشىن وزگەرە ءبىلۋ كەرەك. وعان كونبەگەندەر تاريحتىڭ شاڭىنا كومىلىپ قالا بەرەدى», دەپ اياقتايدى ماقالاسىن ەلباسى. ءيا, بۇل − تاريحي شىندىق, زامان تالابى.
قۋانىش ايتاحانوۆ,
پارلامەنت سەناتىنىڭ دەپۋتاتى
