وسىعان وراي وسكەمەندەگى ا.پۋشكين اتىنداعى وبلىستىق كىتاپحانادا «الاش تۋى استىندا كۇن سونگەنشە سونبەيمىز» اتتى مادەني شارا ءوتتى. شارا بارىسىندا سارسەن امانجولوۆ, بالامەر ساحاريەۆ, بوشاي كىتاپباەۆ, قۇماش نۇرعاليەۆ, ورالحان ءبوكەي, الىبەك اسقاروۆ, ديداحمەت ءاشىمحانوۆ سىندى ەسىمدەرى ەلگە بەلگىلى تۇلعالاردى تۇلەتكەن مەكتەپتە ءار جىلدارى ساباق بەرگەن مۇعالىمدەر مەن ءتالىم العان شاكىرتتەر ەستەلىكتەر ايتتى.
– شىڭعىستاي مەكتەبىندە مىقتى ءداستۇر بار. وسى ءبىلىم ورداسىنان مەكتەپ بىتىرگەندەر اراسىنان قالام ۇستاپ, جازۋشىلىققا بەت بۇرعاندار كوپ. نەگە؟ بىرەۋلەر ايتادى: «جومارت نۇرعاليەۆ دەگەن ادەبيەتشى ۇستازىمىز بولدى. سول كىسىنىڭ مىقتىلىعىنان», دەپ. ول كىسىنىڭ مىقتىلىعىنا كۇمانىمىز جوق. بىراق ويلاپ وتىرسام, سوناۋ 1914 جىلدارى بۇل مەكتەپكە سۇلتانماحمۇتتىڭ كەلۋىمەن ارادا ءبىر ساباقتاستىق, بايلانىس بار سياقتى. كەيىن قازاق ادەبي سىنىنا بالامەردىڭ شىعۋى, سودان سوڭ ورالحاننىڭ كەلۋى, ودان كەيىنگى الىبەك, ديداحمەتتەردىڭ ادەبيەتكە تىڭنان تۇرەن سالۋى, وسىلاردىڭ اراسىندا ءبىر بەرىك رۋحاني بايلانىس بار, – دەدى كەزدەسۋدە ءسوز العان جازۋشى, وسى مەكتەپتىڭ تۇلەگى الىبەك قاڭتارباەۆ.
وسى مەكتەپتە وقىعان ەربول بايانعازين كەڭەس وداعىندا «كسرو حالىق مۇعالىمى» اتاعىن 11 ادامنىڭ العانىن, ونىڭ ۇشەۋى ەلىمىزدەن, ۇشەۋدىڭ ءبىرى وسى مەكتەپ تۇلەگى قۇماش نۇرعاليەۆ ەكەنىن, بۇل شاڭىراقتى تامامداعان تۇلەكتەر اراسىنان 27 جازۋشى شىققانىن ايتىپ, كىتاپحاناعا ءوزىنىڭ شىڭعىستاي اۋىلى تۋرالى جازعان كىتابىن تارتۋ ەتتى.
ازامات قاسىم,
«ەگەمەن قازاقستان»
وسكەمەن
