ء"اربىر حالىقتىڭ, ءاربىر وركەنيەتتىڭ بارشاعا ورتاق قاسيەتتى جەرلەرى بولادى, ونى سول حالىقتىڭ ءاربىر ازاماتى بىلەدى. بۇل – رۋحاني ءداستۇردىڭ باستى نەگىزدەرىنىڭ ءبىرى. ءبىز – ۇلان-عايىر جەرى مەن اسا باي رۋحاني تاريحى بار ەلمىز. ۇلى دالانىڭ كوز جەتكىزگىسىز كەڭ-بايتاق اۋماعى تاريحتا ءتۇرلى ءرول اتقارعان. بىراق, وسىناۋ رۋحاني گەوگرافيالىق بەلدەۋدى مەكەن ەتكەن حالىقتىڭ توننىڭ ىشكى باۋىنداي بايلانىسى ەشقاشان ۇزىلمەگەن. ءبىز تاريحىمىزدا وسىناۋ كوركەم, رۋحاني, قاستەرلى جەرلەرىمىزدىڭ ءبىرتۇتاس جەلىسىن بۇرىن-سوڭدى جاساعان ەمەسپىز. ماسەلە ەلىمىزدەگى ەسكەرتكىشتەردى, عيماراتتار مەن كونە قالالاردى قالپىنا كەلتىرۋدە تۇرعان جوق", دەدى ەلباسى.
ونىڭ ايتۋىنشا, يدەيانىڭ تۇپكى توركىنى ۇلىتاۋ تورىندەگى جادىگەرلەر كەشەنىن, قوجا احمەت ياساۋي ماۆزولەيىن, تارازدىڭ ەجەلگى ەسكەرتكىشتەرىن, بەكەت اتا كەسەنەسىن, التايداعى كونە قورىمدار مەن جەتىسۋدىڭ كيەلى مەكەندەرىن جانە باسقا دا جەرلەردى ءوزارا ساباقتاستىرا وتىرىپ, ۇلت جادىندا ءبىرتۇتاس كەشەن رەتىندە ورنىقتىرۋدى مەڭزەيدى.
"مۇنىڭ ءبارى تۇتاسا كەلگەندە حالقىمىزدىڭ ۇلتتىق بىرەگەيلىگىنىڭ مىزعىماس نەگىزىن قۇرايدى. ءبىز جات يدەولوگيالاردىڭ اسەرى تۋرالى ايتقاندا, ولاردىڭ ارتىندا باسقا حالىقتاردىڭ بەلگىلى ءبىر قۇندىلىقتارى مەن مادەني سيمۆولدارى تۇرعانىن ەستە ۇستاۋىمىز كەرەك. تيىسىنشە, ولارعا ءوزىمىزدىڭ ۇلتتىق قۇندىلىقتارىمىز ارقىلى عانا توتەپ بەرە الامىز. قازاقستاننىڭ قاسيەتتى جەرلەرىنىڭ مادەني-گەوگرافيالىق بەلدەۋى – نەشە عاسىر وتسە دە ءبىزدى كەز كەلگەن رۋحاني جۇتاڭدىقتان ساقتاپ, امان الىپ شىعاتىن سيمۆولدىق قالقانىمىز ءارى ۇلتتىق ماقتانىشىمىزدىڭ قاينار بۇلاعى. ول – ۇلتتىق بىرەگەيلىك نەگىزدەرىنىڭ باستى ەلەمەنتتەرىنىڭ ءبىرى. سوندىقتان, مىڭجىلدىق تاريحىمىزدا ءبىز العاش رەت وسىنداي اۋقىمدى جوبانى جاساپ, جۇزەگە اسىرۋعا ءتيىسپىز", دەدى نۇرسۇلتان نازارباەۆ.
وسى ماسەلەلەردى ايتا كەلە پرەزيدەنت ۇكىمەتكە جۇرتشىلىقپەن اقىلداسا وتىرىپ, جوبانى ازىرلەۋدى تاپسىردى. ونىڭ ايتۋىنشا, جوبا ءۇش نەگىزگى ماسەلەنى قامتۋى كەرەك. ناقتىراق ايتقاندا:
1. اتالعان «مادەني-گەوگرافيالىق بەلدەۋدىڭ» ءرولى مەن وعان ەنەتىن ورىندار تۋرالى ءاربىر قازاقستاندىق ءبىلۋى ءۇشىن وقۋ-اعارتۋ دايىندىعىن جۇرگىزۋ قاجەت;
2. باق وسىدان تۋىندايتىن ۇلتتىق اقپاراتتىق جوبالارمەن جۇيەلى تۇردە, مىقتاپ اينالىسۋى كەرەك;
3. ىشكى جانە سىرتقى مادەني تۋريزم حالقىمىزدىڭ وسى قاستەرلى مۇرالارىنا سۇيەنۋگە ءتيىس.
