ەكى كۇنگە جوسپارلانعان ايتۋلى شارا كورنەكتى عالىمنىڭ ەلەۋلى ەڭبەگىن, عىلىم سالاسىنداعى جاڭا باعىتتار مەن شىعارماشىل جاس عالىمداردىڭ ىزدەنىستەرىن پاش ەتۋگە باعىتتالدى. 39 جاسىندا ىرگەلى وقۋ وشاعىنا جەتەكشىلىك ەتىپ, ەل تاريحىنداعى ەڭ جاس رەكتور رەتىندە تانىلعان قايراتكەردىڭ توم-توم كىتاپقا ارقاۋ بولاتىن عىلىمي ىزدەنىستەرى, زەرتتەپ-زەردەلەگەن ۇشان-تەڭىز ەڭبەكتەرى مەن زەرتتەۋ جۇمىستارى ءوز سالاسىنداعى تاپتىرماس قۇندى ادەبيەتكە اينالدى. ابدىقاپپار ءاشىموۆ – رەسپۋبليكاعا ەڭبەگى سىڭگەن كورنەكتى عىلىم قايراتكەرى, تەحنيكا عىلىمدارىنىڭ دوكتورى, قازاقستان رەسپۋبليكاسى عىلىم اكادەمياسىنىڭ تولىق مۇشەسى, پروفەسسور, ءبىلىم جانە عىلىم مينيسترلىگىنە قاراستى اقپاراتتىق جانە باسقارۋ ماسەلەلەرى ينستيتۋتىنىڭ جۇيەلى اناليز جانە باسقارۋ زەرتحاناسىنىڭ مەڭگەرۋشىسى. ەلىمىزدىڭ عىلىم سالاسىنىڭ كوشباسىندا جۇرگەن تالاي-تالاي ازاماتتاردى قاناتتاندىرعان ۇستاز. عىلىم جولىنداعى جەتىستىكتەرى, شاكىرت تاربيەلەۋدەگى ەرەكشە ىجداقاتتىلىعى ارىپتەستەرى تاراپىنان كەڭ كولەمدە ايتىلدى.
«ابدىقاپپار اعا وسى ۋاقىتقا دەيىن عىلىم جولىندا شاكىرت تاربيەلەۋدەن قول ۇزبەي كەلەدى. عىلىمعا كوزقاراسى وتە جوعارعى دەڭگەيدە. ۋنيۆەرسيتەتىمىزدى باسقارعان جىلدارى دا قارقىندى ەڭبەك ەتتى. ەلۋدەن اسا عىلىم كانديداتتارىن, جيىرما شاقتى عىلىم دوكتورلارىن دايىنداپ شىعاردى. شاكىرتتەرى ەلىمىزگە عانا ەمەس, سىرت مەملەكەتتەرگە دە تانىمال عالىمدار. ول كىسىنىڭ وقۋ وردامىزعا عانا ەمەس, ەلىمىزدىڭ عىلىم سالاسىنا ەتكەن ەڭبەگىن ەسكەرە كەلە وسىنداي شارا ۇيىمداستىرىپ وتىرمىز. شارانىڭ نەگىزگى ماقساتى − ايتۋلى عالىمعا قۇرمەت كورسەتۋ, جاس عالىمدارىمىزدى قاناتتاندىرۋ. بۇگىنگى كونفەرەنتسيا ءۇش سەكتسيادان تۇرادى. العاشقى باعىت − پارامەترلى رەتتەۋ, ەكىنشى سەكتسيا − اعامىزدىڭ ماكروەكونوميكاعا قاتىستى عىلىمي جۇمىسىنا نەگىزدەلدى. ال, ءۇشىنشى باعىت − ينستيتۋتىمىزدىڭ نەگىزىن قالاۋشى اقپاراتتىق تەحنولوگيالارمەن ماتەماتيكالىق مودەلدەۋ سەكتسياسى. وسى ءۇش سەكتسيا بويىنشا كوپتەگەن جۇمىستار قابىلداندى. پولشا, ۋكراينا, كانادا, جاپونيا, رەسەي, ءوزبەكستاننان كەلگەن عالىمدار قاتىسىپ عىلىمي جاڭالىقتارىمەن ءبولىسۋدە – دەيدى ابدىقاپپار ءاشىموۆ نەگىزىن قالاعان «اقپاراتتىق تەحنولوگيالار» كافەدراسىنىڭ مەڭگەرۋشىسى نۇربەك ساپارحودجاەۆ.
«كىشكەنتايىنان تاعدىردىڭ تاۋقىمەتىن تارتىپ, اتا-اناسىنان ەرتە ايىرىلىپ, بۋىنى بەكىمەگەن بالاڭ شاعىنان اۋىر ەڭبەككە ارالاسقان ابدىقاپپار, ءبىر ۇلكەن رومانعا ارقاۋ بولاتىن ازامات. ءوز ءبىلىم-بىلىگىمەن, ادال ەڭبەگىمەن وسى ابىرويعا جەتتى. ۇنەمى ىزدەنىس ۇستىندە جۇرەدى. ءبىر ءىستى باستاسا وعان جان-تانىمەن بەرىلىپ, سوڭىنا دەيىن جەتكىزبەي تىنبايدى. ادالدىق پەن جاۋاپكەرشىلىكتى ۇستانىپ كەلەدى. وتباسىنا دا ۋاقىت تابا بىلەدى», – دەيدى عالىمنىڭ جارى باقىتجان ايساقوۆا. سونداي-اق, كونفەرەنتسيا بارىسىندا قازاقستاندىق جانە شەتەلدىك جەتەكشى ۋنيۆەرسيتەتتەردىڭ اكادەميكتەرى مەن پروفەسسورلارى جاس عالىمداردىڭ عىلىمي-زەرتتەۋ جۇمىستارىمەن تانىستى. شارانىڭ قورىتىندى كۇنى كورنەكتى-گەولوگ عالىم قانىش ساتباەۆتىڭ تۋعان كۇنىنە تۇسپا-تۇس كەلۋىنە وراي جيىنعا قاتىسۋشى بارلىق قوناقتار عالىمنىڭ ەسكەرتكىشىنە ءداستۇرلى تۇردە گۇل شوقتارىن قويدى.
ارمان وكتيابر,
«ەگەمەن قازاقستان»
الماتى
