حالىقارالىق كەلىسىمگە سايكەس, ىشكى اسكەردىڭ, ياعني ۇلتتىق ۇلاننىڭ اسكەري قىزمەتشىلەرى 1993 جىلدىڭ ماۋسىمىنان 1999 جىلدىڭ تامىزىنا دەيىن تاجىك-اۋعان شەكاراسىن كۇزەتۋگە قاتىستى. وسى جىلدارى كەزەكتى اۋىسىم ءتۇرى بويىنشا 20 قۇراما روتا قۇرىلىپ, 2 مىڭنان استام سارباز بەن ساردار جاۋىنگەرلىك تاپسىرمانى ورىندادى.
پامير تاۋىنداعى پشيحاۆر شاتقالىندا 1995 جىلدىڭ 7 ءساۋىرىندە بولعان قارۋلى قاقتىعىس كەزىندە ىشكى اسكەردىڭ 17 جاۋىنگەرى ەرلىكپەن قازا تاۋىپ, 33-ءى جارالانعان ەدى. قازا بولعان ساربازداردىڭ ەسىمدەرىنە كوشە, مەكتەپ اتاۋلارى جەر-جەرلەردە بەرىلدى. اسكەري بولىمشەلەردە ەسكەرتكىشتەر اشىلدى. ماسەلەن, ەستەلىك اللەياسى ۇلتتىق ۇلان باس قولباسشىسىنىڭ باستاماسىمەن جانە استانا قالاسى اكىمىنىڭ قولداۋىمەن 2009 جىلى ءساۋىر ايىندا اشىلعان. ال 2014 جىلى وسى جەردە ەسكەرتكىش ورناتىلدى. ەندى مىنە, ءدال وسى ەسكەرتكىشكە ۇلتتىق ۇلان باس قولباسشىلىعىنىڭ گەنەرالدارى مەن ارداگەرلەرى, جەكە قۇرامى, پارلامەنت جانە استانا قالاسى ءماسليحاتىنىڭ دەپۋتاتتارى, استانا قالاسى اكىمدىگى باسشىلىعى, ۇقك شەكارا قىزمەتىنىڭ وكىلدەرى, قازا بولعان جاۋىنگەرلەردىڭ تۋىستارى, ينتەرناتسيوناليست-ارداگەرلەر كەلىپ, ەسىل ەرلەردى ەستەرىنە الدى.
ۇلتتىق ۇلان باس قولباسشىسىنىڭ ورىنباسارى, گەنەرال-مايور البەرت ماتكاريموۆ شارا بارىسىندا قازا بولعان جاۋىنگەرلەردىڭ ەرەن ەرلىكتەرى تۋرالى ءسوز ەتتى.
– قىرشىنىنان قيىلعان 17 تاعدىردى قايتارا المايمىز. بىراق ولاردىڭ ەرلىگىن ءار كەزدە ەسكە ساقتاۋىمىز كەرەك. ولار – وتان ءۇشىن ءوز ءومىرىن قيعان ەرجۇرەك ەرلەر. قىزمەت بارىسىندا قازا بولعان اسكەريلەردىڭ وتباسىلارىنا كومەك كورسەتۋ ىشكى ىستەر ءمينيسترىنىڭ باستاماسىمەن قولعا الىندى. قازا بولعان 17 جاۋىنگەرىمىزدىڭ دە وتباسىلارىنا ۇنەمى كومەك كورسەتىلەتىن بولادى, – دەدى ول.
سونداي-اق, جيىندا قازا بولعان جاۋىنگەرلەردىڭ جاقىندارى مەن قارۋلاستارى مارقۇمدار تۋرالى ەستەلىكتەر ايتتى. سودان كەيىن, جينالعان قوناقتار قازا تاپقان جاۋىنگەرلەردى ءبىر مينۋت ۇنسىزدىكپەن ەسكە الدى. شارانىڭ رەسمي ءبولىمى بىتكەن سوڭ, جۇرتشىلىق ەستەلىك اللەياسىندا 17 جاۋىنگەرگە ارنالعان ەسكەرتكىشكە گۇل شوقتارىن قويدى.
