«Smart Start» جوباسىن ىسكە قوسۋ جانە جوبا تالىمگەرلەرىمەن تانىسۋ سالتاناتى «زەردە» ۇلتتىق ينفوكوممۋنيكاتسيالىق حولدينگىندە ءوتتى. مەملەكەتتىك ورگاندارداعى ساۋلەت بلوگى مەن جوبالىق وفيس قىزمەتى تۋرالى بايانداعان حولدينگتىڭ باسقارۋشى ديرەكتورى دينارا ششەگلوۆا ءوز تاجىريبەسىمەن ءبولىستى.
الماتى, قاراعاندى, اقتوبە, استانا, سەمەي قالالارىندا ينفوكوممۋنيكاتسيالىق تەحنولوگيالار ماماندىعىندا وقىپ جاتقان ستۋدەنتتەر مەن ءبىتىرۋشىلەر جوباعا قاتىسۋ ءۇشىن ارنايى ىرىكتەۋدەن وتكەن. ءتاجىريبەدەن وتۋگە كەلگەندەردىڭ ءبىرى – ءال-فارابي اتىنداعى قازاق ۇلتتىق ۋنيۆەرسيتەتىنىڭ اقپاراتتىق جۇيەلەر ماگيسترى جاقسىلىق دۇيسەنبەك ۇلى. ول جوباعا قاتىسۋ ءۇشىن ينفوكوممۋنيكاتسيالىق تەحنولوگيالاردى دامىتۋ تاقىرىبىندا ەسسە جازعانىن ايتادى.
"قازىر تۇتىنۋ زاتتارىنا ينتەرنەت ارقىلى تاپسىرىس بەرۋ, الەۋمەتتىك, مەديتسينالىق قىزمەتتەردى ونلاين ارقىلى اتقارۋدا ينفوكوممۋنيكاتسيالىق تەحنولوگيانىڭ ماڭىزى وتە جوعارى. ۇلتتىق كومپانيالاردا ءتاجىريبەدەن ءوتۋ ارقىلى جوبالىق وفيس قىزمەتى تۋرالى كوپ نارسەمەن تانىسۋعا بولادى", دەيدى ول.
اتالعان جوباعا ىرىكتەۋ بيىل ناۋرىز ايىندا باستالعان. «زەردە» ۇلتتىق ينفوكوممۋنيكاتسيالىق حولدينگى» باسقارما توراعاسىنىڭ ورىنباسارى جارقىنبەك ازاماتوۆتىڭ ايتۋىنشا, وندىرىستىك تاجىريبەدەن وتۋگە ىنتالى ستۋدەنتتەردىڭ جاس ەرەكشەلىگىنە شەكتەۋ قويىلعان جوق. بولاشاقتا جوبا جالعاسۋى مۇمكىن.
«ازىرگە 10 ستۋدەنتتى عانا تاڭداپ الدىق. جوبانى جالعاستىرۋ نەمەسە توقتاتۋ ءىسىن الداعى ۋاقىتتا ناتيجەگە قاراي ويلاستىراتىن بولامىز. قازىر جۇمىس بەرۋشىلەر ستۋدەنتتەردەن ءتاجىريبە تالاپ ەتەدى. وقۋدى ەندى بىتىرگەن ستۋدەنتتە تاجىريبە قايدان بولسىن؟ وسى ولقىلىقتىڭ ورنىن تولتىرۋ ماقساتىندا وسىنداي ءبىر جوبانى قولعا الدىق», دەيدى باسقارما توراعاسىنىڭ ورىنباسارى.
ايا ءومىرتاي,
«ەگەمەن قازاقستان»
