حالىقتى جۇمىسپەن قامتۋ مەن وتاندىق قۇرىلىس ماتەريالدارىن وندىرۋشىلەردى ىنتالاندىرۋ ماقساتىندا اتالعان باعدارلاما اياسىندا سوڭعى ەكى جىل ىشىندە اۆتوجول جوبالارىن ورىنداۋعا 616 ملرد تەڭگە ءبولىنىپتى. ونىڭ 329 ملرد تەڭگەسى ۇلتتىق قور ەسەبىنەن قارالعان. ال مينيستر كەلتىرگەن دەرەكتەرگە سۇيەنسەك, بولىنگەن قاراجات بۇگىندە تولىق يگەرىلگەن.
«ناقتىلاي تۇسەتىن بولساق, بۇل قارجىعا رەسپۋبليكا اۋماعى بويىنشا 9 جوبا ىسكە اسىرىلدى: «باتىس ەۋروپا – باتىس قىتاي», «ورتالىق – وڭتۇستىك», «ورتالىق – شىعىس», «بەينەۋ – اقتاۋ», «الماتى – وسكەمەن», «استانا –پەتروپاۆل», «جەزقازعان – پەتروپاۆل», «اقتوبە – اتىراۋ» جانە «ورال – كامەنكا» جولدارىندا جۇمىس قىزۋ ءجۇرىپ, جول قۇرىلىسىمەن قازاقستاننىڭ 12 ايماعىنداعى 2 مىڭ شاقىرىم قامتىلدى. جوبالارعا ەلىمىزدىڭ 75 مىڭ ادامى قاتىستىرىلىپ, ماتەريالداردىڭ 90%-ىن وتاندىق ءوندىرۋشىلەر دايىندادى. وسى اتالعان شارۋالاردىڭ بارلىعى «100 ناقتى قادام» ۇلت جوسپارىنىڭ 92-قادامى شەڭبەرىندە جۇزەگە اسىرىلدى», – دەدى ج.قاسىمبەك.
قازىرگى ۋاقىتتا مينيسترلىك پەن وبلىستىق اكىمدىكتەر ءبىرلەسە وتىرىپ, رەسپۋبليكالىق ماڭىزى بار اۆتوجولداردا جول قىزمەتىنىڭ وبەكتىلەرىن جاڭارتۋ ءجونىندە جۇمىستار جۇرگىزۋدە ەكەن. مۇنىڭ سىرتىندا, «نۇرلى جول» اياسىندا 2020 جىلعا دەيىن نەگىزگى حالىقارالىق دالىزدەردە ۇلتتىق ستاندارتقا ساي كەلەتىن 260 قىزمەت نىساندارىن دامىتۋ كوزدەلۋدە. سونىمەن قاتار, باعدارلاما اياسىندا ىسكە اسىرىلىپ جاتقان ماڭىزى جوعارى جوبالاردىڭ ءبىرى – استاناداعى جاڭا تەمىر جول ۆوكزالىنىڭ قۇرىلىسى بولدى. ءبۇگىندە قۇرىلىس نىسانىنىڭ ارلەۋ جۇمىستارى اياقتالىپ كەلەدى.
«جاڭا ۆوكزال مامىر ايىندا پايدالانۋعا بەرىلەدى دەپ جوسپارلانۋدا. جالپى العاندا, جاڭا ۆوكزالدىڭ وتكىزۋ قابىلەتى تاۋلىگىنە 35 مىڭ جولاۋشىنى قۇرايدى. ال قولدانىستاعى ۆوكزالمەن قوسا العاندا, تاۋلىكتىك كورسەتكىش 48,8 مىڭ جولاۋشىنى قۇرايتىن بولادى. بۇل استانالىق جولاۋشىلار اعىنىنا, ونىڭ ىشىندە, حالىقارالىق كورمەنى وتكىزۋ كەزىندە دە, ساپالى قىزمەت كورسەتۋدى تولىعىمەن قامتاماسىز ەتۋگە مۇمكىندىك بەرەدى», – دەگەن مينيستر وسىدان 2 جىل بۇرىن استانا قالاسىنىڭ جاڭا تەرمينالىن سالۋ جانە اۋەجايدىڭ ۇشۋ-قونۋ جولاعىن رەكونسترۋكتسيالاۋ جوباسى باستالعانىنا دا توقتالىپ ءوتتى.
«جوبا بويىنشا جاڭا جولاۋشىلار تەرمينالىنىڭ, تۇراق ورىندارىنىڭ قۇرىلىسى, ينجەنەرلىك ينفراقۇرىلىم, پەرروندى رەكونسترۋكتسيالاۋ جانە اۋماقتى اباتتاندىرۋ كوزدەلگەن. قۇرىلىس جۇمىستارىن بيىلعى جىلعى 15 مامىردا اياقتاۋ مەجەلەنگەن. قورىتا كەلە, بۇل باعدارلامانىڭ قوسىمشا جۇمىس ورىندارىن اشۋعا, قۇرىلىس ماتەريالدارى, تۋريزم, وڭدەۋشى ونەركاسىپ سەكىلدى ەنشىلەس سالالاردى دامىتۋعا مۇمكىندىك بەرەتىن قۋاتى بار ەكەندىگىن اتاپ ءوتۋىمىز كەرەك», – دەدى ج.قاسىمبەك.
وتىرىستا قوسىمشا بايانداما جاساعان ءماجىلىستىڭ ەكونوميكالىق رەفورما جانە ءوڭىرلىك دامۋ كوميتەتىنىڭ توراعاسى نۇرتاي سابيليانوۆ ينفراقۇرىلىمدى دامىتۋدىڭ «نۇرلى جول» باعدارلاماسى اياسىنداعى جەتى باعىتىن ىسكە اسىرۋ ءۇشىن 2015-2019 جىلدارعا 5 ترلن 300 ملرد تەڭگە ءبولۋ كوزدەلگەنىن العا تارتىپ, ونىڭ ىشىندە تەك اۆتوموبيل ماگيسترالدارىن دامىتۋعا 2 ترلن 400 ملرد تەڭگە جۇمسالاتىنىن العا تارتتى.
«ەگەر جاڭا جوبالارعا بايلانىستى بۇل قاراجات كوبەيەتىندىگىن ەسەپكە الساق, ءتيىمدى كولىك-لوگيستيكالىق ينفراقۇرىلىم قۇرۋ باعدارلامانىڭ ماڭىزدى باعىتتارىنىڭ ءبىرى ەكەنىنە كوز جەتە تۇسەدى», – دەدى ن.سابيليانوۆ.
سونداي-اق, دەپۋتات ءوز بايانداماسىندا ەلباسى جولداۋىندا ايتىلعان تاپسىرمالاردى ءجۇزەگە اسىرۋ بارىسىندا كەيبىر جەكەلەگەن ماسەلەلەر بار ەكەندىگىن دە كولدەنەڭ تارتتى. «نۇرلى جول» مەملەكەتتىك باعدارلاماسىندا ۇزىندىعى 7 مىڭ شاقىرىمنان اساتىن 11 اۆتوجول سالۋ كوزدەلگەن بولسا, ماڭىزدى كولىك جولدارىن سالۋ كەزىندە جوبالىق شەشىمدەرگە سالعىرت قاراۋ سالدارىنان جول قاۋىپسىزدىگىنە نۇقسان كەلۋدە. مىسالى, بۇقارالىق اقپارات قۇرالدارىندا «قاپشاعاي – بالپىق بي» اۆتوجولىنىڭ اياقتالعان ۋچاسكەسىندە مۇقىر وزەنى ارقىلى وتەتىن جاڭا كوپىردىڭ تۇسىندا العاباس اۋىلىنىڭ ماڭىندا جولدىڭ ويىلىپ كەتكەنى تۋرالى اقپارات بولدى. بۇدان باسقا, اياقتالعان ءبىر عانا «باتىس ەۋروپا – باتىس قىتاي» كولىك-ترانزيت ءدالىزى جوباسى پايدالانۋدىڭ العاشقى جىلىنىڭ وزىندە-اق سۋ اعىنىنا توتەپ بەرە الماي وتىر. جۋىردا جامبىل وبلىسىندا سۋ باسۋ قاۋپى سالدارىنان 11 شاقىرىم جول ۋاقىتشا جابىلدى. «ورتالىق – شىعىس», «استانا – وسكەمەن» ماڭىزدى باعىتتاردىڭ بىرىندە مەردىگەرلەرمەن بولىپ جاتقان داۋلاردىڭ سالدارىنان كونكۋرستىق راسىمدەر ۇزاققا سوزىلۋدا. وسىنداي جاعدايلارعا بايلانىستى مينيسترلىك پەن قۇقىق قورعاۋ ورگاندارى جۇرتشىلىقتى, تاۋەلسىز ساراپشىلاردى تارتا وتىرىپ, پايدالانۋعا بەرىلەتىن اۆتوموبيل جولدارىنىڭ ساپاسى بويىنشا اۋديت پەن رەۆيزيا جۇرگىزۋى قاجەتتىگى تۋىنداۋدا», – دەدى دەپۋتات.
ءوز كەزەگىندە جەڭىس قاسىمبەك ايتىلعان سىن, ەسكەرتپەلەردىڭ بارلىعى ورىندى ەكەندىگىن اتاپ ءوتىپ, ولقىلىقتاردى قالپىنا كەلتىرۋدە بىرلەسە ەڭبەك ەتۋگە شاقىردى.
وسىدان كەيىن جالعاسىن تاپقان تاقىرىپتى تالقىلاۋ بارىسىندا ءتيىستى ورگانداردىڭ وكىلدەرى حالىق قالاۋلىلارىنىڭ ساۋالدارىنا جاۋاپ بەردى. ال جارىسسوزدە «Kazlogistik» قازاقستاننىڭ كولىك وداعىنىڭ باس ديرەكتورى قانات الماعانبەتوۆ پەن «BI Group Construction» اكتسيونەرلىك قوعامىنىڭ باسقارما ءتوراعاسى ارمان جاكەنوۆ ءسوز الدى. سونداي-اق, ۇكىمەت ساعاتى شەڭبەرىندە ءماجىلىستىڭ جالپى وتىرىس زالىنىڭ فويەسىندە كورمە ۇيىمداستىرىلعانىن دا ايتا كەتەيىك.
نۇرلىبەك دوسىباي,
«ەگەمەن قازاقستان»
