مەملەكەت باسشىسى ن.نازارباەۆتىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى قازاقستان حالقىنا جولداۋىنداعى اگروونەركاسىپ كەشەنىنە شەتەلدەن ينۆەستيتسيا تارتۋ بويىنشا جۇكتەگەن تاپسىرماسىن جۇزەگە اسىرۋدى جانە ەكىجاقتى ءتيىمدى كەلىسىمدەرگە قول جەتكىزۋدى ماقسات ەتكەن توپ قۇرامىندا مەملەكەتتىك ورگاندار مەن «اتامەكەن» ۇلتتىق كاسىپكەرلەر پالاتاسى, ۇلتتىق اگرارلىق عىلىمي-ءبىلىم بەرۋ ورتالىعى, «قازاقستان ينجينيرينگ», «ازىق-ت ۇلىك كەلىسىمشارت كورپوراتسياسى» ۇلتتىق كومپانيالارى جانە «اگروتەحنولوگيا ترانسفەرتى جانە كوممەرتسياليزاتسيا ورتالىعى» جشس وكىلدەرى بار.
ساپار اياسىندا قازاقستاندىقتار يزرايل مەملەكەتىنىڭ اۋىل شارۋاشىلىعى جانە اۋىلدىق اۋماقتاردى دامىتۋ ءمينيسترى, كنەسسەتتەگى «ەۆرەي ءۇيى» پارتياسىنىڭ دەپۋتاتى ۋري اريەلمەن كەزدەستى. باسقوسۋدا ەكى ەل اراسىنداعى كەلىسىمگە سايكەس, 2017-2018 جىلدارعا ارنالعان اۋىل شارۋاشىلىعى سالاسىندا ىنتىماقتاسۋ بويىنشا جول كارتاسىنا قول قويىلدى. بۇدان بولەك, قازاقستان اۋماعىندا كوممەرتسيالىق نەگىزدەگى دەمونستراتسيالىق فەرما قۇرۋدى كوزدەيتىن دەكلاراتسيا قابىلدادى. ونىڭ كەشەنىندە اۋىل شارۋاشىلىعىنىڭ ءار الۋان باعىتتارىنداعى تەحنولوگيالاردى تانىستىرۋ جوسپارلانعان.
ەكى تاراپ قازاقستان ءونىمدەرىن يزرايلگە ەكسپورتتاۋ ءمۇمكىندىكتەرىن دە تالقىلادى. ماسەلەن, وندا قوي ەتى, جۇمىرتقا جانە وزگە دە ونىمدەرگە قاجەتتىلىك جوعارى. كەلىسىمنىڭ ەندىگى كەزەڭى ەكسپورتتالاتىن ازىق-ت ۇلىك تاۋارلارىنا قاتىستى ۆەتەريناريالىق تالاپتار مەن ستاندارتتار ماسەلەلەرىنە تىرەلىپ تۇر.
دەلەگاتسيا يزرايلدىك اگروبيزنەس وكىلدەرىمەن دوڭگەلەك ۇستەل وتىرىسىندا جۇزدەسىپ, ينۆەستيتسيا تارتۋ, وتاندىق ونىمدەردى تاسىمالداۋ جانە يننوۆاتسيالىق اگروتەحنولوگيالار ترانسفەرتى تاقىرىپتارىن قاۋزادى. وعان جيىرما شاقتى كومپانيا قاتىسىپ, وي-پىكىرلەرى مەن ۇسىنىستارىن ورتاعا سالدى.
جۇمىس ساپارىمەن جۇرگەن توپ مۇشەلەرى اۋىل شارۋاشىلىعى سالاسىنداعى جاڭا تەحنولوگيالارمەن اينالىساتىن «Volcani center» عىلىمي-زەرتتەۋ ينستيتۋتىندا بولدى. مۇندا بىرىككەن زەرتتەۋلەر مەن جاس مامانداردى دايارلاۋ ماسەلەلەرى كەڭىنەن اڭگىمەلەنگەنىن ايتۋ كەرەك. سودان كەيىن قازاقستاندىقتاردى ەكسپورتتالاتىن ونىمدەر ساپاسىن ساقتاۋدىڭ يزرايلدىك جولى قاتتى قىزىقتىردى. دەلەگاتسيا ساپارى «Gevat-Haviva Rezervoir» سۋ رەسۋرستارىن ۇنەمدەۋ جانە باسقارۋ كومپانياسىنىڭ جۇمىسىمەن تانىسۋمەن جالعاستى. سۋ تازارتۋمەن اينالىساتىن قۇرىلىم ءونىمىن جەرگىلىكتى اۋىز سۋ رەتىندە پايدالانادى. ال ونىڭ ءبىر تەكشەمەترىنىڭ قۇنى 94 تەڭگەنىڭ شاماسىندا باعالانادى.
قازاقستاندىقتار كووپەراتسيا قۇرامىنا كىرەتىن وتباسىلىق ءسۇت فەرماسى مەن «موشاۆ نيتسانەي وز» ميني ىرىمشىك قايناتۋ ورتالىعىن ارالادى. بۇل شارۋاشىلىقتار تولىقتاي اۆتوماتتاندىرىلعان. وندا جىلىنا 1200 توننا ءسۇت بەرەتىن 100 ساۋىن سيىر بار. كۇندەلىكتى ءسۇتتىڭ 300-350 ءليترى ءىرىمشىك قايناتۋعا جۇمسالادى. قالعان بولىگى بىرىڭعاي يزرايل ءسۇت كونتسەرنىنە جەتكىزىلەدى ەكەن. ايتا كەتەرلىگى, فەرما ىرىمشىك ءازىرلەۋگە باۋلۋ سىنىپتارىن اشقان. ونىمدەرى دۇكەن سورەلەرىنەن دە تابىلادى. اسقار مىرزاحمەتوۆ اتالعان تاجىريبەنى ەلىمىزدەگى اۋىل شارۋاشىلىعى كووپەراتيۆتەرىن قۇرۋ بارىسىندا پايدالانۋ كەرەكتىگىن اتاپ ءوتتى. يزرايلدە كووپەراتيۆتەر فەرمەرلەردىڭ ءوز باستامالارى بويىنشا قۇرىلادى جانە مەملەكەت تاراپىنان ەشقانداي قولداۋ كورمەيدى ەكەن.
ساپار اياسىندا توپ مۇشەلەرى جىلىجاي مەن تامشىلاتىپ سۋعارۋ زاۋىتىنا بارىپ, «Netafim» كومپانياسى باسشىلىعىمەن كەلىسسوزدەر جۇرگىزدى.
اسحات رايقۇل,
«ەگەمەن قازاقستان»
