ايتا كەتەرلىگى كانادادا وتكەن بوكس كەشىندە باستى ايقاس باتىر جۇكەمباەۆ پەن مەكسيكالىق كوسمە ريۆەرا اراسىندا ءوتتى.
«وسىعان دەيىن ارتۋر بەتەربيەۆكە دە تيتۋلدى ايقاس ۇيىمداستىرعانبىز. مەنەدجەر رەتىندە قاراماعىمداعى سپورتشىم بوكس كەشىندەگى باستى كەزدەسۋدى بۇعان دەيىن دە وتكىزگەن ەدىك. بىراق, باتىردىڭ جەڭىسى مەن ءۇشىن ارتۋردىكىنەن الدەقايدا ماڭىزدى بولدى.
باتىر – ەرەكشە ادام. ونى بوكسشى رەتىندە قاتتى سىيلايمىن. ابىلايحان ەكەۋىنە ءوزىمنىڭ بالام سەكىلدى قارايمىن. ولاردىڭ كەزەكتى جەڭىسىنە قاتتى قۋانامىن. قاراماعىڭداعى سپورتشىڭ جەڭىسكە جەتكەندەگى سەزىم مۇلدەم بولەك. بۇل ولاردىڭ تىنباي جاتتىققانىنىڭ ارقاسى. باتىر چەمپيوندىق بەلبەۋىمەن جاقىندا قازاقستانعا بارادى», – دەدى مەنەدجەر.
اننا رەۆا باتىر جۇكەمباەۆتىڭ الداعى جوسپارى تۋرالى دا وي ءبولىستى. ايتۋىنشا, بوكسشى جاقىن كۇندەرى قازاقستانعا قايتىپ ورالادى.
«ەندى ول دەمالىپ, ويىن باسقا نارسەگە بولگەنى ءجون. الداعى كەزدەسۋلەرىنە تىڭ كۇشپەن كەلۋى قاجەت. چەمپيوندىق بەلبەۋدى پسيحولوگيالىق تۇرعىدا جەڭۋ وتە قيىن. مۇندايعا بوكسشى ءاردايىم دايىن بولعانى ءجون. جاقىندا ول ءوز ەلىنە جول تارتادى.
بۇل جۇكەمباەۆتىڭ كاسىپقوي بوكستاعى العاشقى قادامى عانا. ونىڭ الار اسۋى ءالى الدا. مەنىڭ بۇل پىكىرىمدى بوكسشى ۆاسيلي جيروۆ تا قوستادى. ول قازاقستاندىق بوكسشىلاردىڭ شارشى الاڭداعى جولى ەندى باستالعانىن, بۇل جەڭىستەرى جاڭا بەلەستەردى باعىندىرۋىنا سەرپىلىس بەرۋى كەرەكتىگىن ايتتى. الداعى ۋاقىتتا باتىرعا دا, ابىلايحانعا دا تيتۋلدى جەكپە-جەك ۇيىمداستىرۋدى جوسپارلاپ ءجۇرمىز», – دەدى اننا رەۆا.
وسىعان دەيىن استانادا EXPO-2017 كورمەسى كەزىندە بوكس كەشى ۇيىمداستىرىلاتىنى حابارلانعان. بۇل كەشتە باتىر جۇكەمباەۆ پەن ابىلايحان قۇسايىنوۆ قاتىسۋى مۇمكىن بە؟ قوس بوكسشىنىڭ مەنەدجەرى ازىرگە ۇسىنىس تۇسپەگەنىن ايتتى.
«بىزگە بۇل تۋرالى ازىرگە ۇسىنىس كەلمەدى. ارينە, ونداي مۇمكىندىك بولسا, بوكسشىلارىمىز قاتىسۋى ءۇشىن قولىمىزدان كەلگەننىڭ ءبارىن جاسار ەدىك. باتىر دا, ابىلايحان دا بۇعان قۋانا-قۋانا كەلىسەتىنى انىق. ءوز ەلىندە, ءوز جانكۇيەرلەرىنىڭ الدىندا جۇدىرىقتاسقانعا نە جەتسىن! بىراق ونىڭ ءبارى الدىن الا تالقىلانىپ بارىپ شەشىلۋى ءتيىس. سەبەبى, بىزگە بوكسشىلارىمىزدىڭ دايىن كۇيدە بارعانى ماڭىزدىراق», – دەدى ول.
وسىعان دەيىن قوس بوكسشىنىڭ داۆيد لەمە مەن كەرتيس ستيۆەنس اراسىنداعى جەكپە-جەكتىڭ اندەركارتىندا جۇدىرىقتاساتىنى حابارلانعان ەدى. بىراق مەنەدجەردىڭ ايتۋىنشا الدارىندا ەكى تاڭداۋ تۇرىپتى. ءبىرى – چەمپيوندىق كەزدەسۋ وتكىزۋ, ەكىنشىسى – لەمە-ستيۆەنس كەشىندە شارشى الاڭعا شىعۋ.
«كوماندامەن وسى ماسەلەنى تالقىلاي كەلە مونرەالدا جەكپە-جەك ۇيىمداستىرۋدى ءجون كوردىك», – دەدى اننا رەۆا.
مەنەدجەردىڭ ايتۋىنشا, جىگىتتەر الەمنىڭ كەز كەلگەن جەرىندە شارشى الاڭعا شىعۋعا دايىن. باستى ماقسات – كارەرالارى ورگە ءجۇرىپ, دەڭگەيلەرىن ارتتىرۋ.
«باستى ماقساتىمىز – بوكسشىلارىمىزدىڭ ءجيى كەزدەسۋ وتكىزۋى. ءبىز كەز كەلگەن مەملەكەتتە جۇدىرىقتاسۋعا دايىنبىز. بىراق جىگىتتەر ءبىر قالىپتا تۇرىپ قالماي, ءاربىر جەكپە-جەگىندە دەڭگەيلەرىن ارتتىرۋى ءتيىس. ءبىزدى الدا ۇلكەن جۇمىستار كۇتىپ تۇر. قايتالاپ ايتايىن, ءبىز اقش-تا دا, كانادا دا, انگليادا دا, قازاقستاندا دا بوكستاسۋعا دايىنبىز. ارينە, باستىسى سپورتشىلارىمىزدىڭ كارەراسى دۇرىس باعىتتا وربىسە بولعانى», – دەدى ول.
ابىلايحان دا, باتىر دا بىرنەشە جەكپە-جەگىن كانادادا وتكىزدى. بۇل ەلدە ولار قانشالىقتى تانىمالدىلىققا يە؟
«قازىر كانادا حالقى بوكسشىلارىمىزدى قاتتى سىيلايدى. ولاردى سىيلاماۋ مۇمكىن بە, جۇزدەرىنەن نۇر توگىلىپ تۇر عوي! اتا-انالارىنا شەكسىز العىسىمدى بىلدىرەمىن. سەبەبى, ولار ناعىز ازاماتتاردى تاربيلەپ ءوسىردى. سپورتشىلارىمىز كانادالىقتارعا دا ۇلگى بولىپ ءجۇر. ناعىز بوكسشىلار ءدال وسىنداي سيپاتقا بولۋى كەرەك», – دەدى قازاقستاندىق بوكسشىلاردىڭ مەنەدجەرى.
ايتا كەتەيىك, 7 ءساۋىر كۇنى كانادادا ابىلايحان قۇسايىنوۆ مەكسيكالىق كريستيان ارراسولمەن كۇش سىناسىپ, ەكىنشى راۋندتا سۇلاتىپ ءتۇسىردى. ءوز كەزەگىندە باتىر جۇكەمباەۆ تا مەكسيكالىق بوكسشى كوسمە ريۆەرانى جەتىنشى راۋندتا تەحنيكالىق نوكاۋتپەن جەڭىپ, IBO International بەلبەۋىنە يە بولدى.
دايىنداعان ايان ءابدۋالي, «ەگەمەن قازاقستان»
