بۇل تۋرالى بۇگىن قر پارلامەنتى سەناتىنىڭ پلەنارلىق وتىرىسىندا سويلەگەن سوزىندە قر ۇلتتىق بانكىنىڭ توراعاسى دانيار اقىشەۆ حابارلادى.
د. اقىشەۆ ءوز بايانداماسىندا, سوناۋ 2012 جىلى مەملەكەت باسشىسىنىڭ جارلىعىمەن كەلىسىمشارت جاساسۋ تاۋەكەلدەرىن تاۋەلسىز باعالاۋ ينستيتۋتتارىن جانە كوللەكتورلىق اگەنتتىكتەردى ودان ءارى دامىتۋ تۇجىرىمداماسى بەكىتىلگەنىن, وندا ازاماتتاردىڭ قۇقىقتارىن قورعاۋدى قامتاماسىز ەتۋ ءۇشىن كوللەكتورلىق قىزمەتتى مەملەكەتتىك تۇرعىدان رەتتەۋدى ەنگىزۋ بولجانعانىن ەسكە ءتۇسىردى.
«كوللەكتورلىق كومپانيالاردىڭ ءىس جۇزىندە ۇزاق ۋاقىت بولۋىنا جانە ءبىزدىڭ ومىرىمىزگە كەڭىنەن ەنۋىنە قاراماستان, ولاردىڭ قىزمەتى ارنايى زاڭنامامەن رەتتەلمەيدى جانە مەملەكەت ۋاكىلەتتى ورگاندارى ارقىلى ولاردى باقىلامايدى», – دەپ اتاپ ءوتتى ول.
ۇلتتىق بانك توراعاسى «كوللەكتورلىق قىزمەت تۋرالى» قازاقستان رەسپۋبليكاسى زاڭىنىڭ جوباسى بارلىق مۇددەلى تاراپتاردىڭ قاتىسۋىمەن كەڭىنەن تالقىلانعان زاڭ جوبالارىنىڭ ءبىرى ەكەنىن اتاپ ءوتتى.
«جۇمىسقا قوعام قايراتكەرلەرى, زاڭگەرلەر, ادۆوكاتتار, كوللەكتورلىق كومپانيالار قاتىستى. ءبىز بارلىق قاتىسۋشىلاردىڭ مۇددەلەرىن ەسكەرۋگە تىرىستىق», – دەدى د. اقىشەۆ.
«كوللەكتورلىق قىزمەت نە ءۇشىن كەرەك جانە ول نەلىكتەن پايدا بولدى؟ مۇندا ەكى اسپەكتىنى قاراۋ كەرەك. ءبىر جاعىنان, بانكتەر كرەديتتەر بەرەدى جانە قارىز الۋشىلار تاراپىنان مىندەتتەمەلەر ورىندالماعان جاعدايدا بورىشتى ءوندىرىپ الادى. بۇل پروتسەسكە زاڭدىق نەگىزدە كوللەكتورلىق اگەنتتىكتەر تارتىلادى, ولاردىڭ مىندەتى بورىشتى قايتارۋ جۇمىسىن جۇرگىزۋ بولىپ تابىلادى. ءدال وسى رەتتەلمەيتىن سەگمەنتتە قازىر قارىز الۋشىلارعا قاتىستى قۇقىق بۇزۋشىلىقتار بايقالىپ وتىر» – دەپ اتاپ ءوتتى د. اقىشەۆ بايانداماسىندا.
ەكىنشى اسپەكت بانكتەر حالىقتىڭ جانە كاسىپورىنداردىڭ دەپوزيتتەرىن ساقتاۋ مىندەتى.
سوندىقتان, ونىڭ ايتۋىنشا, بانكتەردە كرەديتتەرى بار, سول سياقتى ءوزىنىڭ دەپوزيتتەرىن قايتارۋعا مۇددەلى حالىقتىڭ بارلىق توبى بانكپەن اراداعى كەلىسىمنىڭ تالاپتارىن ورىنداۋى كەرەك.
«ءبىز وسى جاعدايدا بۇگىن «كوللەكتورلىق قىزمەت تۋرالى» جانە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە كوللەكتورلىق قىزمەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوبالارى وسى قاعيداتتارعا جاۋاپ بەرەدى جانە بەرەشەكتى ءوندىرىپ الۋ بويىنشا بولاشاقتاعى وركەنيەتتى ديالوگتىڭ نەگىزىن قالايدى دەپ سانايمىز. زاڭ جوبالارى بانك پەن بورىشكەردىڭ ءوزارا قارىم-قاتىناسىن ءىس جۇزىندە قايتا قۇرادى. بانكتەر كرەديتتىك تاۋەكەلدەردى باعالاۋعا ساقتىقپەن قارايدى, ال كليەنتتەر – كرەديتور الدىندا قارجىلىق مىندەتتەمەلەرىنىڭ تيىسىنشە ورىندالۋىنا جاۋاپتى بولۋ ءۇشىن ءتيىستى دەڭگەيدە قورعالىپ, حاباردار بولادى», – دەپ تولىقتىردى د. اقىشەۆ.
