قارابالىق اۋدانىندا «قارابالىق ۆولونتەرلەرى» جاستار بىرلەستىگى ءۇش جىلدان بەرى بەلسەندى جۇمىس ىستەپ كەلەدى. بىرلەستىككە اۋدانداعى قىرىق شاقتى ىلعي بەلسەندى, تالاپتى جاس جينالعان. ولار بىرلەستىك بەلسەندىسى يرينا تاتيەۆانىڭ باستاماسىمەن «قايىرىمدى پاندا» اتتى ويىن ويلاپ تاپتى. بۇل ينتەرنەت جەلىلەرى ارقىلى جاسوسپىرىمدەردى وزىنە قول جۇمساۋعا يتەرمەلەيتىن, بۇلدىرگى «كوك كيت» ويىنىنا قارسىلىق كورسەتۋ بولىپ تابىلادى.
– «كوك كيت» ويىنى ءجاسوسپىرىمدەردى پسيحولوگيالىق تۇرعىدان ورنى تولماس وكىنىشتەرگە اپاراتىنى بەلگىلى. ال ءبىزدىڭ قارابالىقتىق جاستار ويلاپ تاپقان «قايىرىمدى پاندا» ويىنى بالالاردى, جاستاردى تەك عانا جاقسىلىققا جەتەلەيدى. وندا ويىنشىلارعا 30 تاپسىرما بەرىلەدى. جاستار اۋەلدە وسى تاپسىرمالاردىڭ بارلىعىن دا اۋدان كولەمىندە ۆولونتەرلەردىڭ وزدەرىنىڭ قاتىسۋىمەن ورىنداپ كورۋدى ويلاستىرادى. ال شىندىعىندا ويىنعا استانادان, رەسەيدىڭ چەليابى وبلىسىنان جاستار قوسىلا باستادى, – دەيدى اۋدانداعى جاستار رەسۋرسى ورتالىعىنىڭ ديرەكتورى يرينا التىننيكوۆا.
ويىندى ويلاپ تاپقان ۆولونتەرلەردىڭ ايتۋىنشا, تاپسىرما قاراپايىم تۇرمىستاعى تىرلىكتەن اسپايدى. مىسالى, ويىنعا قاتىساتىن جاس ءوزى تانىمايتىن بىرەۋگە حات جازادى, ودان زەينەتكەرگە كومەك بەرۋىن وتىنەدى نەمەسە تۇنگى ۇيقىعا جاتقاندا كيىپ جاتاتىن كيىمىمەن دۇكەنگە بارىپ, تۇز ساتىپ الۋدى تاپسىرادى.
– مۇنداي تاپسىرمالاردىڭ دا ەش وعاشتىعى جوق, ويتكەنى ول جاستاردى وزىنە سەنىمدىلىككە ءتاربيەلەيدى, – دەيدى يرينا تاتيەۆا. «قارابالىق ۆولونتەرلەرى» بىرلەستىگىنىڭ مۇشەلەرى ءاۋ باستا ويىندى اياعىنا دەيىن ويناعان قارابالىقتىق جاستارعا سىيلىق دايىنداعىسى كەلىپتى. كەيىن ول ويىنان قايتىپتى.
– جاستار وسى ويىنعا قىزىعا قاتىسىپ, بالالار جامان قادامعا بارماسا, امان بولسا, سودان ارتىق قانداي سىيلىق بولۋى كەرەك؟ ءبىز وسىلاي پاتۋالاستىق, –دەيدى يرينا التىننيكوۆا. قازىر ينتەرنەت جەلىلەرىندە ويىنعا ءجۇزدەن اسا ويىنشى قاتىسىپ ۇلگەرگەن.
ءنازيرا جارىمبەتوۆا,
«ەگەمەن قازاقستان»
قوستاناي وبلىسى,
قارابالىق اۋدانى
