سوعىستان كەلگەن سوڭ سوت سالاسىندا جۇمىس ىستەپ زەينەتكە شىققان اقساقالدى بۇگىنگى ءىزباسارلارى ەشقاشان ۇمىتقان ەمەس.
جاقىندا وبلىستىق سوتتىڭ توراعاسى نۇرسەرىك ءشارىپوۆ ايتجان اقساقالدى ۇجىمىنا شاقىرىپ, كەزدەسۋ وتكىزدى. قان مايداندى اۆستريانىڭ گراتسك قالاسىندا اياقتاعان قاريانىڭ ەرلىك ىستەرى باياندالدى. سوت سالاسىنداعى ۇزدىك قىزمەتى ءۇشىن جوعارعى سوت توراعاسى قايرات ءماميدىڭ بۇيرىعىمەن بەرىلگەن «ءمىنسىز قىزمەتى ءۇشىن» مەدالىن ومىراۋىنا تاقتى.
– ۇلى وتان سوعىسىندا ميلليونداعان جازىقسىز جانداردىڭ ءومىرى قيىلدى, – دەيدى نۇرسەرىك ءشارىپوۆ. – ايتجان اعامىز دا جالىندى جاستىق شاعىن ءولىم قۇسقان قان مايداندا وتكىزدى. سونداي اۋىر كەزەڭدەردىڭ بىرىندە گيتلەردىڭ سۋرەتىن جارعا تىرەپ قويىپ اتىپ, «گيتلەردى اتقان قازاق» اتانعان ەكەن. مۇنىڭ ءبارى بەيبىت جانداردى اجالعا قيعان فاشيزمگە وشپەندىلىكتەن, ىزادان تۋعان مەزەت قوي.
ەل باسىنا كۇن تۋعان اۋىر كەزەڭدە ۇلكەن ەرلىك كورسەتكەن, بەيبىت ومىردە دە ءمىنسىز قىزمەت جاساعان ايتجان قاريانىڭ ءومىرى كوپكە ۇلگى بولۋى كەرەك. سوندىقتان, قازىنالى قاريانى ۇجىمعا ارنايى شاقىرىپ, اقىل-كەڭەسىن تىڭدايمىز.
وسى جيىنعا ارنايى كەلگەن وبلىس اكىمىنىڭ ورىنباسارى ۇلاسبەك سادىبەكوۆ ايماق باسشىسىنىڭ قۇتتىقتاۋىن جەتكىزسە, وبلىستىق ارداگەرلەر كەڭەسىنىڭ توراعاسى جەڭىسبەك ءماۋلەنقۇلوۆ وتتى جىلدارى ومىراۋىن وققا توسقان مايدانگەرلەر, جەڭىستى جاقىنداتقان تىڭ ارداگەرلەرى تۋرالى ەستەلىك ايتتى.
«اۋىلىڭدا قارتىڭ بولسا, جازىپ قويعان حاتپەن تەڭ» دەيدى حالىق دانالىعى. جۇزگە جاقىنداپ قالسا دا ايتجان قاريانىڭ جاس بۋىنعا ايتارى بار.
باقتيار تايجان,
«ەگەمەن قازاقستان»
وڭتۇستىك قازاقستان وبلىسى
