وڭتۇستىك قازاقستان وبلىسىندا ماقتارال اۋدانىندا جەراستى سۋلارى كوتەرىلىپ, جەتىساي قالاسىنداعى ۇيلەرگە سۋ كىرىپ, سۋ سورۋ جۇمىستارى جۇرگىزىلدى. بۇل جۇمىستارعا جەرگىلىكتى اكىمدىك پەن توتەنشە جاعداي قىزمەتىنەن 12 ادام مەن 3 تەحنيكا جۇمىلدىرىلدى.
شىمكەنتتە جاڭبىردان كوشەلەر مەن اۋلالارعا سۋ تولدى. شاھاردىڭ توتەنشە جاعداي قىزمەتىنەن 13 ادام مەن 3 تەحنيكادان قۇرالعان توپ اۋلالاردى سۋدان تازارتتى.
سايرام اۋدانى مەن وتىرار اۋدانىندا ارىس وزەنى بويىندا بوگەتتەر جاسالىپ, تاسقىننىڭ الدىن الۋ شارالارى جۇرگىزىلدى. وعان جەرگىلىكتى تۇرعىندار مەن توتەنشە جاعداي قىزمەتىنىڭ 60 ادام مەن 4 تەحنيكا جۇمىلدىرىلدى.
وقو-نىڭ سۋ تاسقىنى بولعان ۋچاسكەلەرىندە سۋ وتكىزگىش قۇبىر بار, نىعايتۋ جۇمىستارى جۇرگىزىلىپ, ەسكەرتۋ بەلگىلەرى, بەلگى باعاندارى قويىلدى. تاۋلىك بويى كەزەكشىلىك ۇيىمداستىرىلدى.
ەستەرىڭىزگە سالا كەتسەك, دەمالىس كۇندەرى ارىس وزەنىنىڭ ۇستىندەگى جاڭادان سالىنعان كوپىردىڭ ەكى جانىن سۋ شايعان بولاتىن. توتەنشە جاعداي قىزمەتكەرلەرى ونىڭ سەبەبىن جامبىل وبلىسىنان كەلەتىن بورولداي وزەنىنىڭ سۋ دەڭگەيى 40 سانتيمەترگە دەيىن كوتەرىلىپ, ارىس وزەنىنە كوپ مولشەردە سۋ جىبەرىلۋىنەن تۋىنداعان دەپ ءتۇسىندىردى.
