ۆەنگريا ۇكىمەتى قازاقستاندى ستراتەگيالىق ارىپتەس رەتىندە سانايدى. سوندىقتان ەكى ەلدى اۋە ارقىلى جالعايتىن تىكەلەي رەيستەر اشۋ وتە ماڭىزدى دەدى ۆەنگريانىڭ ۇلتتىق ەكونوميكا ءمينيسترى ميحاي ۆارگا بۋداپەشتتە وتكەن ءباسپاسوز ء ماسليحاتىندا. ول اۋە قاتىناسىن اشۋ ارقاسىندا ەكى ەل اراسىندا ەكونوميكالىق, مادەني جانە تۋريزم سالاسىنداعى بايلانىستار ودان ءاري تەرەڭدەي تۇسەدى دەپ سەنەتىنىن ايتتى. ءباسپاسوز ءماسليحاتىندا سويلەگەن قازاقستاننىڭ ۆەنگرياداعى ەلشىسى نۋرباح رۇستەموۆ بۇل وقيعانىڭ ەكى ەل ۇكىمەتى جاساپ كەلە جاتقان كوپ جىلعى ەڭبەكتىڭ جەمىسى ەكەنىن جانە ەكى ەل اراسىنداعى ديپلوماتيالىق بايلانىستاردىڭ 25 جىلدىعىنا وراي اشىلعانىن ايتتى.
«قازاقستان – ۆەنگريانىڭ ورتالىق ازياداعى باستى ستراتەگيالىق ارىپتەسى. ەكى ەل دە قارىم-قاتىناستى تەرەڭدەتە ءتۇسۋدى ماقسات ەتەدى. اشىلعالى وتىرعان اۋە رەيسى ەكى استانانى عانا بايلانىستىرىپ قويمايدى. مۇنىڭ ارقاسىندا ەكونوميكالىق دامۋ الەۋەتى جوعارى ەكى ايماق – ورتالىق جانە شىعىس ەۋروپا مەن ورتالىق ازيا اراسىندا اۋە بايلانىسى ورنايدى. جەدەل دامىپ كەلە جاتقان ەكونوميكا حابتارىمەن بايلانىس ورناتۋ – ءبىز ءۇشىن اسا پايدالى دەدى ميحاي ۆارگا.
مينيستر تاعى ءبىر ماڭىزدى شارا رەتىندە وتكەن جىلدىڭ قازان ايىندا ىسكە كىرىسكەن قازاق-ۆەنگر ستراتەگيالىق كەڭەسىن اتادى. بۇل ورگان ەكى ەل اراسىنداعى ىنتىماق, اسىرەسە مادەنيەت جانە ءبىلىم سالاسىنداعى بايلانىستار تەرەڭدەتۋ باعىتىندا جۇمىس ىستەمەك.
«بيىل استانادا وتەتىن EXPO-2017 كورمەسىنە ۆەنگريانىڭ قاتىسقالى وتىرعانىن, كورمەگە شامامەن 3 ميلليون ادام كەلەدى دەگەن بولجام بار ەكەنىن ەسكەرسەك, ەكى ەل اراسىندا تىكەلەي رەيستىڭ دەر كەزىندە اشىلعالى وتىرعانىنا كوزىمىز جەتەدى» دەپ مالىمدەدى ميحاي ۆارگا.
استانا مەن بۋداپەشت اراسىندا رەيس اپتاسىنا ەكى رەت – بەيسەنبى جانە جەكسەنبى كۇندەرى بولادى. ال ءبىر باعىتقا بيلەت باعاسى 40 ەۋرودان باستالماق. العاشقى ۇشاق 8 ماۋسىم كۇنى ۇشادى.
