تاراز قالاسى پروكۋراتۋراسىنىڭ جۇرگىزگەن ساراپتاماسى قالادا ۇزاق ۋاقىتتان بەرى ەسىرتكى ساۋداسىمەن اينالىسقان تۇراقتى قىلمىستىق توپتى انىقتادى. تالداۋ ناتيجەسىنە سايكەس, جامبىل وبلىسى پروكۋرورىنىڭ جەكە باستاماسىنا وراي, جەدەل ىزدەستىرۋ شارالارى قولعا الىنىپ, 18 ناۋرىز كۇنى كۇدىكتىلەردىڭ تۇرعىن جايلارىنا ءتىنتۋ شارالارى جۇرگىزىلگەن بولاتىن. ناتيجەسىندە قىلمىستىق توپ جەتەكشىسى مەن ونىڭ 8 سىبايلاسى جالپى قۇنى 2 ميلليون 500 مىڭ تەڭگە تۇراتىن 2,5 كەلى گەروين ەسىرتكىسىمەن ۇستالدى.
قازىرگى ۋاقىتتا بارلىق كۇدىكتىلەر سوت سانكتسياسىمەن سوتقا دەيىنگى تەرگەۋ شارالارى ءۇشىن قاماۋعا الىندى. ال قىلمىستىق ءىستى انىقتاۋ, تەرگەۋ وبلىستىق ىشكى ىستەر دەپارتامەنتىنىڭ تەرگەۋ باسقارماسىنا تاپسىرىلعان. «قۇقىق قورعاۋ ورگاندارىنىڭ بارلىق كۇشى ۇيىمداسقان قىلمىستىق توپتارمەن كۇرەسكە باعىتتالۋى ءتيىس», دەدى بۇل ماسەلە جونىندە وبلىس پروكۋرورى ەرنات سىبانقۇلوۆ.
جالپى, 2017 جىلدىڭ باسىنان بەرى 225 قىلمىستىق قۇقىق بۇزۋشىلىق تىركەلگەن. ونىڭ 96-سى ەسىرتكى قىلمىسى بولسا, قالعان 129-ى قىلمىستىق تەرىس قىلىق بولىپ سانالادى. ەسىرتكى زاتتارىن وتكىزۋ دەرەگى بويىنشا 47, اسا ءىرى كولەمدەگى ەسىرتكى زاتتارىن ساقتاۋ دەرەگى بويىنشا 42 قىلمىستىق ءىس قوزعالعان. زاڭسىز اينالىمنان 520 كەلى ەسىرتكى زاتتارى تاركىلەنگەن. بۇل تۋرالى ەسىرتكى ساقتاۋمەن اينالىسقان قىلمىستىق توپتى ۇستاۋ دەرەگى بويىنشا وبلىستىق ىشكى ىستەر دەپارتامەنتىندە وتكەن جيىندا ايتىلدى.
وبلىستىق ءىىد ەسىرتكى بيزنەسىنە قارسى كۇرەس باسقارماسى باستىعىنىڭ ورىنباسارى, پوليتسيا پولكوۆنيگى ەرالى ەگەمبەرديەۆ ءباسپاسوز بريفينگىندە ەسىرتكى بيزنەسىنە قارسى كۇرەس باسقارماسىنىڭ قىزمەتكەرلەرى ۇيىمداسقان قىلمىسقا قارسى كۇرەس جانە جەرگىلىكتى پوليتسيا قىزمەتتەرىمەن تىعىز ارەكەتتەسە وتىرىپ, ەسىرتكى بيزنەسىنىڭ الدىن الۋدا بىرقاتار كەشەندى شارالار جۇرگىزۋدە ەكەنىن اتاپ ءوتتى.
حاميت ەسامان,
«ەگەمەن قازاقستان»
جامبىل وبلىسى
