شارا نەگىزىنەن كانادالىق كومپانيالاردى ەلىمىزدىڭ قازىرگى كەزەڭدەگى الەۋمەتتىك-ەكونوميكالىق دامۋى جانە ەكىجاقتى ءىسكەرلىك ىنتىماقتاستىقتى ودان ءارى دامىتۋدىڭ بولاشاعىمەن تانىستىرۋعا ارنالدى. بيزنەس-سەمينارعا كۆەبەك پروۆينتسياسىنىڭ ەكونوميكا, عىلىم ءجانە يننوۆاتسيالار مينيسترلىگى, كانادانىڭ «Export Development Canada» ەكسپورتتى دامىتۋ بويىنشا كورپوراتسياسى, سونداي-اق, كۆەبەكتىڭ تاۋ-كەن جانە ينجينيرينگ سالاسىنداعى 20-دان استام كومپانياسىنىڭ وكىلدەرى قاتىستى.
كونستانتين جيگالوۆ ءوز سوزىندە پرەزيدەنتتىڭ «قازاقستاننىڭ ءۇشىنشى جاڭعىرۋى: جاھاندىق ءباسەكەگە قابىلەتتىلىك» اتتى جولداۋى, «100 ناقتى قادام» ۇلت جوسپارى جانە «نۇرلى جول» باعدارلاماسىنىڭ قازاقستان ەكونوميكاسىن ودان ءارى ترانسفورماتسيالاۋ, كولىك-لوگيستيكالىق, يندۋستريالىق, ەنەرگەتيكالىق ءجانە الەۋمەتتىك ينفراقۇرىلىمداردى دامىتۋدى قاراستىراتىن نەگىزگى باسىمدىقتارىنا باسا نازار اۋداردى.
شارا بارىسىندا قاتىسۋشىلار مەن قوناقتار ەكسپو-2017 حالىقارالىق كورمەسىنە دايىندىق بارىسى, «استانا» حالىقارالىق قارجى ورتالىعىنىڭ قۇرىلۋى, «باتىس ەۋروپا – باتىس قىتاي» كولىك ءدالىزى مەن باسقا دا ءىرى ينفراقۇرىلىمدىق جوبالار تۋرالى حاباردار ەتىلدى.
ەلشى قازاقستاندىق ەكونوميكانىڭ ءساتتى تۇردە ترانسفورماتسياسى ەلباسى ن.نازارباەۆ ۇسىنعان كونستيتۋتسيالىق رەفورمامەن ءبىرگە جۇزەگە اسىپ جاتقاندىعىن اتاپ ءوتتى.
باسقوسۋدا كانادالىق كومپانيالار قازاقستاننىڭ جاڭا ەكونوميكالىق ساياساتىن جۇزەگە اسىرۋعا اتسالىسۋعا شاقىرىلدى.
سەمينارعا قاتىسۋشىلار ينتەراكتيۆتى ديالوگ پىشىمىندە قازاقستاندا جۇزەگە اسىرىلىپ جاتقان ەكونوميكالىق جانە ساياسي رەفورمالار تۋرالى وڭ پىكىرلەرىن ءبىلدىرىپ, قازاقستاننىڭ ەۋرازيالىق ەكونوميكالىق وداق نارىعىنداعى جوعارى بەدەلىن اتاپ ءوتتى ءجانە ەلىمىزدىڭ «جەر قويناۋى مەن جەر قويناۋىن پايدالانۋ تۋرالى» جاڭا كودەكسىن دايىنداۋ تۋرالى شەشىمىن, قازاقستاندىق تاراپتىڭ ينۆەستورلار ءۇشىن جەڭىلدىكتەر ەنگىزۋ باستاماسىن, ونىڭ ىشىندە ءىرى ينۆەستورلار ءۇشىن ۆيزاسىز رەجىم ورناتۋىن قۇپتادى.
