Homesters.kz ساراپشىلارىنىڭ پىكىرىنشە, ءساۋىر ايىندا دا قايتالاما نارىقتاعى ءۇي باعاسى ارزانداي تۇسپەك.
جالپى, ناۋرىز ايىندا رەسپۋبليكا بويىنشا ءۇي باعاسى ورتا ەسەپپەن 1 پايىزعا تومەندەدى, ال قالالار بويىنشا, الماتىدا 1,3 پايىز, استانادا 0,2 پايىز, شىمكەنتتە 0,7 پايىز, قاراعاندىدا 1,7 پايىز ارزانداۋشىلىق بايقالعان.
اقپان ايىندا تەڭگەنىڭ دوللارعا شاققانداعى باعامى 2-2,5 پايىز نىعايعان كەزدە بۇل ءۇي باعاسىنا اسەر ەتىپ, باسپانا قۇنى ايتارلىقتاي تومەندەگەن. ال ناۋرىز ايىندا تەڭگە باعامىندا ونشالىقتى وزگەرىس بولماعانىنا قاراماستان, ءۇي باعاسى 2015 جىلدان بەرى جالعاسىپ كەلە جاتقان ارزانداۋ ءۇردىسىن ساقتادى.
ءار قالاداعى ارزانداۋ كورسەتكىشىنىڭ ءارتۇرلى بولۋى, ساراپشىلاردىڭ پىكىرىنشە, سول ايماقتاعى سۇرانىسقا بايلانىستى. ماسەلەن, استاناداعى سۇرانىستىڭ جوعارىلىعىنان باعا بار بولعانى 0,2 پايىزعا عانا ارزانداعان.
ال جاڭا ۇيلەردىڭ باعاسىنىڭ وزگەرمەۋى, وعان سۇرانىستىڭ جوعارى ساقتالۋىمەن قاتار, قۇرىلىس كومپانيالارىنىڭ باعانى قولدان ۇستاپ تۇرۋى. كومپانيالار نارىقتاعى كىشىگىرىم وزگەرىستەرگە ءمان بەرمەي, باستاپقى باعاسىنان تۇسپەي تۇر.
ساراپشىلاردىڭ پىكىرىنشە, ءساۋىر ايىندا جاڭا ۇيلەردەگى باعا باياعىشا تۇراقتى ساقتالىپ, قايتالاما نارىقتاعى باسپانا قۇنى 0,6-0,8 پايىزعا تومەندەيدى.
