ەڭ الدىمەن سەناتورلار سارىاعاش شەكارا جاساعىنىڭ «جىبەك جولى» وتكىزۋ بەكەتى مەن «دارحان» شەكارا زاستاۆاسىندا بولدى. ولار قازاقستاندىق شەكاراشىلاردىڭ جاۋىنگەرلىك قىزمەتىمەن تانىسىپ, ينفراقۇرىلىم نىساندارىن ارالادى. سونىمەن قاتار, ۇقك شەكارا قىزمەتىنىڭ وڭتۇستىك قازاقستان وبلىسىنداعى 2020 اسكەري بولىمىندە مەملەكەتتىك شەكارانى كۇزەتۋ ماسەلەلەرى بويىنشا كوشپەلى وتىرىسقا قاتىستى, دەپ حابارلايدى وقو اكىمدىگىنىڭ ءباسپاسوز قىزمەتى.
قازىرگى تاڭدا قازاقستان-قىرعىزستان جانە قازاقستان-تۇرىكمەنستان مەملەكەتتىك شەكاراسىن شەگەندەۋ پروتسەسى اياقتالدى. قازاقستان-قىرعىزستان شەكاراسىن شەگەندەۋ مەن ءتارتىبى تۋرالى حالىقارالىق شارتتارعا قول قويۋعا دايىندىق جانە كەلىسۋ جۇمىستارى جۇرگىزىلۋدە.
2017 جىلعى قاڭتاردان باستاپ بۇگىنگى كۇنگە دەيىن مەملەكەتتىك شەكارانى كۇزەتۋ كەزىندە شەكارا ايماعىندا 3 545 قۇقىق بۇزۋشىلىقتىڭ جولى كەسىلدى. 75,5 كەلى ەسىرتكى زاتى مەن (ونىڭ ىشىندە 50 كەلىدەن استامى - گەروين), 16 قارۋ جانە 523 وق اينالىمنان الىندى.
پارلامەنت سەناتى حالىقارالىق قاتىناستار, قورعانىس جانە قاۋىپسىزدىك كوميتەتىنىڭ توراعاسى داريعا نازارباەۆا وڭتۇستىك قازاقستان وبلىسىنا جاساعان ەكى كۇندىك ساپاردى قورىتىندىلاي كەلىپ, شەكارا قىزمەتىنىڭ تەحنيكالىق جابدىقتالۋىنىڭ جوعارى دەڭگەيدە ەكەنىن اتاپ ءوتتى.
«بۇل سالانىڭ باسىمدىققا يە ەكەنى بارشاعا بەلگىلى, اسكەري قىزمەتشىلەردىڭ, ونىڭ ىشىندە الەۋمەتتىك جاعىنان قورعالۋى ءۇشىن بارلىق جاعداي جاسالادى. اسكەري قىزمەت تۋرالى زاڭناماعا اسكەري قىزمەتشىلەردى تۇرعىن ۇيمەن قامتاماسىز ەتۋ ماسەلەلەرىن ەلەۋلى تۇردە جەڭىلدەتەتىن تۇزەتۋلەر ماجىلىستە ەنگىزىلدى. ول وتە اۋقىمدى جۇمىس, ول دەپۋتاتتاردىڭ ەڭبەگى دەپ سانايمىن», - دەدى د.نازارباەۆا.
سونىمەن قاتار, ول بيۋدجەت قارجىسىن ەلەۋلى تۇردە وڭتايلاندىراتىن بىرىڭعاي اۆياتسيا قىزمەتىن قۇرۋ كەرەكتىگىندە اتاپ ءوتتى.
