قىم-قۋىت قاربالاسقان ادامداردىڭ اراسىندا اراكىدىك توڭىرەگىن جاڭعىرتقان اششى داۋىستار ەستىلەدى. «جول بەرىڭدەر», «دوروگۋ» دەپ ايعايلايدى قولاربا ءسۇيرەتكەن ارباكەشتەر. قارسى الدىمنان ايداربەك كەزدەستى. ەلدەس, جەرلەس ەربولسىننىڭ بالاسى. وبلىس ورتالىعىنداعى جەكەمەنشىك جوعارى وقۋ ورىندارىنىڭ بىرىندە زاڭ فاكۋلتەتىن بىتىرگەن. اكەسىنىڭ وسى بالانى مەحنات شەگىپ, قانشالىقتى قيىندىقپەن وقىتقانىن جاقسى بىلەتىن ەدىم. قازىر جوعارى ءبىلىمدى ايداربەك قويما مەن ساۋدا سورەسىنىڭ اراسىن كۇرە جول قىلىپ, ساۋداگەرلەردىڭ زاتىن تاسىپ ءجۇر.
ەرتەرەكتە زاڭگەرلىك ماماندىعى ەرەكشە قۇرمەتتى سانالاتىن. وسىنداي وقۋ ورنىنا تابان ىلىكتىرگەن بالا كۇنى ەرتەڭ سوت نەمەسە پروكۋرور, ءتىپتى بولماعان كۇننىڭ وزىندە تابىستى كۇرەپ تاباتىن ادۆوكات بولىپ شىعاتىن. بۇگىنگى ديپلومدى زاڭگەر ايداربەك بازاردا قولاربامەن جۇك تاسيتىن ارباكەش.
از-كەم قال-جاعداي سۇراستىق. مازمۇنسىز, ءمانسىز اڭگىمە. ەلدەستەردىڭ ەسەندىگى, اۋىلداستاردىڭ اماندىعى.
– اعا, – دەدى ايداربەك. – ءسىز حالىقتى كوپ تانيسىز عوي. مەنى كۇزەتشىلىككە ورنالاستىرىڭىزشى.
– كۇزەتشىلىگى نەسى؟
– اربا سۇيرەپ قاجىدىم. كۇزەتشىلىك دەگەنىڭىز راحات قوي. ءبىر كۇن ىستەيسىز, ەكى كۇن دەمالاسىز.
ايداربەكتىڭ ءوتىنىشىن ورىنداي الماسىم بەلگىلى. كۇزەت فيرمالارىنىڭ ءبارى جەكەمەنشىك. ولار كىمنىڭ وتىنىشىنە قۇلاق اسسىن.
جوعارى ءبىلىمدى, ون ەكى مۇشەسى ساۋ, وتىزعا دا تولماعان, جالىنداعان جاستىڭ ارمانىنىڭ شەگى, قيال قاناتىنىڭ جەتكەن جەرى كۇزەتشىلىك بولىپتى. ول ءوز ماماندىعى بويىنشا جۇمىس ىستەپ, قىزمەت ساتىسى بويىنشا ءوسۋدى, ءتۇپتىڭ-تۇبىندە سوت نەمەسە پروكۋرور بولۋدى, ءسويتىپ, حالىققا قىزمەت ەتۋدى ويلامايدى.
جاستار زاڭگەر, ەكونوميست ماماندىقتارىن يگەرۋگە قۇشتار. ال وقۋ ورنىن بىتىرگەندەردىڭ جارتىسىنان كوبى جۇمىسسىز ءجۇر. وسى ورايدا, جارنامالىق گازەتتەردى قاراساڭىز قۇرىلىسشى, ەلەكتر دانەكەرلەۋشىسى, اۆتوكران جۇرگىزۋشىسى, توكار, سلەسار قاجەت دەگەن حابارلاندىرۋدان كوز سۇرىنەدى. ەندەشە, ەرتەڭگى كۇنى جۇمىس تابىلار-تابىلماسى بەلگىسىز ماماندىقتى يگەرەمىن دەپ جاستىق شاعىڭنىڭ ەندى قايتىپ ورالماس التىن ۋاقىتىن سارپ ەتىپ, اۋىلداعى اتا-انانىڭ بەتىنە قاراپ وتىرعان ەكى-ءۇش مالىنا سالماق سالىپ قاجەتى قانشا ەدى.
كوشەدە ەتىك جاماپ وتىرعان نەمەسە ساعات, تەلەديدار جوندەيتىن, كومپيۋتەردىڭ ءتىلىن بىلەتىن, تەحنيكالىق قىزمەت كورسەتۋ ورتالىقتارىندا جالاڭداپ ءجۇرگەن قازاق بالاسىن كوردىڭىز بە؟ ءتىپتى قاراپايىم شاشتاراز ماماندىعىن يگەرگەندەر دە وزگە جۇرت وكىلدەرى. ال, ءبىزدىڭ اعايىندار ءشانيىپ سوت, وقالى پوگون تاعىپ پروكۋرور بولعىسى كەلەدى. قازىر ىشكى ءىستەر سالاسىنداعى مامانداردىڭ ءبارى ءبىزدىڭ ۇلتتان. كوشەدەگى قوعامدىق ءتارتىپ ساقتايتىن باتالوننىڭ جاۋىنگەرلەرىن قاراڭىزشى, ءبارى اۋىلدان قالاعا كوشكەن اعايىننىڭ ماڭدايىنا باسقان مىڭ بولعىرلارى. ىشكى ىستەر سالاسىنىڭ كيىمىن قازاقتىڭ ۇلتتىق كيىمى دەۋگە ابدەن بولعانداي.
نۇرسۇلتان نازارباەۆ «بولاشاقتىڭ ىرگەسىن بىرگە قالايمىز!» اتتى جولداۋىندا: «ءبىز كاسىپتىك جانە تەحنيكالىق ءبىلىم بەرۋدىڭ مازمۇنىن تولىق جاڭارتپاق نيەتتەمىز. بۇگىندە دامىعان ەلدەردە 1 ميلليون تۇرعىنعا 1-6 جوعارى وقۋ ورنىنا دەيىن كەلەدى. قازاقستاندا بارلىعى 149 جوعارى وقۋ ورنى بار. 200 عىلىمي كەڭەستەر, كانديداتتار مەن دوكتورلاردى قالىپتان قۇيعانداي ەتىپ, جاساپ شىعارىپ جاتىر. 60 كانديداتتىڭ 1-ەۋى جانە 37 دوكتوردىڭ 1-ەۋى عانا عىلىمعا بارادى. وسى جىلدان باستاپ ول كەڭەستەردىڭ جۇمىستارى توقتاتىلادى», دەگەن بولاتىن.
ءۇش كۇن بويى ارباكەش ايداربەكتىڭ «مەن كۇزەتشى بولسام عوي» دەگەن ارمانى ەستەن كەتپەدى. بۇگىنگى جاستىڭ, ءبىلىمدى ماماننىڭ كەيپى وسى. جاڭا وقۋ جىلى, ماماندىق تاڭداۋ ماۋسىمى تاياپ كەلەدى. مىڭنىڭ بولماسا دا, ءجۇزدىڭ ءتىپتى, ون جاستىڭ ويىنا قوزعاۋ سالسام دەپ وسى جولداردى جازۋعا تۋرا كەلدى.
بايقال ءبايادىلوۆ
