ءحVىىى عاسىردا جوڭعارلارعا قارسى كۇرەسكەن باتىر, مامىلەگەر جانىبەك قوشقار ۇلى ۇستاعان تۋدىڭ جۇرناعى تورعايداعى مۋزەيلەر كەشەنىندەگى قادىرلى جادىگەردىڭ ءبىرى. بۇقار جىراۋدىڭ «قارا كەرەي قابانباي, قانجىعالى بوگەنباي, قاز داۋىستى قازىبەك, شاقشاق ۇلى جانىبەك, ورمانداي كوپ ورتا ءجۇز, سودان شىققان ءتورت تىرەك» دەگەن دۋالى سوزىنەن-اق, جانىبەك باتىردىڭ ءوز زامانىندا قانداي ءىرى تۇلعا بولعاندىعى بايقالادى. سول جانىبەك باتىردىڭ جاۋعا قارسى شاپقاندا الىپ شىققان سارى تۋىنىڭ قيىندىسى بۇگىنگە جەتىپتى. مۋزەيلەر كەشەنىنىڭ ديرەكتورى گۇلبانۋ سارسەكەەۆا تۋدىڭ حح عاسىر باسىنا دەيىن ءبۇتىن بولعانىن ايتادى.
− تورعايداعى قۇيماقۇلاق اقساقالداردان جەتكەن اڭگىمەلەر بويىنشا, وسى تۋ حح عاسىردىڭ باس كەزىندەگى الاساپىران ۋاقىتتا جانىبەك باتىردىڭ شوپشەگى, شولاقتىڭ وسپانى دەگەن كىسىدە بولعان ەكەن. كەيىن وسى تۋدى كوپشىلىك ەمەس پە, تابارىك كورىپ, جىرتا باستايدى عوي. سول تۋدىڭ قيىندىسى عانا بىزگە 1993 جىلى مۋزەي اشىلعاندا جەتتى, – دەيدى گۇلبانۋ سارسەكەەۆا.
تۋدىڭ قيىندىسىن مۋزەيگە الماتىدا تۇراتىن, بۇگىندە 90 جاسقا كەلىپ وتىرعان عاليا بەكتەمىسوۆا دەگەن اجەمىز تاپسىرىپتى. جادىگەردىڭ ونىڭ قولىنا ءتۇسۋى دە قىزىق. وتكەن عاسىردىڭ 50-جىلدارى جانىبەك باتىردىڭ ۇرپاقتارى بولىپ كەلەتىن تورعايلىق, بەلگىلى باسپاگەر ءابدىراشيت بەكتەمىسوۆ تۋعان جەرىنە قىدىرىستاپ بارادى. كەلىنشەگى عاليا ەكەۋىنىڭ وتباسىندا نارەستە بولماي ءجۇر ەكەن. سوندا تورعايلىق ءبىر اقساقال ولارعا وسى تۋدىڭ جۇرناعىن «باتىر باباڭنان قالعان قاسيەتتى زات ەدى, الىپ كەت, كەلىن ۇل تابار» دەپ ىرىمداپ بەرىپتى.
− راسىندا, الماتىعا بارعان سوڭ عاليا اپامىز بالا كوتەرىپ, ۇل تابادى, ونان كەيىن ومىرگە قىز بالا كەلەدى. بىراق ۇلى قىزىلشادان شەتىنەپ كەتەدى دە, قىزى امان وسەدى. قازىر اناسى سول قىزدىڭ قولىندا. مۋزەي اشىلعاندا عاليا اجەي ءجادىگەردىڭ وسى تاريحىن ايتىپ, تاپسىرىپ ەدى, – دەيدى گۇلبانۋ.
تۋدىڭ جۇرناعىن كەلۋشىلەر ۇزاق قىزىقتاپ تۇرادى. ونىڭ قانداي ماتادان جاسالعانى مۋزەي قىزمەتكەرلەرىنە ءازىر بەلگىسىز. ءبىر قاراعاندا توقىلۋى كەنەپ ءتارىزدى. عاسىر قويناۋىنان جەتكەن تۋدىڭ قيىندىسى ۇلى دالانى قورعاعان, ات ۇستىندە كوز شىرىمىن العان, تۇلپارى اۋىزدىقپەن سۋ ىشكەن باتىرلار ەرلىگىنىڭ كۋاگەرى ەكەنى ءسوزسىز.
ءنازيرا جارىمبەتوۆا,
«ەگەمەن قازاقستان»
قوستاناي وبلىسى,
جانكەلدين اۋدانى
