العاشقى ويىنداعى جەڭىلىستى قاپەرىندە ۇستاعان وسكەمەندىكتەر بىردەن العا ۇمتىلدى. الايدا, العاشقى شايبانى ءبىرىنشى بولىپ جىبەرىپ الدى. 3-مينۋتتا قوناقتار ساپىنان اندرەي كورابەينيكوۆ قاقپانى ءدال كوزدەپ, «ءرۋبيندى» العا شىعاردى. ءوز جانكۇيەرلەرىنىڭ الدىندا ونەر كورسەتىپ جاتقان شىعىسقازاقستاندىقتار العاشقى كەزەڭدە تارازى باسىن تەڭەستىرۋ ءۇشىن بارىن سالدى. گول سوعاتىن مۇمكىندىكتەر بولعانمەن, ساتتىلىك جولداس بولمادى.
ەسەسىنە جەرلەستەرىمىز ويىننىڭ كەلەسى بولىگىندە ءتۇمەندىكتەردى ەكى مارتە قاپى قالدىردى. 33-مينۋتتا ەۆگەني رىمارەۆ مەرگەندىگىمەن كوزگە تۇسسە, اراعا ءتورت مينۋت سالىپ ەكىنشى گولدىڭ اۆتورى اتاندى. بۇل تۇستا رەسەيلىكتەردىڭ ءبىر ويىنشىسى كەم بولعانىن ايتا كەتكەن ءجون.
ماتچتىڭ ءۇشىنشى كەزەڭى دە ءدال وسى باعىتتا ءوربىدى. ءا, دەگەننەن-اق العا ۇمتىلعان الەكسەي جداحين شاكىرتتەرى 41-مينۋتتا ءۇشىنشى شايبانى سوعىپ ۇلگەردى. بۇل شاقتا ەۆگەني رىمارەۆ حەت-تريگىن جاساعان ەدى. نەگىزگى ۋاقىتتىڭ اياقتالۋىنا ساناۋلى مينۋتتار قالعاندا قوناقتار قاقپاشىنى ايدىنداعى ويىنشىعا الماستىرىپ, جانۇشىرا العا ۇمتىلعان بولاتىن. الايدا, بۇل دا «تورپەدو» ءۇشىن ورايى كەلگەن ءمۇمكىندىك بولدى. لەونيد مەتالنيكوۆ بوس قاقپانى الىستان ءدال كوزدەپ, سوڭعى نۇكتەنى قويدى.
العاشقى ويىندا 0:1 بولىپ ۇتىلعان وسكەمەندىكتەر وسىلايشا ەسە قايتاردى. قوس كوماندانىڭ اراسىنداعى جالپى ەسەپ 1:1. كەلەسى ەكى ماتچ 1 جانە 2 ءساۋىر كۇندەرى تۇمەندە وتەدى.
ايان ءابدۋالي,
«ەگەمەن قازاقستان»
