2016 جىلى وسىندايلارعا بايلانىستى 15 قىلمىستىق ءىس قوزعالسا, ۇستىمىزدەگى جىلدىڭ 3 ايىندا عانا دالادا قالعان ءسابيدىڭ سانى 8-گە جەتكەن. ءدۇنيەگە شىر ەتىپ ەنگەن شارانا ەش جازىقتى بولماسا دا ساناسىز انانىڭ تاسجۇرەكتىگى سالدارىنان وسىنداي كۇيگە تاپ بولۋدا. مۇندايلارعا «انا» دەگەن ءسوزدى شىعىن قىلۋدىڭ ءوزى ارتىق. ساناسىز دەيتىن جانۋارلار دا ىشتەن شىققان بالاسىن قورعاشتاپ, جان-ءتانىمەن قامقور بولىپ جاتادى عوي. ال قاراقان باسىنىڭ عانا قامىن ويلايتىن تاسجۇرەكتەر توعىز اي بويى كوتەرگەن جان يەسىن ادام بالاسى دەپ تانىمايدى.
وسىندايلاردىڭ ارامىزدا بولماۋى ءۇشىن بارشامىز بولىپ, قوعام بولىپ, ونىڭ ىشىندە مەملەكەتتىك ورگاندارىمىز بولىپ, اتالعان سوراقىلىقتىڭ الدىن الۋ ءۇشىن باتىل ارالاسۋىمىز كەرەك. ويتكەنى, مۇنى قوعامىمىزدىڭ ورتاق دەرتى دەپ قابىلداعان ءجون. ال ول ءۇشىن, الدىمەن, قىز بالانىڭ ءتاربيەسىنە قاتتى نازار اۋدارىلۋى كەرەك. بارلىق مەكتەپتەر مەن ورتا جانە ارناۋلى وقۋ ورىندارىندا, ءتىپتى جوعارى وقۋ ورىندارىندا قىز بالالارعا ارنالعان اقىل-كەڭەس بەرەتىن ساباقتار ءجيى وتكىزىلىپ تۇرعانى ابزال. وعان ءتاجىريبەلى, اقىلمان انالار, مەديتسينا, پسيحولوگيا, سوتسيولوگيا سالاسىنىڭ ماماندارى دا قاتىسىپ, قىزداردىڭ كوزىن اشىپ, كوڭىل كوكجيەگىن كەڭىتىپ وتىرۋلارى كەرەك. قىز بالانى تاربيەلەۋ دەگەن ءسوز – ۇلتتى تاربيەلەۋ دەگەن ءسوز ەكەنىن ەستەن شىعارمايىق.
وسى ورايدا, تومەندەگى ماسەلەلەرگە باسا نازار اۋدارىلۋى كەرەك دەپ سانايمىن. وعان اتالعان ماسەلەگە تىكەلەي نەمەسە جاناما قاتىسى بار بارلىق مەملەكەتتىك, سونداي-اق, ۇكىمەتتىك ەمەس ۇيىمدار اتسالىسۋى ءتيىس دەپ ەسەپتەيمىن.
بىرىنشىدەن, دەنساۋلىق ساقتاۋ مينيسترلىگى جەتكىنشەك قىزداردىڭ جەتىلۋى كەزەڭى مەن جۇكتى انالاردىڭ ەسەپكە تۇرۋىن باقىلاۋدى ءجىتى قاداعالاۋى كەرەك. بارلىق ءبىلىم وشاقتارىندا ءتاربيەگە قايشى كەلەتىن ولقىلىقتاردى جويۋ ءۇشىن رۋحاني-ادامگەرشىلىك قۇندىلىقتى ۇلىقتايتىن ارنايى باعدارلاما تۇزىلسە ارتىقتىق ەتپەيدى. سونداي-اق, وتباسى – ورتاسى – ءبىلىم وشاعى ۇشتاعانىنىڭ بىرلەسىپ اتقارار جۇمىستارىن ۇيلەستىرۋگە نازار اۋدارۋ قاجەت.
ەكىنشىدەن, كۇن ۇزىن ناپاقاسىن تابۋمەن ءجۇرىپ, باۋىر ەتى – بالاسىنىڭ ءتاربيەسىن كەيىنگە ىسىرا بەرەتىن كەيبىر اتا-انالارمەن جۇمىس جۇرگىزۋدى باستاۋ كەرەك. ونىڭ ۇستىنە, بۇگىندە رەسپۋبليكانىڭ تۇكپىر-تۇكپىرىندە «ءۇمىت» ۇيلەرى مەن «ءۇمىت» توپتارىندا 333 ءسابي تاربيەلەنۋدە. اتالعان ۇيلەر – «وت باسقان» انالار تىعىرىقتان شىعار بىردەن-ءبىر جول. وسى ىسپەتتى ورىنداردىڭ بار ەكەندىگى تۋرالى جاۋاپتى ماماندار تاراپىنان جاستارعا كەڭىرەك ءتۇسىنىك جۇمىستارىن جۇرگىزۋ جانە تانىستىرۋ;
ۇشىنشىدەن, ايەلدەر icتەرى جانە وتباسى ماسەلەلەرىمەن اينالىساتىن مەملەكەتتىك, ۇەۇ, قوعامدىق ۇيىمداردىڭ وسى تاراپتارداعى ءىسىن ءبىر ارناعا توعىستىرساق, تەك ۇتاتىنىمىز انىق. بۇعان قوسا, وسىعان دەيىن دە دەپۋتاتتار تاراپىنان كوتەرىلىپ جۇرگەن «بەبي-بوكس» اتالاتىن «ءۇمىت بەسىكتەرى» بۇگىندە ءبىراز ەلدە بار. وسىنى ءبىزدىڭ ەلدە دە مەملەكەتتىك دارەجەدە قابىلداسا قايتەر ەدى؟
مەنىڭ وسى دەپۋتاتتىق ساۋالىمدى قولداپ, «نۇر وتان» پارتياسى فراكتسياسىنداعى ارىپتەستەرىم ز.باليەۆا, و.وكسىكباەۆ, س.ۇمبەتوۆ, و. شيشيگينا گ.شيپوۆسكيح, ي.ۋنجاكوۆا جانە قازاقستاننىڭ كوممۋنيستىك حالىق پارتياسى فراكتسياسى اتىنان ي.سميرنوۆا قول قويدى. وسىنشا دەپۋتاتتى مازالاپ وتىرعان ماسەلەگە ۇكىمەت تاراپىنان دا ءتيىستى دەڭگەيدە نازار اۋدارىلىپ, وڭ شەشىم قابىلدار دەگەن ۇمىتتەمىن.
باقىتگۇل حامەنوۆا,
ءماجىلىس دەپۋتاتى
