شاردارا اۋدانى جاۋشىقۇم اۋىلىنداعى «تۇرار» شارۋا قوجالىعىنىڭ باسشىسى يۋري اننىڭ ءىسكە كىرىسەردە قولىنا كۇرەك پەن كالكۋلياتوردى قاتار العانى بايقالىپ تۇر. شارۋا قوجالىعى يننوۆاتسيالىق ءادىس بويىنشا پياز ەگۋدە. بۇل ىسپەن سوڭعى بەس جىلدان بەرى اينالىسىپ كەلە جاتقان شارۋاشىلىق بيىلعى جىلى 30 گەكتار القاپقا «رانكو» دەپ اتالاتىن جاڭا تۇقىم سورتىن ەگىپ جاتىر. ديقاندار جۋانىڭ ءونىمى بىتىك بولارىنا سەنىمدى. بۇل ورايدا ولار يننوۆاتسيالىق ءادىستى زاماناۋي تەحنيكامەن جۇزەگە اسىرۋدا. وڭدەلىپ, تولىق دايىندالعان القاپقا تۇقىم سەۋىپ بارا جاتقان الگى زاماناۋي تەحنيكاڭىز ءبىر مەزەتتە بىرنەشە جۇمىستى اتقارىپ شىعادى. تالاپقا ساي قاشىقتىقتا, ياعني ءبىر-ءبىرىنىڭ اراسىن 3 سانتيمەتردەن ەتىپ تۇقىم تاستاۋمەن قاتار, تامشىلاتىپ سۋاراتىن سۋ تۇتىگىن قوسا كومەدى. شىعىسى مەن كىرىسىن ەسەپشوتقا سالعان يۋري اننىڭ ايتۋىنشا, ءبىر گەكتارعا 6 كەلىدەي تۇقىم كەتەدى ەكەن. جوعارى سورتتى تۇقىمنىڭ ءبىر كەلىسى 64 مىڭ تەڭگە تۇرادى. جەردى جىرتۋدان باستاپ, جيىن-تەرىم ناۋقانىنا دەيىنگى جالپى شىعىننىڭ كولەمى ءار گەكتارعا 1 ملن 300 مىڭ تەڭگەدەن جۇمسالادى. دەگەنمەن, تۇسكەن ءونىم كەتكەن شىعىندى ەسەلەپ جابادى ەكەن. ديقاننىڭ ەسەبىنشە, ءبىر گەكتار القاپتان ەڭ كەمىندە 80 توننا ءونىم الىنادى. پيازدىڭ باعاسى 45-50 تەڭگەدەن تومەن تۇسپەگەنىن ەسكەرسەك, پايدانىڭ از بولمايتىنىن اڭعارامىز.
وتكەن جىلى گەكتارىنا 80 توننادان ءونىم العان شارۋا قوجالىعى بيىل بۇل كورسەتكىشتى 100 تونناعا جەتكىزۋدى جوسپارلاپ وتىر. سۇرىپتاۋدان وتكەن جاڭا تۇقىم سورتىن العان شارۋاشىلىقتىڭ تەحنيكاسى جەتكىلىكتى, جەر القاپتارى بابىندا بولعاندىقتان ديقاندار جوسپار ورىندالاتىنىنا سەنىمدى. ديقاندار سەنىمىن اۋدان اكىمى بولاتبەك قىستاۋوۆ نىعايتا ءتۇستى. شارۋاشىلىقتىڭ جاي-كۇيىمەن تانىسۋعا بارعان اۋدان باسشىسى ديقاندار ءۇشىن وزەكتى بولىپ تۇرعان سۋلاندىرۋ ماسەلەسى بويىنشا جۇمىس ءجۇرىپ جاتقانىن مالىمدەدى. بۇل جۇمىس وڭتايلى شەشىمىن تاپقان كەزدە «تۇرار» شارۋاشىلىعىنا قاراستى 286,5 گەكتار القاپقا ءتۇرلى داقىلدار وتىرعىزىلماق. ايتا كەتەلىك, جاۋشىقۇمنىڭ جۋاسى وڭتۇستىك تۇرعىندارىنىڭ سۇرانىسىنا يە, وبلىس ورتالىعىنداعى ساۋدا ورىندارىندا قىس بويى ساتىلۋى سوزىمىزگە دالەل.
عالىمجان ەلشىباي, «ەگەمەن قازاقستان»
