قورعانىس مينيسترلىگى ءباسپاسوز قىزمەتىنىڭ حابارلاۋىنشا, مينيسترلىك شاراعا دايىندىقتى باستاپ تا كەتكەن. ۆەدومستۆو باسشىسى, گەنەرال-پولكوۆنيك ساكەن جاسۇزاقوۆ كوشپەلى جۇمىس كەڭەسىن وتكىزىپ, اسكەري شەرۋدى ۇيىمداستىرۋ جونىندە ناقتى تاپسىرمالار بەردى.
شيرەك عاسىرلىق تاريحي داتاعا وراي وتەتىن شەرۋدىڭ وزىندىك ەرەكشەلىكتەرى بار. جۇمىلدىرىلعان جەكە قۇرام مەن اسكەري تەحنيكا سانىنىڭ كوپتىگى بويىنشا بۇل شەرۋ بۇعان دەيىنگى شەرۋلەردىڭ بارلىعىنان اسىپ تۇسپەك.
– تاۋەلسىزدىك الاڭىندا شامامەن 30 جاياۋ پارادتىق ەسەپتوپ, ياعني قۇرامىندا 5 مىڭنان استام اسكەري قىزمەتشى سالتاناتتى مارشپەن ادىمداپ وتەدى. 300-گە تارتا بىرلىك اسكەري تەحنيكا تارتىلادى. قازاقستاندىق اۆياتسيانىڭ كوك اسپانداعى قۋاتى مەن جاۋىنگەرلىك ازىرلىگىن ەلىمىزدىڭ اۋە قورعانىسى كۇشتەرىنىڭ شامامەن 80 بىرلىك اۆياتسيالىق تەحنيكاسى پاش ەتەدى. بۇل رەتتە, قازاقستاندىقتار العاش رەت ءوز كوزدەرىمەن 2016 جانە 2017 جىلدارى اسكەرىمىزدىڭ ارسەنالىن تولىقتىرعان سۋ جاڭا اسكەري تەحنيكانى, زاماناۋي قارۋ-جاراق ۇلگىلەرىن تاماشالاپ, ءوز باعالارىن بەرە الادى, – دەپ حابارلادى قورعانىس مينيسترلىگىنىڭ ءباسپاسوز قىزمەتى.
پارادتىڭ تاعى ءبىر ەرەكشەلىگى, وعان قازاقستان قارۋلى كۇشتەرىنىڭ ارداگەرلەرى, «جاس ۇلان» اسكەري مەكتەبىنىڭ تاربيەلەنۋشىلەرى, اۋماقتىق قورعانىس بريگاداسىنىڭ روتاسى, اسكەري-پاتريوتتىق كلۋبتاردىڭ تاربيەلەنۋشىلەرى, قورعانىس مينيسترلىگى اسكەري-تەحنيكالىق مەكتەپتەرىنىڭ شاكىرتتەرى قاتىسادى. اتالعان ىس-شارانىڭ نەگىزگى ءتۇيىنى ءالى قۇپيا رەتىندە ساقتالۋدا.
قارۋلى كۇشتەر باسشىلىعى اسكەري قىزمەتشىلەردى ىرىكتەۋ جانە تەحنيكانى دايىنداۋدى باستاپ كەتكەن. بۇل شەرۋ مەرەكەلىك ءىس-شارا عانا ەمەس, تول اسكەرىمىزدىڭ قۋاتىن, قارۋلى كۇشتەردىڭ تەحنيكالىق تۇرعىدا جابدىقتالۋىن, ەلىمىز بەن حالقىمىزدىڭ ەگەمەندىگى مەن قاۋىپسىزدىگىن كۇزەتىپ جۇرگەن اسكەري قىزمەتشىلەردىڭ جاۋىنگەرلىك ازىرلىگى مەن جاۋىنگەرلىك قابىلەتىن كورسەتۋ بولىپ تابىلادى. بۇعان دەيىن ۇلى وتان سوعىسىنداعى جەڭىستىڭ 70 جىلدىعىنا ارنالعان شەرۋ دە كوپشىلىكتىڭ ەسىندە.
2015 جىلعى وتكەن وسى شارادا ۇوس جىلدارىنداعى جانە قازىرگى زامانعى قازاقستاندىق ارميانىڭ اسكەري تەحنيكاسىنىڭ ۇلگىلەرى حالىق نازارىنا ۇسىنىلعان بولاتىن.
ارنۇر اسقار, «ەگەمەن قازاقستان»
