يراننىڭ مۇناي ءمينيسترى بيجان نامدار زانگانە وتكەن جىلدىڭ جەلتوقسانىندا قابىلدانعان مۇناي ءوندىرىسى كولەمىن ازايتۋ تۋرالى وپەك+ (ۇيىمعا مۇشە جانە مۇشە ەمەس ەكسپورتتاۋشى ەلدەر) ەلدەرىنىڭ كەلىسىمى جىلدىڭ ەكىنشى جارتىسىنان كەيىن دە كۇشىندە بولۋى مۇمكىن ەكەنىن ايتتى.
ەستەرىڭىزگە سالا كەتەيىك, 2017 جىلدىڭ 1 قاڭتارىنان باستاپ اتالعان مەملەكەتتەر جىلدىڭ ءبىرىنشى جارتىسىنا دەيىن مۇناي ءوندىرىسى كولەمىن تاۋلىگىنە 1,8 ملن باررەلگە ازايتۋعا كەلىسكەن ەدى.
«مەنىڭ ويىمشا, وپەك مۇشەلەرى مەن ۇيىمعا كىرمەيتىن ەكسپورتتاۋشى ەلدەر كەلىسىمنىڭ شارتىن جىلدىڭ ەكىنشى جارتىسىنان كەيىن دە ءوز كۇشىندە ساقتاۋعا مۇددەلى بولىپ وتىر. دەگەنمەن, ناقتى شەشىمگە كەلۋ ءۇشىن ۋاقىت كەرەك", - دەدى مينيستر ماسكەۋگە جاساعان ساپارىندا.
يران وسى كەلىسىمدى سوزۋعا مۇددەلى مە دەگەن سۇراققا بيجان زانگانە: «وپەك+ ەلدەرىنىڭ بارلىعى ءبىر اۋىزدان كەلىسۋى كەرەك دەپ ويلايمىن» دەپ جاۋاپ بەردى.
وتكەن اپتا سوڭى كۋۆەيتتە وپەك+ ەلدەرى كوميتەتىنىڭ مۇناي ءوندىرىسى كولەمىن قىسقارتۋ تۋرالى كەلىسىمنىڭ ورىندالۋىن باقىلاۋ جۇمىسىنىڭ وتىرىسى ءوتىپ, وندا وپەك باس حاتشىسى مۇحاممەد باركيندو كەلىسىمنىڭ ورىندالۋ كەستەسىنە كوڭىلى تولاتىنىن ايتقان ەدى.
ايتا كەتەيىك, بىرەر اپتا بۇرىن باركيندو اتالعان 1,8 ملن باررەللىك قىسقارتۋدىڭ قازىرگى تاڭدا 93 پايىزعا دەيىن ورىندالعانىن ايتقان بولاتىن.
ءوز كەزەگىندە قازاقستان وزىنە تيەسىلى 20 مىڭ باررەلدى ارتىعىمەن ورىنداپ تاستاعانىن حابارلاعان ەدىك.
