جامبىل جەرىنە قىرعىز دەلەگاتسياسىن تالاس وبلىسىنىڭ گۋبەرناتورى دايىر كەنەكەەۆ ءوزى باستاپ كەلدى. قۇرمەتتى قوناقتاردى وبلىس اكىمى كارىم كوكىرەكباەۆ قارسى الىپ, بۇل جارمەڭكە ەكى ەل اراسىنداعى ىنتىماقتاستىقتى ودان ءارى ارتتىرا تۇسەتىندىگىن ايتىپ ءوتتى. ءوز كەزەگىندە تالاس وبلىسىنىڭ گۋبەرناتورى دايىر كەنەكەەۆ تە تاراز قالاسىنداعى جارمەڭكە وتە جوعارى دەڭگەيدە ۇيىمداستىرىلعانىن جەتكىزدى.
جامبىل وبلىسىنىڭ بايزاق, جامبىل, جۋالى, تالاس, سارىسۋ اۋداندارى جانە تاراز قالاسى مەن قىرعىز رەسپۋبليكاسىنىڭ تالاس وبلىسى اۋىل شارۋاشىلىق تاۋار وندىرۋشىلەرىنىڭ قاتىسۋىمەن وتكىزىلگەن جارمەڭكەدە 200 تونناعا جۋىق اۋىل شارۋاشىلىعى تاۋارى ساۋدالاندى. اتاپ ايتقاندا, قىرعىزستاننان 100 تونناعا جۋىق الما, كارتوپ, فاسول, پياز, قىرىققابات, ەت جانە ءسۇت ونىمدەرى, سونىمەن قاتار جەمىس-جيدەك كوشەتتەرى جەتكىزىلدى. ال, جامبىل وبلىسىنان ەت, ءسۇت, كونديتەرلىك جانە ماكارون ونىمدەرى, بالىق تاعى دا باسقا اۋىل شارۋاشىلىعى تاۋارلارى وتكەرىلدى.
جالپى, جارمەڭكەگە ۇسىنىلعان تاۋار قۇنى 65 ميلليون تەڭگەنى قۇرادى. سونداي-اق, جارمەڭكەدە ونىمدەر بازار نارقىنان 10-17 پايىزعا ارزان باعاعا ساۋدالاندى. جارمەڭكە بارىسىندا ورتالىق الاڭدا كيىز ۇيلەر تىگىلىپ, قىرعىزستان رەسپۋبليكاسىنىڭ ەڭبەك سىڭىرگەن ونەرپازدارى جامبىل جۇرتشىلىعىنا ءوز ونەرلەرىن پاش ەتتى.
بۇگىندە جامبىل وبلىسى مەن تالاس وبلىسىنىڭ ءوزارا ىنتىماقتاستىعى ارتىپ كەلەدى. جىل باسىندا وبلىس اكىمى كارىم كوكىرەكباەۆ باستاعان جامبىلدىق دەلەگاتسيا تالاس وبلىسىندا ارنايى بولىپ, ەكى ەل اراسىنداعى ءوزارا ىنتىماقتاستىقتى ارتتىرۋ بويىنشا بىرقاتار مەموراندۋمدارعا قول قويعان ەدى. سونداي-اق, ساۋدا-ساتتىق سالاسىنداعى ماڭىزدى ماسەلەلەردى شەشۋ, ازىق-ت ۇلىك تاۋارلارىن ەشبىر كەدەرگىسىز جامبىل وبلىسىنىڭ ساۋدا نۇكتەلەرىنە جەتكىزۋ جانە اۋليەاتا وڭىرىندە قىرعىز ەلىنىڭ كاسىپكەرلەرى مەن اۋىل شارۋاشىلىعى ونىمدەرىن وندىرۋشىلەردىڭ جارمەڭكەلەرىن وتكىزۋ جايى دا تالقىلانعان بولاتىن. ناتيجەسىندە قىرعىز رەسپۋبليكاسى تاراز جەرىنە كەلىپ, جارمەڭكە وتكىزىپ قايتتى.
حاميت ەسامان, «ەگەمەن قازاقستان»
جامبىل وبلىسى
