امەريكالىق مەملەكەتتىك باسقارۋ قوعامىنىڭ (ASPA) كونفەرەنتسياسى اياسىندا اتلانتادا (اقش) «مەملەكەتتىك قىزمەتتى جەتىلدىرۋ ماقساتىنداعى ارىپتەستىك: استاناداعى مەملەكەتتىك قىزمەت سالاسىنداعى وڭىرلىك حابقا قاتىسۋشى ەلدەردەگى ۇردىستەر» اتتى ارنايى سەسسيا ءوتتى.
قاتىسۋشىلارعا استاناداعى مەملەكەتتىك قىزمەت سالاسىنداعى وڭىرلىك حابتىڭ باسقارۋشى كوميتەتى توراعاسى اليحان بايمەنوۆ پەن ASPA پرەزيدەنتى دجەنيس لاچانس لەبىزدەرىن ءبىلدىردى. سەسسيانى اشا وتىرىپ, اليحان بايمەنوۆ حابقا قاتىسۋشى-ەلدەردىڭ مەملەكەتتىك قىزمەتىن جەتىلدىرۋدە امەريكالىق مەملەكەتتىك باسقارۋ قوعامىمەن ىنتىماقتاستىقتىڭ ماڭىزىن اتاپ ءوتتى.
«ايماق ەلدەرى دامۋدىڭ وزىندىك جولىن تاڭدادى, ءوز باسىمدىلىقتارىن بەلگىلەدى جانە قازىر ولار - مەملەكەتتىك قىزمەتتىڭ ءار ءتۇرلى دەڭگەيىندە. ولارداعى رەفورمالار بارىسى مادەني-تاريحي جانە الەۋمەتتىك-ەكونوميكالىق كونتەكست ارقىلى, ءارى ساياسي جىگەردىڭ بولۋىمەن انىقتالادى. سوعان قاراماستان, بۇل ەلدەردە زاماناۋي مەملەكەتتىك قىزمەت قۇرۋ بويىنشا ورتاق ۇمتىلىس بار», - دەدى اليحان بايمەنوۆ.
ورتالىق ازيا مەن كاۆكاز ەلدەرى مەملەكەتتىك قىزمەت جۇيەسىندەگى نەگىزگى ۇردىستەر جايىندا قر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى اپپارات جەتەكشىسى سايان احمەتجانوۆ, ءازىربايجاننىڭ مەملەكەتتىك ەمتيحان ورتالىعى ديرەكتورى ۆافادار ميسيروۆ, گرۋزيانىڭ مەملەكەتتىك قىزمەت بيۋروسىنىڭ ديرەكتورى ورىنباسارى مايا دۆاليشۆيلي, قىرعىزستان پرەزيدەنتى جانىنداعى مەملەكەتتىك قىزمەت اكادەمياسى رەكتورى الماز ناسىروۆ باياندادى. ال مەملەكەتتىك قىزمەتتەگى جاڭاشىل باعىتتار, ونىڭ ىشىندە ءتيىمدى, اشىق جانە ەسەپ بەرەتىن مەملەكەتتىك قىزمەتتى قالىپتاستىرۋدى كوزدەيتىن ەلەكتروندى باسقارۋدى ەنگىزۋ بويىنشا ەستونيانىڭ ەلەكتروندى باسقارۋ اكادەمياسى وكىلى حاننەس استوك ءوز ەلىنىڭ تاجىريبەسىمەن ءبولىستى.
بارلىق قاتىسۋشىلار ايماقتا مەملەكەتتى قىزمەتتى دامىتۋ بويىنشا ارىپتەستىكتىڭ ماڭىزى مەن تاجىريبە جانە ءبىلىم الماسۋدىڭ ءتيىمدى تۇعىرناماسىنا اينالعان حابتىڭ بىرەگەي ءرولىن اتاپ ءوتتى. ايماق ەلدەرىندەگى مەملەكەتتىك قىزمەت جۇيەسىندەگى ترانسفورماتسيالىق وزگەرىستەر تۋرالى تالقىلاۋلارعا تمد, كاۆكاز جانە ورتالىق ازيا ەلدەرىندەگى مەملەكەتتىك ورگاندار, وقۋ ورىندارى, حالىقارالىق ۇيىمدار وكىلدەرى – ساراپشىلار مەن پراكتيكتەر قاتىستى. حابقا قاتىسۋشى ەلدەردەگى مەملەكەتتى باسقارۋدى دامىتۋ بويىنشا وڭتۇستىك كاليفورنيا ۋنيۆەرسيتەتىنىڭ قۇرمەتتى پروفەسسورى چەستەر نيۋلاند, ASPA بۇرىنعى پرەزيدەنتى ستيۆ كوندري, نيۋ-يوركتىڭ قالالىق ۋنيۆەرسيتەتى پروفەسسورى دەمەتريوس ارگيريادەس, ورم جانىنداعى اقش-تىڭ جوعارعى مەملەكەتتىك قىزمەتكەرلەرىنىڭ بىلىكتىلىگىن ارتتىرۋ فەدەرالدى ينستيتۋتى ديرەكتورى فلەتچەر حونيمۋند سياقتى مەملەكەتتىك باسقارۋ سالاسىنداعى جەتەكشى عالىمدار مەن ساراپشىلار پىكىر الماستى. سونىمەن بىرگە مەملەكەتتىك قىزمەتتى دامىتۋداعى حابتىڭ ايرىقشا رولىنە ASPA حالىقارالىق اسسامبلەياسى قاتىسۋشىلارى دا توقتالدى. مەملەكەتتىك باسقارۋ بويىنشا حالىقارالىق تاجىريبەگە ارنالعان اسسامبلەيا سەسسياسىنا حاب وكىلدەرى ءوز ويلارىن ورتاعا سالدى.
