«2017 جىلى اۋىل شارۋاشىلىعى داقىلدارىن 22 ميلليون گەكتار القاپتا ورنالاستىرۋ جوسپارلانۋدا, بۇل 2016 جىلمەن سالىستىرعاندا 311 مىڭ گەكتارعا ارتىق. ونىڭ ىشىندە كوكتەمگى ەگىس كولەمى 18,5 ملن. گا قۇرايدى. قازاقستان رەسپۋبليكاسى اگروونەركاسىپتىك كەشەندى دامىتۋدىڭ جاڭا مەملەكەتتىك باعدارلاماسىنا سايكەس ىشكى نارىقتى وتاندىق ونىممەن تولىقتىرۋعا, قۇراما جەم جانە قايتا وڭدەيتىن كاسىپورىنداردىڭ جۇكتەمەلىگىن ارتتىرۋعا, مال شارۋاشىلىعىندا جەم-ءشوپ بازاسىن نىعايتۋ ءۇشىن ەگىستىك جەرلەردى ديۆەرسيفيكاتسيالاۋدا مىناداي جۇمىستار جۇرگىزىلۋدە»,- دەدى ق. ايتۋعانوۆ.
مال ازىعى داقىلدارىنىڭ ەگىستىك كولەمى (ارپا, س ۇلى, جۇگەرى, اسبۇرشاق, نوقات) – 206 مىڭ گا, جارما داقىلدارى – 32 مىڭ گا, مايلى داقىلدار – 60 مىڭ گا, قانت قىزىلشاسىنىڭ ەگىستىك كولەمى 7 مىڭ گا. ارتادى دەپ جوسپارلانۋدا.
سۋدى كوپ قاجەت ەتەتىن ءداندى-داقىلدار, سونىڭ ىشىندە كۇرىش كولەمىن 2 مىڭ گا, ماقتانى 4,6 مىڭ گا, بيدايدى – 338 مىڭ گا قىسقارتۋ كوزدەلۋدە. جالپى ءداندى-داقىلداردىڭ ەگىستىك القابى 15 ملن. گا قۇرايتىن بولادى, ونىڭ ىشىندە بيداي 12 ملن. گا.
سونىمەن قاتار, اعىمداعى جىلى اوك سۋبەكتىلەرىمەن كوكتەمگى ەگىس جانە ەگىن جيناۋ جۇمىستارىن جۇرگىزۋگە بولىنگەن بيۋدجەتتىك نەسيە كولەمى 60 ملرد. تەڭگە. وسى قاراجاتتاردىڭ شەڭبەرىندە جالپى 3 ملن. گا ەگىستىك القاپتى قامتي وتىرىپ, 1500 اوك سۋبەكتىلەرىن قارجىلاندىرۋ كوزدەلىپ وتىر.
وسى رەتتە, مەملەكەتتىك قاراجاتتاردى پايدالانۋدىڭ تيىمدىلىگىن جانە قايتا وڭدەۋمەن اينالىساتىن كاسىپورىنداردىڭ جۇكتەمەلىگىن ارتتىرۋ ماقساتىندا قارجىلاندىرۋ تەتىكتەرى باسىڭقى باعىتتار بويىنشا جۇزەگە اسىرىلادى. اتاپ ايتقاندا, ءبىرىنشى كەزەكتە مايلى داقىلدار مەن مال ازىعى داقىلدارى قارجىلاندىرىلادى.
ق.ايتۋعانوۆتىڭ ايتۋى بويىنشا, جاڭا مەملەكەتتىك باعدارلامانىڭ اياسىندا اۋىل شارۋاشىلىعى تاۋار وندىرۋشىلەرىن جوعارعى ساپالى تۇقىممەن قامتاماسىز ەتۋ ماقساتىندا تۇقىم شارۋاشىلىعىن قولداۋ مەحانيزمى جەتىلدىرىلدى. مىسالى, اعىمداعى جىلدان باستاپ بىرەگەي جانە ەليتالىق تۇقىمداردى سۋبسيديالاۋ قايتادان باستالاتىن بولادى, ال ءبىرىنشى رەپرودۋكتسيالى تۇقىمدار تەك باسىمدى داقىلدار بويىنشا جانە ەڭ تومەنگى نورماسىز سۋبسيديالاناتىن بولادى. بۇدان باسقا جەمىس-جيدەك داقىلدارى مەن ءجۇزىمنىڭ ەليتالىق كوشەتتەرى جانە ءبىرىنشى ۇرپاقتى بۋداندارىن سۋبسيديالاۋ جالعاستىرىلاتىن بولادى.
2017 جىلى 2,4 ملن. توننا اۋىل شارۋاشىلىعى داقىلدارىنىڭ تۇقىمى دايىندالدى.
اعىمداعى جىلى مينەرالدى تىڭايتقىشتاردى سۋبسيديالاۋ ءۇشىن 13 ملرد. تەڭگە ءبولىندى, بۇل بىلتىرعى جىلمەن سالىستىرعاندا 2 ملرد. تەڭگەگە ارتىق.
كوكتەمگى ەگىس جۇمىستارى باستالعان ۋاقىتتان باستاپ ءار ون كۇن سايىن مينەرالدى تىڭايتقىشتاردى جونەلتۋ بويىنشا مونيتورينگ جۇرگىزىلىپ وتىرادى.
2017 جىلعى كوكتەمگى دالا جۇمىستارىن ۋاقىتىلى جۇرگىزۋدى قامتاماسىز ەتۋ ماقساتىندا 375 مىڭ توننا مولشەرىندە قاجەتتى ديزەل وتىنىنىڭ كولەمى ايقىندالدى, ونىڭ ىشىندە 148 مىڭ توننا ناۋرىز ايىنا بەكىتىلدى. ناۋرىز ايىنا بەكىتىلگەن باعا ليترىنە 105 تەڭگە. نارىقتىق باعا ليترىنە 130 تەڭگە بولعاندا, وپەراتورلاردىڭ شىعىنىن ەسكەرە وتىرىپ, اۋىل شارۋاشىلىعى تاۋار وندىرۋشىلەرى ءۇشىن ليترىنە 120 تەڭگەنى قۇرايدى.
