ءار ايتىستىڭ ءوز جاڭالىعى بار. جاڭالىعى جوق ايتىس حالىق تاراپىنان جىلى قابىلدانبايدى دا. جاس اقىنداردىڭ 12 جۇبى ءسوز سايىستىرعان ايتىس مازمۇنى جاعىنان باي, قوعامداعى كۇرمەۋى قيىن تاقىرىپتاردى كوركەم ويمەن بايلانىستىرا قوزعاۋىمەن بايىرعى قۇندىلىعىن ارتتىرا تۇسكەندەي اسەردە قالدىردى. ايتىسكەرلەر ەركىن وي تولعاپ, وزەكتى ماسەلەنى ءدوپ تاۋىپ, كەڭ كوسىلە قۇلاشتاپ جىرلاۋىمەن ايتىس ونەرىنە وزىنشە ورنەك سالدى.
الماتى, استانا, قوستاناي, اقتاۋ, تاراز, قىزىلوردا, قاراعاندى, ورال, اقتوبە قالالارىنان كەلگەن جاسى 30-عا جەتپەگەن سۋىرىپسالما جۇيرىكتەر ايتىس كورىگىن, نەگىزىنەن, ءبىلىم مەن عىلىم تاقىرىبى توڭىرەگىندە قىزدىردى. اقىنداردىڭ ءبىرى ستۋدەنت, ءبىرى مۇعالىم بولعاندىقتان, بۇل سالاداعى ماسەلەمەن جەتە تانىس ەكەنىن ءار سوزىمەن دالەلدەپ, تىڭ تەڭەۋلەرىمەن تانىتتى.
«بىلىمدىگە دۇنيە جارىق» اتاۋىن ۇران ەتىپ العان ۇيىمداستىرۋشىلار «ءبىلىمسىزدىڭ كۇنى عارىپ» ەكەنىن اقىنداردىڭ ورنەكتى ويىمەن, كەستەلى تىلىمەن كوپشىلىككە جەتكىزۋدى مۇرات تۇتقانى ايقىن. ءبىلىم مۇحيتىنان ماڭىزدىسى مەن ءنارلىسىن ءسۇزىپ الىپ, ەڭبەكپەن ەل كوشىن العا سۇيرەيتىن, بولاشاقتىڭ تىزگىنىن ۇستايتىن ءبىلىمدى جاستار ەكەنىن ءار اقىن شۋماقتارىمەن شىمىر ورە ءبىلدى. ازىرگە الامان ايتىستاردا توپ جارعان ءدۇلدۇل بولماسا دا, الداسپان ءسوزدىڭ دوداسىنا باستاپ بارار العاشقى باسپالداق وسى تاقىلەتتەس سايىس بولاتىندىقتان, جاس جۇيرىكتەر توسىلىپ قالماۋعا تىرىسىپ, جانىن سالدى. يىعىنا «ايتىس اقىنى» دەگەن ۇلكەن اتاقتى ىلگەنىمەن, وردا بۇزار جاسقا جەتە قويماعاندىقتان, جاس اقىن ەسەبىندە كەلگەن جۇيرىكتەر ءبىر-ءبىرىمەن ادەمى ءازىل-قالجىڭ جاراستىردى. جىگەرلى جاستىققا ءتان قاسيەتتىڭ ءبىرى قالجىڭ بولعاندىقتان, ونىسى جانە جاراسىمدى شىقتى.
«شىمكەنتتىڭ قىزىن سۇيگەن ەم, قالىڭمالىن ەستىگەن سوڭ, جالعىز قايتتىم ۇيگە مەن», دەگەن سەكىلدى جولدار كۇلكى شاقىرعانىمەن, بۇل اقىننىڭ ەسكى ءداستۇردىڭ الەۋمەتتىك استارىنا جاڭاشا قاراۋعا شاقىرعان تۇسپالى سەكىلدى سەزىلدى. ءاسىرەسە, اقتاۋلىق جاس اقىن اباي جولماعامبەتوۆتىڭ جوعارى وقۋ ورىندارىنداعى ساباعىنا سالعىرت قاراپ, ناتيجەسىندە, قانداي ماماندىقتى وقىپ شىققانىنان حابارى جوق ستۋدەنتتەردى سىن ساداعىنا الا وتىرىپ: «ەكى بەتى قىزارماي, ەڭ سوڭىندا, ديپلومى قىزارىپ شىعا كەلەد» دەگەن اششى ءسوزى بۇگىنگى ءبىلىم جۇيەسىندەگى بەتى بۇركەمەلەنىپ جۇرگەن شىندىقتىڭ پەردەسىن سىپىرعانداي بولدى. ا.جولماعامبەتوۆ وسى ايتىستاعى ۋىتتى ويىن ۇتىمدى ازىلمەن ارلەندىرىپ, سىپايى سوزبەن ەكىجۇزدىلىك پەن وتىرىكتىڭ تەرىسىن سىدىرىپ, كوپشىلىكتىڭ كوڭىلىنەن شىققان بىردەن-ءبىر اقىن ەكەنىن دالەلدەدى.
سونىمەن, ايتىستىڭ باس ءجۇلدەسىن تارازدىق اسەت دۇيسەباەۆ ەنشىلەدى. ال ءبىرىنشى ورىن ورالدان كەلگەن «قادىر مىرزا ءالى» ورتالىعىنىڭ جاس مامانى تالعات مىقيعا بۇيىردى. حالىق لىق تولعان ستۋدەنتتەر سارايىندا وتكەن ءسوز دوداسىنا استانادان كەلگەن 8-سىنىپ وقۋشىسى دياس وتەپبەرگەن دە قاتىسىپ, بالعىندىعىنا قاراماستان سۋىرىپسالما ءسوز ونەرىندە تايتالاسا الار تەگەۋرىنى, كەم تۇسپەيتىن كەلەشەگى بارىن بايقاتتى. شاقتاۋلى شاعىن ورتادا شاماسىنا قاراي شاپقان ءار اقىندى ەكپىنىنە قاراي ەكشەپ, الداعى ءدۇبىرلى جارىستار الدىنداعى اششى تەرىن سىپىرعان ايتىس قوعامعا دا, بيلىككە دە وي سالۋىمەن ءوز ماقساتىن ورىندادى.
ايگۇل احانبايقىزى, «ەگەمەن قازاقستان»
الماتى
