– مەكتەبىمىزگە اباي اتى تەگىننەن-تەگىن بەرىلىپ وتىرعان جوق. بۇل وقۋ ورنىندا جۇيەلى تۇردە جۇمىس ىستەپ كەلە جاتقان اقىندار سىنىبى بار. اباي وقۋلارىنىڭ جەڭىمپازدارى دا جەتەرلىك. ءارى قاراي دا اقىن رۋحىن اسقاقتاتا بەرەمىز دەپ ويلايمىن, – دەدى سالتاناتتى راسىمدە ءسوز العان مەكتەپ ديرەكتورى ەسىمحان اكىتباەۆ.
قازاقتىڭ باس اقىنىنىڭ ەسىمى ۇلىقتالىپ, قۇرمەتتەلىپ جاتقاندا, جاس اقىندار قاراپ قالا ما؟! ءبىلىم ورداسىنداعى اقىندار سىنىبىنىڭ تالىمگەرلەرى جىردان شاشۋ شاشتى. وسى مەكتەپتىڭ 10-سىنىپ وقۋشىسى قۇندىز تاسقىنبەكقىزىنىڭ «جاۋقازىن جىر» اتتى تىرناقالدى كىتابىنىڭ تۇساۋكەسەر ءراسىمىنىڭ ءوتۋى دە شارانىڭ شىرايىن كىرگىزە تۇسكەندەي بولدى.
تاعى ءبىر جاعىمدى جاڭالىق, بۇل كۇنى مەكتەپ ىشىندە اباي قۇنانباي ۇلى اتىنداعى شاعىن مۇراجاي سالتاناتتى تۇردە اشىلدى. بۇل جەردە اقىننىڭ ءومىرى مەن شىعارماشىلىعىنان سىر شەرتەتىن قۇندى ماعلۇماتتارمەن قاتار, كەلى-كەلساپ, ات ابزەلدەرى سىندى ۇلتتىق جادىگەرلەرگە دە ورىن بەرىلىپتى.
شارا سوڭىندا وسكەمەن قالاسىنىڭ قۇرمەتتى ازاماتى ەسىم اكىتباەۆ, وسكەمەن قالاسىنىڭ جەرگىلىكتى ءوزىن-ءوزى باسقارۋ كوميتەتىنىڭ جەتەكشىسى سەرىك ورازباي ۇلى ءتۇرلى سايىستاردا مەكتەپتىڭ اتىن اسقاقتاتىپ جۇرگەن تالانتتى وقۋشىلاردى «اباي» ءتوسبەلگىسىمەن ماراپاتتادى.
رەتى كەلگەندە ايتا كەتەيىك, بىلتىر ەل تاۋەلسىزدىگىنىڭ 25 جىلدىعىنا وراي وڭىردەگى بىرقاتار ءبىلىم وشاقتارىنا قازاقتىڭ ۇلى تۇلعالارىنىڭ ەسىمدەرىن بەرۋ تۋرالى شەشىم قابىلدانىپ, وسكەمەندەگى ەكى مەكتەپكە ويشىل اقىن شاكارىم مەن عالىم زاكي احمەتوۆتىڭ اتى بەرىلگەن بولاتىن.
ازامات قاسىم, «ەگەمەن قازاقستان»
وسكەمەن
