ارينە, تۋريزم سالاسى وزدىگىنەن دامي بەرەتىن سالا ەمەس. وعان قوماقتى قارجى قۇيۋ جانە تەحنولوگيالىق جەتىستىكتەردى ەندىرۋ كەرەكتىگى تۇسىنىكتى. وسى تۇرعىدان كەلگەندە, بۇل ماسەلە مەملەكەت-جەكەمەنشىك ءارىپتەستىگى نەگىزىندە شەشۋدى قاجەت ەتەدى. مىسالى, وڭتۇستىك كورەيادا بىرقاتار تاۋ شاڭعىسى بازالارى مەملەكەت قارجىسىنا سالىنىپ, جەكەمەنشىككە بەرىلگەن. ولاي بولسا, كورەيالىقتاردىڭ بۇل ۇلگىسى قازاقستان جاعدايىنا جاراپ جاتىر. ويتكەنى, ەلىمىزدەگى كوپتەگەن تۋريستىك وپەراتورلاردىڭ تابىسى ماردىمسىز. ولاردىڭ وزدىگىنەن ينۆەستيتسيالىق جوبالاردى جۇزەگە اسىرۋعا قاۋقارسىز بولۋى دا سوندىقتان. جازى اپتاپ ىستىق, ال قىسى ايازدى كەلەتىن قازاقستان جاعدايىندا تۋريزمنەن تابىس تابۋ وڭاي ەمەس ەكەنى دە بەلگىلى. قىسقى ازىعىن جازدا جيناپ الاتىن تۋريستىك وپەراتورلار امالسىز ءوز قىزمەتتەرىنىڭ باعاسىن وسىرۋگە ءماجبۇر. قىستا قارلى بوران جولداردى جاۋىپ, اياز بەتتى قاريتىنىن ەسكەرسەك, كەز كەلگەن ادام وسىندا كەلمەس بۇرىن تابيعاتتىڭ قولايلىلىعىن زەرتتەپ الاتىنى تاعى راس.
سولاي دەسەك تە, بۇل سالادا ايتارلىقتاي ىلگەرىلەۋشىلىكتەر بار. سوڭعى جىلدارى كوپتەگەن قوناق ۇيلەر مەن مەيرامحانالار سالىنىپ, قىزمەت كورسەتۋ ساپاسى ايتارلىقتاي ارتتى. ەلىمىزدىڭ ەكى باستى قالاسىنا – استانادا ەكسپو-2017 حالىقارالىق كورمەسىن, ال الماتىدا قىسقى ۋنيۆەرسيادا وتكىزۋ تۋريزم سالاسىنىڭ دامۋىنا وزىندىك سەرپىن بەرەدى دەپ كۇتىلۋدە.
قازىردىڭ وزىندە بىرقاتار حالىقارالىق تۋريستىك وپەراتورلار مەن باسىلىمداردىڭ ورتالىق ازيانى, سونىڭ ىشىندە قازاقستاندى تارتىمدى باعىتتاردىڭ قاتارىنا قوسۋى وسىنداي يگى ىستەردى ەسكەرگەندىكتەن دەپ ايتۋعا نەگىز بار. اتاپ ايتقاندا, امەريكالىق The New York Times گازەتى 2017 جىلى بارۋعا بولاتىن الەمدەگى 52 ەلدىڭ ءتىزىمىن جاريالادى. سونىڭ ىشىندە قازاقستان 26-ورىندا كورسەتىلەدى. بۇل رەتتە, ەكسپو-2017 حالىقارالىق كورمەسىنىڭ «بولاشاقتىڭ ەنەرگياسى» اتاۋىنىڭ دا وزىندىك ىقپالىنىڭ بولۋى عاجاپ ەمەس, ونىڭ ۇستىنە يۋنەسكو-نىڭ الەمدىك قۇندىلىقتار تىزىمىنە ەلىمىزدىڭ بىرقاتار نىساندارى كىرىپ وتىرعانى دا تارتىمدى ەتكەنى تۇسىنىكتى. مۇنىڭ الدىندا كانادالىق «G Adventures» تۋريستىك وپەراتورى ورتالىق ازيا ءوڭىرىن تارتىمدى ەتىپ كورسەتىپ, ءبىرىنشى ورىنعا شىعارعان-دى.
قالاي بولعاندا دا, ەلىمىز تۋريزم سالاسىن دامىتۋ باعىتىندا بىرقاتار ءىس-شارالاردى جۇزەگە اسىرىپ كەلەدى. «اتامەكەن» ۇلتتىق كاسىپكەرلەر پالاتاسى باسقارماسى ءتوراعاسىنىڭ ورىنباسارى گۇلنار قۇربانباەۆا سالا تۋرالى بىلاي دەيدى: «تۋريزم – بۇل, ەڭ الدىمەن, ەلىمىزدىڭ ءيميدجى. بىراق ارتىق راسىمدەر, شىعىندار اتالعان سالانى دامىتۋعا كەدەرگى. بۇل پروتسەستى جەدەلدەتۋ ءۇشىن قۋاتتى باسەكەلەستىك ورتا قۇرۋ كەرەك».
سۇرانىس بولعان جەردە, ارينە, باسەكەلەستىك تە جۇرەدى. بىراق تا, قىزمەت كورسەتۋ ءمادەنيەتىنىڭ قالىپتاسۋىنا دا مەملەكەتتىك قاداعالاۋ مەن قولداۋ جەتپەي جاتقاندىعىن ايتا كەتكەن ورىندى. اسىرەسە, جول بويى قىزمەت كورسەتۋ ورىندارىنىڭ سانيتارلىق تالاپقا ساي ەمەستىگى تالاي ايتىلىپ تا, جازىلىپ تا ءجۇر. ەلىمىز اۋماعىنىڭ كەڭدىگىن قاپەرگە الساق, جول بويىنداعى قىزمەت كورسەتۋ ورىندارىندا سۋ تاپشىلىعى مەن كوگىلدىر وتىن-
نىڭ, نە بولماسا ەلەكتر قۋاتىنىڭ جەتپەي جاتقاندىعى ۇنەمى سەزىلەدى. تۋريزم سالاسىنىڭ ينفراقۇرىلىمىن تولىق جۇزەگە اسىرماي, جوعارى دەڭگەيلى قىزمەت كورسەتۋ دە مۇمكىن ەمەس.
قورىتا ايتقاندا, ەلىمىزدىڭ تۋريزم سالاسىن دامىتۋ ءۇشىن, ەڭ الدىمەن, وسى سالاعا دەگەن كوزقاراستى تۇبىرىمەن وزگەرتكەن ورىندى دەر ەدىك. شەت ەلدەردە قىمباتقا تۇسەتىن قىزىلدى-جاسىلدى روۋد-شوۋلاردى قانشا كورسەتسەڭ دە, تۋريستەر ارزان باعا مەن ساپالى قىزمەت ءتۇرىن تاڭدايتىنىن قاپەردەن شىعارماعان ءجون. سوندىقتان دا تۋريستىك باعىتتاردى تارتىمدى ەتۋدىڭ تەتىكتەرىن قاراستىرىپ, ينفراقۇرىلىمدى جونگە كەلتىرگەن ابزال.
اسقار تۇراپباي ۇلى, «ەگەمەن قازاقستان»
