ۆلاديمير فووستىڭ حاباردار ەتۋىنشە, سايلاۋ زاڭناماسىنا سايكەس رەسپۋبليكانىڭ 12 وڭىرىندە ءماسليحاتتاردىڭ شىعىپ قالعان دەپۋتاتتارىنىڭ ورنىنا 57 دەپۋتاتتى سايلاۋ بولدى. سايلاۋدى ۇيىمداستىرۋ مەن وتكىزۋگە 13 وبلىستىق, 9 قالالىق, 36 اۋداندىق, 58 وكرۋگتىك, 355 ۋچاسكەلىك سايلاۋ كوميسسياسى جۇمىلدىرىلعان. ناۋقان بارىسىندا بارلىعى 201 كانديدات ۇسىنىلدى. ولاردىڭ 50-ءى وبلىستىق, 32-ءسى قالالىق جانە 119-ى اۋداندىق ءماسليحاتتارعا داۋىسقا تۇسكەن. ءۇمىتكەرلەردىڭ 62-ءسىن ساياسي پارتيالار, ال 139-ى ءوزىن ءوزى ۇسىنعان.
«وكرۋگتىك سايلاۋ كوميسسيالارى ءماسليحاتتاردىڭ دەپۋتاتتىعىنا كانديداتتار رەتىندە 188 ادامدى تىركەدى, − دەدى وسك توراعاسىنىڭ ورىنباسارى. − سايلاۋ بيۋللەتەندەرىنە 170 كانديداتتىڭ تەگى ەنگىزىلدى, دەپۋتاتتىق مانداتقا ورتاشا باسەكەلەستىك شامامەن ءۇش ءۇمىتكەردەن بولدى, 330 سايلاۋ ۋچاسكەسىندە داۋىس بەرۋ وتكىزىلدى. سايلاۋشىلاردىڭ كەلۋى 77,83 پايىزدى قۇرادى. داۋىس بەرۋ قورىتىندىلارىنا ساي 12 وبلىستىق, 9 قالالىق ءجانە 36 اۋداندىق ءماسليحات دەپۋتاتى سايلاندى».
ورتالىق سايلاۋ كوميسسياسىنىڭ مۇشەسى ءلاززات ءسۇلەيمەننىڭ ايتۋىنشا, داۋىس بەرۋ بارىسى مەن داۋىستاردى ساناۋ ءراسىمىن بايقاۋدى كانديداتتاردىڭ 398 سەنىم بىلدىرگەن ادامى, ساياسي پارتيالاردىڭ – 289, قوعامدىق بىرلەستىكتەردىڭ – 34 جانە باق-تاردىڭ 51 وكىلى جۇزەگە اسىرعان. سايلانعان ءماسليحاتتار دەپۋتاتتارىنىڭ قۇرامىندا 46 ەر ادام جانە 11 ايەل بار. ورتاشا جاستارى – 46,5. «ەڭ جاس دەپۋتات (22 جاس) قاراعاندى وبلىسىنىڭ بۇقار جىراۋ اۋدانى №1 سايلاۋ وكرۋگىندە, ەڭ ءۇلكەنى (64 جاس) تاراز قالاسى ءماسليحاتىنىڭ №22 سايلاۋ وكرۋگىندە سايلاندى. سايلانعان دەپۋتاتتاردىڭ 54-ءىنىڭ جوعارى ءبىلىمى, 3-ەۋىنىڭ ارناۋلى ورتا ءبىلىمى بار. سايلاۋ ناۋقانى سايلاۋ زاڭناماسى نورمالارىنىڭ تالاپتارىنا ءسايكەس ءوتتى. سايلاۋ كەزىندە ورتسايلاۋكومعا 3 ءوتىنىش كەلىپ ءتۇستى», − دەدى ل.سۇلەيمەن.
بريفينگ وتكىزۋشىلەر ءبىر وكرۋگتە نە سەبەپتەن سايلاۋ وتپەگەنىن دە ايتىپ بەردى. ولاردىڭ سوزدەرىنە قاراعاندا وڭتۇستىك قازاقستان وبلىسىنىڭ №11 سايلاۋ وكرۋگى بويىنشا ءماسليحاتتىڭ شىعىپ قالعان دەپۋتاتىنىڭ ورنىنا وتەتىن سايلاۋدا ءبىر كانديدات قانا قالدى. سايلاۋ زاڭناماسىنىڭ كەمىندە 2 كانديداتتىڭ باسەكەلەستىگى قاعيداتىنىڭ ساقتالۋىنا بايلانىستى اتالعان وكرۋگتە سايلاۋ بولعان جوق. بۇل وكرۋگتە سايلاۋدى وتكىزۋ تۋرالى شەشىم رەسپۋبليكانىڭ سايلاۋ زاڭناماسىنىڭ تالاپتارىنا سايكەس قابىلدانادى.
ءاليسۇلتان قۇلانباي, «ەگەمەن قازاقستان»
