وبلىستىق-اۋماقتىق سايلاۋ كوميسسياسىنىڭ ءتورايىمى انتونينا ماركوۆانىڭ مالىمەتىنشە, ءماسليحاتتاردان شىعىپ قالعان دەپۋتاتتار ورنىنا وتكىزىلگەن سايلاۋعا بارلىق سايلاۋشىلاردىڭ 64,2 پايىزى قاتىسقان.
قوستاناي قالاسىندا وبلىستىق ءماسليحاتتىڭ دەپۋتاتتىق مانداتىنا تالاسقان 5 ۇمىتكەردىڭ اراسىنان قوستاناي مەملەكەتتىك پەداگوگيكالىق ينستيتۋتىنىڭ رەكتورى ەركىن ءابىل جەڭىسكە جەتتى. ليساكوۆ سايلاۋ وكرۋگىندە سايلاۋشىلار «نۇر وتاننىڭ» وكىلى, «قازاقستان ءالليۋمينيى» اق فيليالى ديرەكتورىنىڭ مىندەتىن اتقارۋشى سەرگەي ششەلوكوۆتى تاڭدادى. مەڭدىعارا اۋدانىندا سايلاۋشىلار نەگىزگى داۋىستى «اق جول» پارتياسىنىڭ وكىلى مەڭسۇلۋ بولاتوۆاعا بەردى. قالعان جەڭىمپازدىڭ بارلىعى دا «نۇر وتان» پارتياسىنان بولدى.
وبلىستا بارلىعى 7 دەپۋتاتتىق مانداتقا 24 ۇمىتكەر باسەكەگە ءتۇستى. ولاردىڭ 23-ءى رەسمي تىركەلدى. ءبىر ۇمىتكەردىڭ قاجەتتى قۇجاتتارى بولماعاندىقتان, تىركەلگەن جوق.
ءنازيرا جارىمبەتوۆا, «ەگەمەن قازاقستان»
