ەلباسى نۇرسۇلتان نازارباەۆ بيىلعى جولداۋىندا «اعىلشىن ءتىلى – جاڭا تەحنولوگيا, جاڭا يندۋستريا, جاڭا ەكونوميكا ءتىلى. اعىلشىن ءتىلىن مەڭگەرمەي, قازاقستان جالپىۇلتتىق پروگرەسكە جەتە المايدى», دەپ دۇنيە جۇزىنە قۇلاشىن كەڭ جايعان ءتىلدى ۇيرەنۋدىڭ ماڭىزدىلىعىن ايرىقشا اتاپ وتكەن ەدى.
– ءبىز ەڭ اۋەلى وقۋشىلاردىڭ اتا-انالارى اراسىندا ساۋالناما ۇيىمداستىرىپ, «ەگەر ءبىز مەكتەپتە اعىلشىن تىلىنەن تەگىن كۋرس اشاتىن بولساق, كەلەسىزدەر مە؟» دەگەن سۇراق قويدىق. اتا-انالاردىڭ 90 پايىزى كەلەمىز دەپ جاۋاپ بەردى. ۋاقىت جاعىن دا ساۋالناما ارقىلى انىقتادىق. ءسويتىپ, كەشكى ساعات 6 مەن 7-ءنىڭ اراسىندا اعىلشىن تىلىنەن تەگىن كۋرس وتكىزەمىز دەپ كەلىستىك. مىنە, ءبىر ايداي ۋاقىت بولىپ قالدى. قازىر ەكى توبىمىز بار. ءبىزدىڭ بۇل كۋرستى اشۋداعى ماقساتىمىز – بالا مەكتەپتە ۇيرەنگەن نارسەسىن ۇيدە دە جالعاستىرسا, ءارى قاراي تەرەڭدەتسە, دامىتسا دەيمىز. وكىنىشكە قاراي, اتا-انالاردىڭ 56 پايىزى اعىلشىن تىلىنەن بالالارىنا كومەكتەسە المايدى ەكەن. ويتكەنى, اعىلشىن ءتىلىن بىلمەيدى. سوندىقتان وقۋشىنىڭ اكە-شەشەسىنىڭ ءتىل ۇيرەنگەنىنەن ۇتپاساق, ۇتىلمايتىنىمىز انىق, – دەيدى مەكتەپ-ليتسەيدىڭ ديرەكتورى سەلمان شيمشەك.
ونىڭ ايتۋىنشا, بۇل باستاما وقۋشىلاردىڭ ءتىل ءبىلۋ دەڭگەيىن كوتەرىپ قانا قويمايدى, ولاردىڭ اتا-اناسىمەن اراداعى قارىم-قاتىناستى كۇشەيتۋگە ىقپال ەتەدى, ءبىر-بىرىنە جاقىنداستىرا تۇسەدى. ويتكەنى, قازىرگى قوعامدا اتا-انا مەن وقۋشى اراسىنداعى بايلانىستىڭ السىرەپ بارا جاتقانى بەلگىلى. كەيبىر اتا-انالاردىڭ بالاسىنان گورى عالامتور مەن ۇيالى تەلەفونعا كوبىرەك كوڭىل بولەتىنى جايىندا دا از ايتىلىپ جۇرگەن جوق.
بۇل مەكتەپتىڭ وقۋشىلارىنا دا, ولاردىڭ اتا-انالارىنا دا اعىلشىن ءتىلىن ۇيرەتىپ جۇرگەن مۇعالىمنىڭ اتى – روۆەنا گابۋت. فيليپپين ەلىنەن كەلىپتى.
– «سەن نە قازاق ءتىلىن, نە ورىس ءتىلىن دۇرىس بىلمەيسىڭ. اتا-انالارعا اعىلشىن ءتىلىن قالاي ۇيرەتىپ جاتىرسىڭ؟» دەپ سۇرايدى مەنەن ءبارى. تاڭعالادى. بىراق ۇيرەتىپ جاتىرمىن. ءتاجىريبە جۇزىندە ۇيرەتىپ جاتىرمىن. ەڭ باستىسى, وقۋشىلارىما بۇرىنعىدان گورى ءبىر تابان جاقىنداي تۇسكەندەي بولدىم. ءويتكەنى, ولاردىڭ اتا-اناسىن تانىدىم. شاكىرتتەرىمە ۇيدە اعىلشىن ءتىلىن ۇيرەتەتىن, سويلەسەتىن ادام تابىلعانىنا, بەرگەن ءبىلىمىمنىڭ دالاعا كەتپەيتىنىنە قۋانىپ وتىرمىن. اتا-انالار دا جاقسى قابىلداپ جاتىر. اقىرىنداپ سويلەم قۇراۋدى ۇيرەنىپ كەلەدى, – دەيدى ول.
– جاسىراتىن نەسى بار, بالالارىمىزعا باسقا پاندەردەن كومەكتەسىپ جۇرگەنىمىزبەن اعىلشىن تىلىنە كەلگەندە ات-تونىمىزدى الا قاشاتىن ەدىك. ەندى مىنە, ءوزىمىزدىڭ دە ۇيرەنىپ جاتقان جايىمىز بار. بالاممەن اعىلشىنشا سويلەسكىم كەلەدى. ساباقتىڭ ۋاقىتى دا قولايلى. كەشكە جاقىن بالاڭدى مەكتەپتەن الۋعا كەلگەندە ءبىر ساعاتىڭدى اعىلشىنشا ۇيرەنۋگە ارناعاننىڭ ارتىعى جوق دەپ ويلايمىن, – دەيدى تەگىن كۋرسقا قاتىسىپ ءجۇرگەن اتا-انانىڭ ءبىرى گۇلميرا ءشارىپحانوۆا.
مەكتەپتە جاڭا وقۋ جىلىنان باستاپ وقۋشىلاردىڭ ويلاۋ, تەز شەشىم قابىلداۋ, سابىر ساقتاۋ سەكىلدى قابىلەتتەرىن جەتىلدىرۋ ماقساتىندا «ينتەللەكتۋم» اتتى ەكى كابينەت اشىلىپتى. اپتاسىنا ءبىر مارتە جۇرگىزىلەتىن ءپان وقۋ باعدارلاماسىنا دا ەنگىزىلگەن. شىعىس قازاقستان مەكتەپتەرىندە العاش رەت قولعا الىنىپ وتىرعان بۇل جوباعا وبلىستىق ءبىلىم باسقارماسى قولداۋ ءبىلدىرىپ, ءوسكەمەندەگى «ءۇمىت» بالالار ءۇيى مەن جۋىقتا عانا ءمۇمكىندىگى شەكتەۋلى بالالارعا ارنالىپ اشىلعان «اقنيەت» ينتەرنات-مەكتەبىندە دە وسىنداي ەكى كابينەت اشتى. بۇل ءپاندى ازىرگە 1-6 سىنىپ وقۋشىلارى وقىپ جاتىر. كەلەشەكتە جوعارى سىنىپ وقۋشىلارىن وقىتۋ دا جوسپارلانىپ وتىر.
ازامات قاسىم, «ەگەمەن قازاقستان»
وسكەمەن
