ارينە, بار ءومىرىن بالا تاربيەسىنە, جاس ۇرپاققا ءبىلىم بەرۋ ىسىنە ارناعان العاۋسىز جانداردى مۇنداي تىلەكتەستىك پەن قامقورشىلدىق قاناتتاندىرادى. وسى رەتتە ءوزىم ەڭبەك ەتىپ جۇرگەن سارقان قالاسىنداعى ن.وستروۆسكي اتىنداعى گۋمانيتارلىق-ەكونوميكالىق مەكتەپ-ليتسەيىندەگى وقۋ-تاربيە ءىسىن ۇتىمدى ۇيىمداستىرۋدىڭ ارقاسىندا ماۋەلەگەن جەمىستەردى تىلگە تيەك ەتكىم كەلەدى.
ءبىزدىڭ ۇجىمدا ءاربىر مۇعالىمنىڭ ءوز ماماندىعىنا دەگەن قۇشتارلىعى, جۇمىستاعى جاۋاپكەرشىلىگى, شىعارماشىلىق ىزدەنىسى ءبىرىنشى ورىنعا قويىلادى. بۇل ارادا باسشى تاراپىنىڭ تالاپشىلدىعى دا ۇلكەن ءرول اتقاراتىنىن قاپەردە ۇستاعان ءلازىم. ال ءبىزدىڭ ءبىلىم ورداسىندا وسى تالاپشىلدىق سوڭعى بىرنەشە جىل بويى جوعارى دەڭگەيدەن كورىنۋدە. ءسويتىپ, جالپى ۇجىم بولىپ قالىپتاسقان جاڭاشا ويلاۋ, جاڭاشا جۇمىس ىستەۋ ءوزىنىڭ وڭ ناتيجەلەرىن بەرىپ تە جاتىر.
بۇل ارادا بوس دابىرا, قۇر ۇرانشىلدىق قاجەت ەمەس ەكەنىن ەسكەرگەن ءجون. كۇندەلىكتى قۇمىرسقا ەڭبەك, وقۋشىلاردىڭ جان دۇنيەسىنە ەنە ءبىلۋ, سىننان وتكەن وزىق تاجىريبەگە سۇيەنۋ, ءوز تاجىريبەڭدى قالىپتاستىرۋ شاكىرتتىڭ دە بىلىمگە قۇشتارلىعىن, ىنتا-زەيىنىن ارتتىرادى. وسى باعىتتى بەرىك ۇستانعان مەكتەپ-ليتسەيىمىز سوڭعى بەس جىل ىشىندە كوپتەگەن جاقسى كورسەتكىشتەرىمەن الدىڭعى قاتارلى ءبىلىم ورداسى بولىپ وتىر. ۇستازداردىڭ بىلىكتىلىك داعدىلارىنىڭ وسۋىنە قاراي وقۋشىلاردىڭ دا ءبىلىم ساپاسى ارتا تۇسۋدە. ايتالىق, بۇدان بەس جىل بۇرىنعى وقۋشىلاردىڭ سانى – 424, بىلىمدىك كورسەتكىشى – 53 پايىز بولسا, قازىرگى تاڭدا مەكتەپتەگى وقۋشى سانى 821-گە جەتىپ, ءبىلىم ساپاسى 67,9 پايىزبەن ايشىقتالعان.
ىنتا مەن زەيىن ەكى جاقتان دا بىردەي بولماسا, ەڭبەك ەش كەتپەك. مەكتەبىمىزدە ءبىلىم بەرۋگە, شاكىرت جۇرەگىن جاۋلاۋعا, وي-ساناسىن ءبىلىم كەڭىستىگىنە تالپىندىرۋعا مۇعالىمدەر بارىنشا كۇش سالادى. ۇستازدىق ۇلاعاتقا كىرشىك تۇسىرمەۋگە ءسات سايىن ۇمتىلادى دەسەك, ارتىق ايتقاندىق ەمەس. شاكىرتتەردىڭ ءار ءپاندى, ساباقتى شات كوڭىلمەن, قۇشتار پەيىلمەن يگەرىپ وقۋىن نازاردا ۇستايدى. مەكتەپ ۇجىمىنداعى ءبىر ماقساتقا جۇمىلعان ىنتىماقشىلدىق اۋان, بىلىمگە قۇشتار شىعارماشىل ورتاق ءورىس, تاعىلىمدى ءھام تارتىمدى ورتا وسىلاي قالىپتاسۋدا. وقۋشىلاردى بىلىمگە ىنتالاندىرۋ ورايىندا وبلىستىق, رەسپۋبليكالىق جانە حالىقارالىق ء پان وليمپيادالارىنىڭ مۇمكىندىگى مەن تارتىمدىلىعى پايدالانىلۋدا.
ۇستازدارىمىز ۋاقىت كوشىنە ىلەسۋدى مۇرات تۇتقان. التى ارىپتەسىمىز وبلىستىق پەداگوگيكالىق وقۋلارعا قاتىسىپ, جۇلدەلى ماراپاتتارعا يە بولدى, القالى سىندا جوعارى بىلىكتىلىكتەرىن, تاعىلىم ۇلگىلەرىن تانىتتى. وسىنداي وزىق ءتاجىريبەلەرىنىڭ ارقاسىندا مەكتەپ-ليتسەيدىڭ جەتىستىكتەرى «قازاقستانداعى زاماناۋي ءبىلىم بەرۋ» جيناعىنا باسىلىپ شىقتى. مەكتەپ تاجىريبەسى حالىقارالىق «بولشايا مەجدۋنارودنايا ەنتسيكلوپەديا» كىتابىندا دا جيناقتالىپ, «ۇزدىك ءبىلىم مەكەمەسى» بەلگىسىمەن ماراپاتتالدى.
ءبىلىم وردامىزدا «مەكتەپ» مۇراجايى ۇيىمداستىرىلدى. «اتامەكەن» باعدارلاماسى اياسىندا «ۇلتتىق سالت-ءداستۇرىمىز», «تاريحتىڭ كولەڭكەدە قالعان بەتتەرى» دەگەن تاقىرىپتاردا ىزدەنىس جۇمىستارى جۇرگىزىلدى. ءسويتىپ, مەكتەپ وقۋشىلارىنىڭ تۋعان جەر تاريحىن ءبىلىپ وسۋىنە, تۋعان ەلدى سۇيەر وتانشىلدىققا باۋلۋعا جاعداي جاسالدى.
ەلباسى ايتقان ينتەللەكتۋالدى ۇلت قالىپتاستىرۋ, ادامي كاپيتال ساپاسىن جاقسارتۋ ىسىندەگى مۇعالىمدەردىڭ ءرولى ۇلكەن ەكەندىگىن بىلەمىز. ولاي بولسا, ءبىزدىڭ مەكتەپتىڭ ۇستازدارى دا وسىناۋ ۇلى ماقساتتىڭ الدىڭعى شەبىنەن تابىلىپ, ءبىلىمدى ۇرپاق ءتاربيەلەۋ جولىندا تالماي ىزدەنىپ, تالاپتانا بەرمەك.
مەرۋەرت تەمىربەكقىزى,
ن.وستروۆسكي اتىنداعى مەكتەپ-ليتسەيىنىڭ مۇعالىمى
الماتى وبلىسى,
سارقان قالاسى
