جيىن مودەراتورى, وبلىس اكىمىنىڭ كەڭەسشىسى ارتۋر نىعمەتوۆ ەلباسىنىڭ كونستيتۋتسيالىق رەفورماعا قول قويعانىن, وعان دەيىن بۇل قۇجاتتى قالىڭ جۇرتشىلىق تالقىلاعانىن ايتا كەلىپ, نەگىزگى سپيكەر «قازاقستان رەسپۋبليكاسىنىڭ زاڭناما ينستيتۋتى» مەملەكەتتىك مەكەمەسىنىڭ جەتەكشى عىلىمي قىزمەتكەرى, زاڭ عىلىمدارىنىڭ كانديداتى, دوتسەنت مەرەكە عابدۋاليەۆكە ءسوز بەردى.
– تاۋەلسىزدىكتىڭ العاشقى جىلدارىندا قابىلدانعان اتا زاڭ ەلىمىزدەگى تۇراقتىلىقتىڭ كەپىلى بولدى دەسەك, ارتىق ايتقاندىق ەمەس. ويتكەنى, اينالامىزداعى مەملەكەتتەردە سوعىس ءورتى تۇتانىپ, تىنىشتىقتىڭ دەگبىرى قاشقان ءتۇرلى جاعدايلار ورىن الىپ, ارقانداي قولايسىزدىقتار بولىپ جاتقاندا, قازاقستان ەشقانداي الاڭسىز مەملەكەت قۇرۋ ىسىمەن اينالىستى. سونىڭ ارقاسىندا شەكارامىز شەگەندەلدى, استانا قالاسى بوي كوتەردى. ەلدىڭ الەۋمەتتىك-ەكونوميكالىق جاعدايى جاقساردى. ال ءبۇگىنگى زامان ءبىزدىڭ الدىمىزعا جاڭا ساياسي رەفورمالاردى ۇسىنىپ وتىر. سوندىقتان ەلباسى ءوزىنىڭ بىرقاتار وكىلەتتىگىن پارلامەنت پەن ۇكىمەتكە ءبولىپ بەردى. بۇل − زاڭ شىعارۋشى ورگان مەن اتقارۋشى بيلىكتىڭ حالىق الدىنداعى جاۋاپكەرشىلىگىن ارتتىرادى دەگەن ءسوز. سوعان سايكەس, پارلامەنت پەن ۇكىمەتتىڭ قۇزىرەتى دە كۇشەيەدى,– دەدى مەرەكە تىلەك ۇلى.
جاڭا كونستيتۋتسيالىق رەفورما بويىنشا ەندى ەل ومىرىندە ەلەۋلى ورىن الاتىن زاڭدارعا دا تيىسىنشە وزگەرىستەر ەنگىزىلەدى. سولاردىڭ قاتارىندا ادام قۇقىقتارىنا قاتىستى دا ءبىرشاما وزگەرىستەر بولماق. «الداعى ۋاقىتتا ادام قۇقىقتارى جونىندە ەسەپ جاسالىپ وتىرادى. بۇل ەل شەڭبەرىندە قابىلدانعان زاڭداردىڭ قانشالىقتى ورىندالىپ جاتقانىن ءبىلىپ, ساراپتاپ وتىرۋعا تاپتىرماس قۇرال بولماق» – دەدى مەرەكە عابدۋاليەۆ.
سونىمەن قاتار, بولاشاقتا ەلدى مەكەندەر مەن اۋىلدىق وكرۋگتەردىڭ اكىمدەرىن دە حالىق سايلايتىن جۇيەگە كەلۋىمىز مۇمكىن. ساراپشى جاڭا كونس-
تيتۋتسيالىق رەفورما بارىسىندا وسىنداي مۇمكىندىكتىڭ بولۋ ىقتيمالدىعى زور دەپ وتىر. جالپى, جيىن بارىسىندا مەملەكەت ءومىرىندەگى ماڭىزدى قۇجات جايىندا كوپتەگەن اڭگىمە ايتىلدى. سونىمەن قاتار, ساراپشىلار كلۋبىنا كەلگەن مەيماندار دا ءوز ويلارىمەن ءبولىسىپ, كوكەيىندەگى سۇراقتارىن قويىپ, وعان تۇشىمدى جاۋاپ الدى.
ەرجان بايتىلەس, «ەگەمەن قازاقستان»
قىزىلوردا
