ر.ۆاسيلەنكو ءبىرىنشى كەزەكتە 2015 جىلدىڭ 27 تامىزىندا استانادا قازاقستان مەن اتوم ەنەرگەتيكاسى جونىندەگى حالىقارالىق اگەنتتىگى (ماگاتە) اراسىندا تومەن بايىتىلعان ۋران بانكىن قۇرۋ تۋرالى كەلىسىمگە قول قويىلعانىن اتاپ ءوتتى. ونىڭ ايتۋىنشا, قازاقستان بۇل كەلىسىمدى وتكەن جىلى راتيفيكاتسيالاعان. قازىرگى تاڭدا بانك عيماراتىنىڭ قۇرىلىسى جۇرگىزىلۋدە. ول بيىل پايدالانۋعا بەرىلەدى دەپ كۇتىلۋدە.
سونداي-اق, سىرتقى ىستەر ءمينيسترىنىڭ ورىنباسارى بانكتىڭ اشىلۋ سالتاناتىنىڭ 29 تامىزعا بەلگىلەنۋىنىڭ سەبەبىن دە تۇسىندىرە كەتتى. «تومەن بايىتىلعان ۋران بانكىن رەسمي تۇردە 29 تامىزدا اشۋدىڭ وزىندىك ماڭىزدى سەبەبى بار. ناقتىلاي ايتقاندا, 1949 جىلدىڭ 29 تامىزىندا سەمەي سىناق پوليگونىندا كەڭەس وداعى العاش رەت يادرولىق قارۋىن سىناعان, سونداي-اق, 1991 جىلدىڭ 29 تامىزىندا قازاقستان پرەزيدەنتى نۇرسۇلتان نازارباەۆتىڭ تاريحي جارلىعىمەن اتالعان پوليگون جابىلعان. بۇل كۇن بۇۇ تاراپىنان قازاقستان پرەزيدەنتىنىڭ باستاماسى نەگىزىندە يادرولىق سىناقتارعا قارسى حالىقارالىق ءىس-قيمىل كۇنى دەپ جاريالاندى», – دەدى ول.
سونىمەن قاتار, ر.ۆاسيلەنكو اتالعان بانكتىڭ اشىلۋ راسىمىنە قازاقستان پرەزيدەنتى نۇرسۇلتان نازارباەۆ پەن اتوم ەنەرگەتيكاسى جونىندەگى حالىقارالىق اگەنتتىكتىڭ باس ديرەكتورى يۋكيا امانونىڭ قاتىساتىنىنا ۇمىتتەنەتىنىن جەتكىزدى.
ءوز كەزەگىندە يۋكيا امانو اتالعان ىسكە بايلانىسى بارلىق ۇدەرىستەر كەستەگە ساي ءجۇرىپ جاتقانىن, بانك رەسمي تۇردە اشىلعاننان كەيىن اگەنتتىك ودان تومەن بايىتىلعان ۋران وتىنىن ساتىپ الا باستايتىنىن ايتتى.
