ەلباسىنىڭ ءاربىر جولداۋى ىلگەرى باسۋدىڭ, ءال-اۋقاتىمىزدى ارتتىرۋدىڭ جولىن كورسەتەتىن باعدارلاما ەكەندىگى داۋسىز. ارينە, بيىلعى جولداۋ ناقتىلىعىمەن ەرەكشەلەنەدى. مىسالى, ءتورتىنشى باسىمدىق رەتىندە «اگرارلىق سەكتور ەكونوميكانىڭ جاڭا درايۆەرىنە اينالۋى ءتيىس» دەۋى وتە قۇپتارلىق شەشىم.
اۋىل جانە مال شارۋاشىلىعى ونىمدەرىنەن ەكولوگيالىق تازا ءونىم شىعارۋ كۇن تارتىبىنە قويىلىپ وتىر. ول ءۇشىن سول ونىمدەردى تىكەلەي دايىندايتىن اگرارلىق سالانى قايتا قۇرىلىمداۋ كەرەك ەكەندىگى تۇسىنىكتى.
راس, ەلباسىنىڭ تاپسىرماسىمەن ۇكىمەتتىك باعدارلامالار قابىلدانىپ, ءىستىڭ كوزىن تاپقان باقۋاتتى شارۋالار شوعىرى قالىپتاسىپ كەلەدى. بىراق, ولار قانشا باقۋاتتانعانىمەن, «جالعىز شاۋىپ بايگە الماسى انىق».
وسى ورايدا پرەزيدەنتتىڭ بەس جىل ىشىندە 500 مىڭنان استام جەكە ءۇي شارۋاشىلىقتارى مەن شاعىن فەرمەرلەردى (شارۋا قوجالىقتاردى) كووپەراتيۆتەرگە تارتۋعا مۇمكىندىك بەرەتىن جاعداي جاساۋ كەرەك دەگەن تاپسىرماسىن ورىنداۋ اۋىل حالقىنىڭ ءال-اۋقاتىن ارتتىرۋعا, ازىق-ت ۇلىك قاۋىپسىزدىگىن نىعايتىپ, ىشكى جانە سىرتقى نارىققا دايىن ونىمدەردى شىعارۋعا ءمۇمكىندىك اپەرەتىن بىردەن-ءبىر دۇرىس جول دەپ ەسەپتەيمىن.
قازىر جاسىم جەتپىستىڭ ەكەۋىندە. ءومىر بويى ەڭبەك جولىم قازىرگى ەسەيحان, بۇرىنعى قاراتاۋ اۋىلىندا ءوتتى. قاراتاۋ كەڭەستىك كەزەڭدە استىق ەگىپ, مىڭعىرتىپ مال ءوسىردى, قوي باسىنىڭ سانى 45-50 مىڭ باسقا, ءىرى قارا 2-3 مىڭ, جىلقى 1000-1500, تۇيە 500 باسقا جەتتى. جاراتقاننىڭ جاقسىلىعىمەن 10 مىڭ گەكتار جەرىمىز بار ەدى. اۋدان استىعىنىڭ ۇشتەن ءبىرى ءبىزدىڭ شارۋاشىلىقتا وندىرىلەتىن. شارۋاشىلىقتىڭ ءبىر وزىندەگى 20 استىق كومباينى استىق وراعىندا بار ەگىندى جيناپ الۋعا شاماسى جەتپەي, كورشىلەس شارۋاشىلىقتاردان كومەك الاتىنبىز.
گەكتار ءتۇسىمى دە كوڭىلدەگىدەي شىعاتىن. مىسالى, مارىنسازداعى 120 گەكتار القاپتان گەكتارىنا 37 تسەنتنەردەن, اق شوقادا 100 گەكتاردان 42 تسەنتنەردەن استىق باستىراتىنبىز. ورتا ەسەپپەن 10-15 تسەنتنەردەن ءونىم الاتىنبىز.
قازىر سول جەتىستىكتىڭ ءبىرى دە جوق. اۋىلدا 40-قا تارتا شارۋا قوجالىعى بار. باياعى تەحنيكا, استىق كومبايندارى جوق. استىق تۇقىمى دا كۇماندى. مايدالانىپ كەتكەندىكتەن بار ەگىستىك القابىنىڭ ۇشتەن ءبىرىن عانا يگەرىپ جۇرگەن جايىمىز بار. ونىڭ ءوزىن كورشى جۋالى اۋدانىنىڭ كاسىپكەرىنە جالعا بەرىپ وتىرمىز. ەگەسى ءبىز بولعانمەن, ءونىمدى ءوندىرىپ الىپ, بايىپ جاتقاندار سىرتتان كەلگەن كاسىپكەرلەر. ءبىز سياقتى مايدا شارۋاشىلىقتار بىرىگىپ سەرىكتەستىكتەر, كووپەراتيۆتەر قۇرىپ, اياقتارىنان قاز تۇرىپ جاتىر. ونى كورىپ تە, ءبىلىپ تە ءجۇرمىز. ماسەلەن, مەنىڭ 65 گەكتار عانا ەگىستىك القابىم بار. ونى يگەرۋ ءۇشىن استىق كومباينىن الۋ ماعان ءتيىمسىز ءارى وعان شامام دا كەلمەيدى. «كوپ تۇكىرسە – كول» دەمەكشى», مەن سياقتى شارۋالار مەن ءۇي قوجالىقتارى كوپ. سولارعا «بىرىگەيىك» دەسەك, بەلسەنە قويمايدى. بانكتەردىڭ الدىن توزدىرۋدان قورقا ما, جوق جاستارىمىز جالقاۋلانىپ, باردى قاناعات تۇتۋعا ەتتەرى ۇيرەنىپ كەتكەندىكتەن بە, ايتەۋىر ىقىلاسسىز.
«اۋىلشارۋاشىلىق كووپەراتيۆتەرى تۋرالى» زاڭدى وقىساڭ 40-50 ءۇي قوجالىقتارى بىرىكسە, 4 پايىزدىق سىياقىمەن 5-7 جىلعا دەيىن نەسيە بەرۋ قاراستىرىلعان. ءىستىڭ كوزىن تابا بىلگەنمەن تيىن ساناي بىلگەنگە بۇل كوپ كومەك ەكەندىگى داۋسىز.
تەك بىرلىك كەرەك, تاۋەكەل كەرەك. ويتكەنى, ءومىر بىزدەن سونى تالاپ ەتەدى. ەلباسىنا مىڭ دا ءبىر راحمەت, جەر داۋىنا نۇكتە قويىپ, بەس جىلعا موراتوري جاريالادى. ەندى, وسى ۋاقىت ارالىعىندا, جەرىمىزدى كولدەنەڭ كوك اتتىعا جالعا بەرىپ, قاراپ وتىرعانشا يەلىك ەتىپ, ءونىمىن ءوزىمىز الايىق. ول ءۇشىن اۋىل كووپەراتيۆتەرىن قۇرىپ, العان نەسيەمىزگە تەحنيكالار الىپ, جايقالتىپ ەگىن وسىرەيىك. ءبىزدىڭ القاپتا ەكولوگيالىق مينەرالدى تىڭايتقىشتار قولدانىلمايدى, تازا ونىمدەر الىنادى. ونىمەن ازىقتانعان مالدىڭ ەتىمەن ءسۇتى تازا بولماي ما؟
ءبىز بولساق, قارتايدىق. ال جاستار نەگە ۇيىمداسىپ, بىرىكپەسكە. ەگىندى دە, جاڭا تەحنولوگيانى دا يگەرەتىن سولار عوي. ەلگە يەلىك ەتەتىن دە سولار.
ەندەشە, قيمىلدايتىن كەز كەلدى, اعايىن!
قۇرمانالى جاقسىلىق ۇلى,
ەڭبەك ارداگەرى
جامبىل وبلىسى,
تالاس اۋدانى,
ەسەيحان اۋىلى
