بيىل استانادا ۇيىمداستىرىلاتىن ماڭىزدى شاراعا قاتىسۋشى مەملەكەتتەرگە تيەسىلى پاۆيلونداردىڭ اۋماعى 78 مىڭ شارشى مەتردى قۇرايدى. جالپى, كورمەدە حالىقارالىق 52 جەكە جانە 6 بىرىكتىرىلگەن پاۆيلون بولادى. ەڭ ءىرى پاۆيلونداردىڭ ءبىرى كۇنگەيدەگى كورشىمىزدىڭ ەنشىسىندە. ونىڭ اۋماعى, ەكى قاباتتى قوسقاندا, 2 مىڭ شارشى مەترگە جەتىپ جىعىلادى. بۇگىندە اتالمىش الاڭدا قۇرىلىس جۇمىستاردى قىزۋ جۇرگىزىلۋدە.
قىتايلىقتار كورمەدە «بولاشاق ەنەرگياسى. جاسىل جىبەك جولى» تاقىرىبى اياسىندا ەنەرگەتيكا سالاسىنداعى يننوۆاتسيالىق تەحنولوگيالاردى كورسەتپەك. سول ەلدىڭ حالىقارالىق ساۋدا پالاتاسى ديرەكتورى, ۇلتتىق پاۆيلون كونسترۋكتيۆتى توبىنىڭ باسشىسى دجە دجيەنىڭ ايتۋىنشا, قحر-دىڭ ەكسپو-2017 كورمەسىنە قاتىسۋعا دەگەن قۇلشىنىسى جوعارى. «پاۆيلونىمىزدىڭ اۋدانى وتە ۇلكەن. ونىڭ اۋماعى 1053 شارشى مەتردى قۇرايدى. قازاقستان تاراپى تاپسىرعان پاۆيلوندى قابىلداپ الدىق. بىزگە تيەسىلى اۋماقتاعى قۇرىلىس جۇمىستارى جوسپار بويىنشا جۇرگىزىلۋدە. قۇرىلىس مامىر ايىنىڭ سوڭىندا اياقتالادى», دەيدى ول.
دجە دجيە قىتاي پاۆيلونىندا قانداي يننوۆاتسيالىق تەحنولوگيالار قويىلاتىنىن دا جەتكىزدى. بۇل اۋماقتا اسپاناستى ەلىنىڭ جاسىل ەنەرگەتيكادا جەتكەن جەتىستىكتەرى, بالامالى ەنەرگەتيكا سالاسىنداعى يننوۆاتسيالىق تەحنولوگيالار كوپشىلىك نازارىنا ۇسىنىلادى. ءبۇگىندە ەڭ ءىرى 10 كومپانيا وسى سالادا جۇمىس ىستەپ جاتقان كورىنەدى. ال ەكسپو-2017 كورمەسىنە 25 قالانىڭ كاسىپكەرى شاقىرىلعان.
اۆستريا مەملەكەتىنىڭ پاۆيلونىن تانىستىرعان سول ەلدىڭ قازاقستانداعى ەلشىسى گەرحارد سايللەر جۇمىستاردىڭ كورمەگە دەيىن اياقتالاتىندىعىن العا تارتتى. «پاۆيلونىمىز كورمە اشىلعانعا دەيىن دايىن بولادى. ءبىزدىڭ حالىقارالىق شاراداعى تاقىرىبىمىز «اقىل, جۇرەك, دەنەدەگى كۇش» دەپ اتالادى. اۆستريا ەنەرگيانىڭ 37 پايىزىن سۋدان, 10 پايىزىن جەلدەن, ال قالعانىن بيوماسسادان الادى. پاۆيلونىمىزدىڭ قۇنى 5 ميلليون ەۋرونى شامالايدى. اۋماعى دا شاعىن ەمەس, 900 شارشى مەتردى قۇرايدى», دەدى ول.
ەلشى اۆستريا پاۆيلونىنىڭ نەگىزگى ەرەكشەلىگىن دە اتاپ ءوتتى. «ەلىمىزدە ارنايى كونكۋرس وتكىزگەن بولاتىن. ناتيجەسىندە VM ارحيتەكتورلىق توبى جەڭىسكە جەتتى. ولار ەكسپو-2017 كورمەسىندەگى اۆستريا پاۆيلونىنىڭ ديزاينىن جاسادى. ءبىز مادەني ءىس-شارالار دا ۇيىمداستىرامىز. سونىمەن قاتار, كورمە اۋماعىندا قوناقتار ءۇشىن ارنايى دەمالاتىن ورىن بولادى», دەدى گ.سايللەر.
ءباسپاسوز تۋرى بارىسىندا «استانا ەكسپو-2017» ۇك» اق حالىقارالىق قاتىسۋشىلارمەن بايلانىس دەپارتامەنتىنىڭ ديرەكتورى يليا ورازاقوۆ كورمە قاۋىپسىزدىگىن ساقتاۋ ماقساتىندا ءتيىستى جۇمىستاردىڭ اتقارىلىپ جاتقاندىعىن اڭگىمەلەدى. ەكسپو-2017 كورمەسىنە قاتىسۋعا نيەت بىلدىرگەن 115 مەملەكەتتىڭ 103-ىنە پاۆيلون بەرىلدى. 12 پاۆيلون تاپسىرىلۋعا دايىن. وسى ايدىڭ سوڭىنا دەيىن بارلىق كورمە اۋماعىن يەلەرىنە ءوتكىزەتىن بولامىز. ەلدەردىڭ تالاپ-تىلەكتەرىن دە ەسكەرۋدەمىز. ءماسەلەن, كەي مەملەكەتتەر ءوزدەرىنىڭ پاۆيلونى ءۇشىن ەلەكتر قۋاتىن كوبەيتۋدى سۇرايدى. كەيبىرى ءوز اۋماعىنا كۇردەلى كونسترۋكتسيالاردى قويۋعا ءوتىنىش ايتۋدا. قاۋىپسىزدىكتى ساقتاۋ ماقساتىندا بۇل تالاپتار قاناعاتتاندىرىلعان جوق», دەدى ديرەكتور.
اسحات رايقۇل, «ەگەمەن قازاقستان»
