ەرتەدە ۇلكەن كىسىلەر جول ءجۇرىپ كەتكەندە, اۋىلدىڭ قىز-جىگىتتەرى ءبىر ۇيگە جينالىپ وتكىزگەن
ساۋىق كەشىن «باستاڭعى» دەپ اتاعان. بۇل كۇندە باستاڭعىنىڭ اتى ەستىلىپ قالىپ جۇرسە دە, زاتى كونەرە باستاعانى تاعى شىندىق. وبلىستىق قازاق دراما تەاترىنىڭ جاس ارتىستەرى جانە وبلىستاعى ونەرپاز جاستاردىڭ كۇشىمەن وتكەن شارا حالقىمىزدىڭ جاراسىمدى ءداستۇرىن جاڭعىرتقانداي بولدى.
ونەرپاز جاستار ءازىل-قالجىڭعا قۇرىلعان «باستاڭعى» كەشىندە حالقىمىزدىڭ ۇمىتىلا باستاعان داستۇرلەرىن, رۋحاني قۇندىلىقتارىمىزدى ەسكە سالىپ وتىردى. جاستىق شاققا ساي جاراسىمدى كورىنىستەردى, ۇلتتىق كيىمدەردىڭ ءسان ۇلگىسىن كورسەتتى. ارينە, كەش بولعان سوڭ, ءان مەن جىرعا دا كەڭىنەن ورىن بەرىلدى. جالپى, كەشتىڭ ماقساتى دا ۇلتتىق قۇندىلىقتاردى ناسيحاتتاۋعا ارنالسا كەرەك. سونىمەن قاتار, كورەرمەندەر كەشتە جاڭا تالانتتاردىڭ ەسىمىن تۇڭعىش ەستىدى.
وبلىستا ءبىرىنشى رەت وتكىزىلىپ وتىرعان كەش ۇلتتىق ناقىشقا, بوياۋعا بايلىعىمەن دە كورەرمەندەردى ريزا ەتتى. − مەن وڭىردە «باستاڭعىنىڭ» باستالعانىنا قۋاندىم. ۇلتتىق قۇندىلىقتارىمىزدى ءوزىمىز ەسكە سالىپ وتىرماساق, ونىڭ كونەرە بەرەتىنى, كەيىنگى ۇرپاقتىڭ ونى مۇلدەم ۇمىتارى دا حاق. ماعان بۇگىنگى جاستاردىڭ قازاقى قالجىڭدارى, ۇلتتىق ويىندار مەن بىرلىككە, دوستىققا, شىنايىلىققا تاربيەلەيتىن سالتتارىمىزدى كورسەتكەنى قاتتى ۇنادى, -دەيدى كورەرمەن باقىتگۇل سۇلەيمەنوۆا.
«باستاڭعىعا» جينالعانداردان تەاتردا ينە شانشار ورىن بولمادى. ءان مەن جىرعا, قازاقى ءازىل-قالجىڭعا شولىركەگەن جۇرتشىلىق ساحناداعى جاستاردى شاپالاق ۇرىپ, قولپاشتاۋدان دا كەندە ەتكەن جوق. ۇلتتىق دۋمان-كەشتىڭ وزەگىندەي بولعان الداردى جاس اكتەر ولجاس بەگايداروۆ جاقسى الىپ شىقتى. ونەرلى جاس گۇلدەن مولداحمەتوۆانىڭ ۇلتتىق دۋماندى وتكىزۋ جونىندەگى باستاماسىن وبلىستىق مادەنيەت باسقارماسى دا قىزۋ قولدادى, ال ستسەناريىن جۋرناليست, اقىن ابىلاي ماۋدانوۆ جازدى.
−«باستاڭعىنى» تەك ناۋرىزعا تەلىپ قويماي, الداعى ۋاقىتتا ءار مەرەكەدە وتكىزۋدى ويلاستىرىپ وتىرمىز. ويتكەنى ۋاقىتتىڭ تىعىزدىعىنا قاراماي, «باستاڭعىنىڭ» وتۋىنە قوستانايداعى ءانشى, كۇيشى, اقىن جاستاردىڭ بارلىعى دا اتسالىستى. الداعى ۋاقىتتا بۇل ۇلتتىق دۋماندى دامىتا تۇسەتىن بولامىز. «باستاڭعىنىڭ» ادەتتەگى ءازىل-وسپاق كەشىنەن بولەك بولۋى كەرەكتىگىن دە ويلاستىرامىز, - دەيدى ابىلاي ماۋدانوۆ.
ءنازيرا جارىمبەتوۆا,
«ەگەمەن قازاقستان»
قوستاناي
