بۇگىندە بايىپتى ىستەردى قولعا الىپ, قارقىندى دامۋ جولىنا ءتۇسكەن جاڭاتاس قالاسىندا سۋ تاپشى. قالا تۇرعىندارى اۋىزسۋ ءزارۋلىگىن سەزىنۋدە. بۇلاي دەيتىنىمىز, قالاداعى كوپ قاباتتى ۇيلەرگە سۋ تاڭەرتەڭگى ساعات 7 مەن 12-ءنىڭ ارالىعىندا جانە كەشكى 18 بەن 23 ارالىعىندا عانا بەرىلەدى. ال ادام ءۇشىن سۋدىڭ قاجەتتىلىگى تاۋلىكتىڭ قاي مەزگىلىندە بولسا دا تۋىندايتىنى داۋسىز. تۇرعىندار بولسا تاڭەرتەڭ ۇيدەن شىعاردا بوس ىدىستارعا, ءتىپتى, ۆانناعا سۋ تولتىرىپ كەتەتىندەرىن ايتادى. شىنىندا دا, ولاي ەتپەسكە امالى تاعى جوق. ال اۋداننىڭ دامۋ كورسەتكىشتەرى مەن قول جەتكىزگەن تابىستارى باياندالعان اۋدان اكىمىنىڭ ەسەبىندە بۇل ماسەلەنى جاڭاتاس قالاسىنداعى «ايگولەك» بالاباقشاسىنىڭ تاربيەشىسى ولگا كاساپكينا كوتەرىپتى. ارينە, بۇل جالعىز عانا ادامنىڭ ەمەس, بۇكىل جاڭاتاستىقتاردىڭ تىلەگى ءارى جەرگىلىكتى بيلىككە ساۋالى. «سۋدىڭ دا سۇراۋى بار» ەكەنىن بىلگەن حالىق سۋدى ءتىرشىلىك كوزىنە بالاعان. ال قالا ادامدارىنا ول ءتىپتى اۋاداي قاجەت.
اۋدان اكىمىنىڭ ورىنباسارى بەرگەن وماربەك بۇل ماسەلە جۋىق ارادا شەشىمىن تاباتىندىعىن ايتادى. سەبەبى, وسىدان التى جىل بۇرىن تۇرعىنداردىڭ سۇرانىسىن قاناعاتتاندىرۋ ماقساتىندا ناقتى جوبا دا قولعا الىنىپتى. جوبانىڭ سمەتالىق قۇنى 2 ميلليارد 227 ميلليون تەڭگەنى قۇرايدى ەكەن. دەگەنمەن, «سۋ قۇبىرلارىن جاڭعىرتۋ» باعدارلاماسىنىڭ ەكى كەزەڭى بويىنشا بۇل ماقساتقا 2011 جىلى 500 ميلليون, 2012 جىلى 859 ميلليون, ال 2015 جىلى 442 ميلليون 424 مىڭ تەڭگە قاراجات ءبولىنىپ, يگەرىلگەن. وتكەن جىلى 352 ميلليون 370 مىڭ تەڭگە قاراستىرىلعان. ەندى رەسپۋبليكالىق, وبلىستىق بيۋدجەتتەن بولىنگەن بۇل سومالارعا جۇمىس اتقارىلىپ جاتقانىن ايتقان ب.وماربەك اۋدانداعى تاۋلى ايماقتار كوپبۇلاق پەن بۇركىتتىدەن 84 شاقىرىم سۋ قۇبىرلارىنىڭ تارتىلىپ وتىرعانىن مالىمدەدى. ايتا كەتەيىك, بۇل جۇمىس 2011 جىلى باستالعان.
ال تۇرعىندار ءۇشىن بۇل ماسەلەنىڭ ءبارى التى جىلدان بەرى باۋىن تاپسا دا, بايلاۋىن تاپپاعان ءدۇنيە بولىپ كورىنىپ تۇر. بارىنەن دە ولار ءۇيلەرىنە تاۋلىكتىڭ بارلىق مەزگىلىندە سۋ كەلىپ تۇرعانىن قالايدى.
كەزىندە كۇللى ەلگە وندىرىسىمەن اتى شىققان جاڭاتاس قالاسى بۇگىندە سۋ ماسەلەسىنەن تارشىلىق كورىپ وتىر دەگەنگە سەنۋ قيىن. ءبىراق ءبارىبىر اقيقاتتى اينالىپ ءوتۋگە بولمايدى. ەندى تالاي جىلدان بەرى «جىر» بولىپ كەلە جاتقان سۋ ماسەلەسىن اۋدان اكىمىنىڭ ورىنباسارى اعىمداعى جىلدىڭ ءبىرىنشى جارتىجىلدىعىندا شەشىلەدى دەپ وتىر. سونىمەن قاتار, تۇرعىندارعا ءتاۋلىگىنە سۋ سەگىز ساعاتتان بەرىلگەن كۇننىڭ وزىندە حالىق قالاداعى «جاڭاتاس-سۋ-جىلۋ» مەكەمەسىنە 3 ميلليون 200 مىڭ تەڭگە قارىز ەكەن. «ەگەر سۋدى تاۋلىگىنە بەرسەك, حالىق ونى تولەي المايدى», دەيدى ب.وماربەك.
ءبىرىنشى جارتىجىلدىقتىڭ ءبىتۋىنە دە ەكى ايدان ءسال عانا استام ۋاقىت قالدى. قالىڭ قاردىڭ كوبەسى ءسوگىلىپ, كوكتەم مىنەزىن تانىتقان شاققا دا كۋا بولدىق. بۇل ۋاقىتتا ءتىرشىلىكتىڭ ويانىپ, ءتۇرلەنە تۇسەتىنى اقيقات. ەندى جاڭاتاس جاقتان دا جاعىمدى حابار بولىپ قالاتىن كۇن الىس ەمەس سياقتى. كەلگەنىنە كوپ بولا قويماسا دا كوپتىڭ كوكەيىندە جاقسى پىكىر قالدىرىپ ۇلگەرگەن اۋدان اكىمى بالابەك نارباەۆ سۋ ءماسەلەسىن جولعا قويادى دەگەن سەنىم بار.
حاميت ەسامان,
«ەگەمەن قازاقستان»
جامبىل وبلىسى
